រាជធានីភ្នំពេញ ៖ នគរបាលសណ្ដាប់ធ្នាប់ខណ្ឌ៧មករា ចុះណែនាំដល់អ្នកទទួលផ្ញើរថយន្តនៅសាលាសកលវិទ្យាល័យ វណ្ណដា ជាប់របងវត្តមង្គលវ័ន មិនអនុញ្ញាតឲ្យយកផ្លូវសាធារណៈ ធ្វើជាចំណត ព្រោះកន្លងមក បង្កផលលំបាកដល់ពលរដ្ឋរស់នៅក្បែរនោះ…
រាជធានីភ្នំពេញ ៖ នគរបាលសណ្ដាប់ធ្នាប់ខណ្ឌ៧មករា ចុះណែនាំដល់អ្នកទទួលផ្ញើរថយន្តនៅសាលាសកលវិទ្យាល័យ វណ្ណដា ជាប់របងវត្តមង្គលវ័ន មិនអនុញ្ញាតឲ្យយកផ្លូវសាធារណៈ ធ្វើជាចំណត ព្រោះកន្លងមក បង្កផលលំបាកដល់ពលរដ្ឋរស់នៅក្បែរនោះ ។
ជាក់ស្ដែងនាព្រឹកថ្ងៃទី២៤ ខែតុលា ឆ្នាំ២០២៥នេះ កម្លាំងផ្នែកសណ្តាប់ធ្នាប់ខណ្ឌ និងប៉ុស្តិ៍មនោរម្យ បានចុះណែនាំអ្នកទទួលផ្ញើរថយន្តនៅសាលាសកលវិទ្យាល័យ វណ្ណដា ស្ថិតសង្កាត់មនោរម្យ ដែលគាត់យករថយន្តមកចតសង់ខាងផ្លូវលេខ១២៤ ជាប់របងវត្តមង្គលវ័ន ។
លោកវរសេនីយ៍ឯក ជុន ប៊ុនណាន អធិការនគរបាលខណ្ឌ៧មករា បានបញ្ជាក់ថា បងប្អូនប្រជាពលរដ្ឋ បានសំណូមពរ លោកជួយចាត់ឲ្យកម្លាំងផ្នែកជំនាញចុះទៅណែនាំ និងធ្វើកិច្ចសន្យាទៅដល់អ្នកទទួលផ្ញើរថយន្ត សាលាឯកជនមួយកន្លែង ក្បែររបងវត្តមង្គលវ័ន ដែលយកផ្លូវសាធារណៈចតរថយន្តអមសងខាងផ្លូវ បង្កការរំខានដល់ប្រជាពលរដ្ឋ និងអ្នកដំណើរនោះឡើយ ជាពិសេសធ្វើឲ្យបាត់បង់សណ្ដាប់ធ្នាប់ផងដែរ ។
លោកអធិការបន្តថា ចាប់ពីពេលនេះទៅ បន្ទាប់ពីធ្វើកិច្ចសន្យា និងអប់រំរួច គឺមិនអនុញ្ញាតអោយគាត់យករថយន្តផ្ញើ មកចតទាំងសងខាងផ្លូវទៀតទេ ។ ក្នុងករណីនៅតែបន្តចតទៀតនោះ អាជ្ញាធរ នឹងចាត់វិធានការក្ដៅ ដោយស្ទួចរថយន្ត យកមករក្សាទុកនៅអធិការដ្ឋាននគរបាលខណ្ឌ ដើម្បីដោះស្រាយគ្នាពេលក្រោយ ។
សូមបញ្ជាក់ថា កន្លងមកតាមបណ្ដោយផ្លូវលេខ១២៤ ជាប់របងវត្តមង្គលវ័ន ហៅវត្តស្វាយដង្គុំ សាលារៀនវណ្ណដា បានយករថយន្ត មកចតលើអមសងខាង ធ្វើឲ្យបាត់បង់សណ្ដាប់ធ្នាប់ និងពលរដ្ឋលំបាកក្នុងការធ្វើដំណើរចេញចូល ជាពិសេសអ្នកធ្វើដំណើរថ្មើរជើង ត្រូវដើរកណ្ដាលផ្លូវតែម្ដង ដែលអាចបង្កគ្រោះថ្នាក់បានគ្រប់ពេល ៕
ចែករំលែកព័តមាននេះ