ទីក្រុងគូឡាឡាំពួរ៖ ផែនការសន្តិភាព៥ចំណុចនៅមីយ៉ាន់ម៉ាដែលរបបសឹករបស់លោកមីនអុងឡាំងធ្លាប់បានសន្យាជាមួយអាស៊ានតាំងពីឆ្នាំ២០២១ គិតមកដល់ពេលនេះមានរយៈពេល៤ឆ្នាំហើយ ហើយមិនពិបាកនឹងអនុវត្តនោះទេ។ នេះបើយោងតាមការប្រមើលមើលរបស់រដ្ឋមន្ត្រីការបរទេសម៉ាឡេស៊ី លោកមហាមេត ហាសាន (Mohamad Hasan)។ លោកយល់ថារបបសឹកគួរណាស់អនុវត្តតាមផែនការនោះឱ្យបានពេញលេញ…
ទីក្រុងគូឡាឡាំពួរ៖ ផែនការសន្តិភាព៥ចំណុចនៅមីយ៉ាន់ម៉ាដែលរបបសឹករបស់លោកមីនអុងឡាំងធ្លាប់បានសន្យាជាមួយអាស៊ានតាំងពីឆ្នាំ២០២១ គិតមកដល់ពេលនេះមានរយៈពេល៤ឆ្នាំហើយ ហើយមិនពិបាកនឹងអនុវត្តនោះទេ។ នេះបើយោងតាមការប្រមើលមើលរបស់រដ្ឋមន្ត្រីការបរទេសម៉ាឡេស៊ី លោកមហាមេត ហាសាន (Mohamad Hasan)។
លោកយល់ថារបបសឹកគួរណាស់អនុវត្តតាមផែនការនោះឱ្យបានពេញលេញ ហើយគួរឱ្យអនុញ្ញាតឱ្យភ្នាក់ងារផ្ដល់ជំនួយមនុស្សធម៌អាចបំពេញការងាររបស់ខ្លួនដោយគ្មានការរំខាន។ លោកមហាមេត ហាសានទទួលស្គាល់ថាអាស៊ានមិនអាចរារាំងផែនការបោះឆ្នោតនៅមីយ៉ាន់ម៉ាដែលគ្រោងធ្វើនៅចុងឆ្នាំនេះទេ។ គ្រាន់តែថាបណ្ដារដ្ឋមន្ត្រីការបរទេសអាស៊ានចង់ឃើញមីយ៉ាន់ម៉ារៀបចំការបោះឆ្នោតដោយយុត្តិធម៌ និងបរិយាប័ណ្ណ (ចូលរួមពីគ្រប់និន្នាការនយោបាយ)។
សូមរំលឹកថាក្រោយការធ្វើរដ្ឋប្រហារផ្ដួលរំលំលោកស្រីស៊ូជីបានប៉ុន្មានខែ លោកមីនអុងឡាំង និងអាស៊ានបានឯកភាពគ្នាទៅលើផែនការសន្តិភាពទាំង៥ចំណុច។ ទោះជាយ៉ាងណាក្ដី របបសឹករងការចោទប្រកាន់ថាគ្មានឆន្ទៈអនុវត្តតាមការសន្យារបស់ខ្លួនទេ។ លោកមហាមេត ហាសានថ្លែងប្រាប់អ្នកសារព័ត៌មានថាផែនការសន្តិភាព៥ចំណុចនោះគ្មានអ្វីពិបាកនឹងអនុវត្តនោះទេ។ លោកយល់ថាជាការល្អបើរបបសឹកចាប់ផ្ដើមសន្ទនាគ្នា, ចាប់ផ្ដើមអនុញ្ញាតឱ្យដឹកជំនួយចែកជូនអ្នកអត់-ឃ្លាន និងវិលទៅរកការចរចាជាមួយភាគីពាក់ព័ន្ធទាំងអស់។
នៅចុងសប្ដាហ៍នេះ អាស៊ាននឹងរៀបចំកិច្ចប្រជុំកំពូលរបស់ខ្លួន។ គេគិតថាផែនការសន្តិភាពបានទទួលបរាជ័យហើយ។ របបដឹកនាំយោធានៅមីយ៉ាន់ម៉ាមិនត្រូវការសន្ទនាគ្នាជាមួយក្រុមប្រឆាំងទេព្រោះពួកគេចាត់ទុកអ្នកទាំងនោះជាក្រុមភេរវកម្មដែលត្រូវតែកម្ទេចចោល។ ចំពោះការចោទប្រកាន់ពីក្រុមបស្ចិមប្រទេសថារបបសឹកប្រព្រឹត្តអំពើឃោរឃៅទៅលើជនស៊ីវិលនោះត្រូវរបបសឹកចេញមុខបដិសេធ។ របបសឹកអះអាងថាខ្លួនមានឆន្ទៈមោះមុតក្នុងការរៀបចំស្រុកទេសឱ្យមានសន្តិភាព។
ងាកមកនិយាយអំពីគម្រោងរៀបចំការបោះឆ្នោតវិញម្ដង របបសឹកថ្លែងថាការបោះឆ្នោតមិនអាចរៀបចំឱ្យបាន១០០%គ្រប់ទីកន្លែងបានឡើយ។ ដូច្នេះទីកន្លែងណាដែលមានសុវត្ថិភាពគ្រប់គ្រាន់ ពួកគេនឹងរៀបចំនៅទីកន្លែងនោះ។ របបសឹកចាត់ទុកថានេះជាការបោះឆ្នោតជាដំណាក់កាលៗទៅតាមស្ថានភាពជាក់ស្ដែង។ ប៉ុន្តែរដ្ឋមន្ត្រីការបរទេសម៉ាឡេស៊ីយល់ថាគួរណាស់បង្កលក្ខណៈឱ្យប្រជាជនមានឱកាសបោះឆ្នោតគ្រប់ៗគ្នា។ យើងមិនចង់ឃើញការបោះឆ្នោតនេះចូលរួមដោយប្រជាជនត្រឹមតែមួយផ្នែក ចំណែកប្រជាជនដទៃទៀតគ្មានឱកាសបោះឆ្នោតនោះទេ។ លោកសន្យាថានឹងលើកយកបញ្ហានេះទៅដាក់នៅក្នុងរបៀបវារៈនៃកិច្ចប្រជុំកំពូលអាស៊ាន៕
ចែករំលែកព័តមាននេះ