ខេត្តស្វាយរៀង ៖ សមត្ថកិច្ចចុះបង្ក្រាបករណីដឹកជញ្ជូន និងជួញដូរគ្រឿងញៀន ចាប់ឃាត់ខ្លួនជនសង្ស័យបានម្នាក់ ដកហូតគ្រឿងញៀនបានជិត០២គីឡូក្រាម ។ បើតាមមន្ត្រីនគរបាល បានឲ្យដឹងថា ការចុះបង្ក្រាបនេះ…
ខេត្តស្វាយរៀង ៖ សមត្ថកិច្ចចុះបង្ក្រាបករណីដឹកជញ្ជូន និងជួញដូរគ្រឿងញៀន ចាប់ឃាត់ខ្លួនជនសង្ស័យបានម្នាក់ ដកហូតគ្រឿងញៀនបានជិត០២គីឡូក្រាម ។
បើតាមមន្ត្រីនគរបាល បានឲ្យដឹងថា ការចុះបង្ក្រាបនេះ គឺអនុវត្តតាមបទបញ្ជារបស់លោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្ត កាលពីថ្ងៃទី១៥ ខែតុលា ឆ្នាំ២០២៥ លោកវរសេនីយ៍ទោ ជិន សុភឿន អធិការនគរបាលស្រុកចន្ទ្រា បានដឹកនាំកម្លាំងជំនាញដាក់គោលដៅត្រួតពិនិត្យអាវុធជាតិផ្ទុះ និងសារធាតុញៀន នៅចំណុចឃុំមេសថ្ងក ស្រុកចន្ទ្រា ខេត្តស្វាយរៀង ដោយមានការសង្ស័យបានធ្វើការត្រួតពិនិត្យលើរថយន្តតាក់ស៊ី ០១គ្រឿង មានដឹកអ្នកដំណើរម្នាក់ ពីរាជធានីភ្នំពេញ គោលដៅមកកាន់ព្រំដែនឃុំសំរោង ស្រុកចន្ទ្រា នៅពេលធ្វើការត្រួតពិនិត្យ និងឆែកឆែរក្នុងកាបូបស្ពាយរបស់អ្នកដំណើរម្នាក់នោះ រកឃើញវត្ថុតាងថ្នាំញៀន ប្រភេទមេតំហ្វេតាមីន ចំនួន០២ដុំធំ (ទម្ងន់១,៩៩៨.០៦ក្រាម) ជិត០២គីឡូក្រាម ។
សមត្ថកិច្ចបានឃាត់ខ្លួនមុខសញ្ញាជួញដូរ ០១នាក់មាន ឈ្មោះ ចាន់ មករា ភេទប្រុស អាយុ៣៣ឆ្នាំ ជាតិខ្មែរ មុខរបរមិនពិតប្រាកដ រស់នៅរាជធានីភ្នំពេញ ។
បច្ចុប្បន្ន ជនសង្ស័យ និងវត្ថុតាង ត្រូវបានកម្លាំងការិយាល័យជំនាញប្រឆាំងគ្រឿងញៀន បញ្ជូនទៅកាន់សាលាដំបូងខេត្តស្វាយរៀង ដើម្បីចាត់ការបន្តតាមច្បាប់ ។ លោកចៅក្រម ក៏បានចេញដីការឃុំខ្លួនជនសង្ស័យជាបណ្តោះអាសន្ននៅពន្ធនាគាររួចហើយ ៕
ចែករំលែកព័តមាននេះ