ខេត្តកែប៖ ”ឆ្នេរតេជោសន្តិភាពកែប” ប្រវែងជិត៣គីឡូម៉ែត្រ បានលេចចេញរូបរាងបណ្តើរៗ តាមគម្រោងប្លង់ទំនើប ពេលរួចរាល់នឹងដាក់ជូនសាធារណៈកម្សាន្តសប្បាយនាពេលខាងមុខឆាប់នេះៗ។ យោងតាមការចុះផ្សាយរបស់រដ្ឋបាលខេត្តកែប បានឱ្យដឹងថា ឯកឧត្តម សោម…
ខេត្តកែប៖ ”ឆ្នេរតេជោសន្តិភាពកែប” ប្រវែងជិត៣គីឡូម៉ែត្រ បានលេចចេញរូបរាងបណ្តើរៗ តាមគម្រោងប្លង់ទំនើប ពេលរួចរាល់នឹងដាក់ជូនសាធារណៈកម្សាន្តសប្បាយនាពេលខាងមុខឆាប់នេះៗ។
យោងតាមការចុះផ្សាយរបស់រដ្ឋបាលខេត្តកែប បានឱ្យដឹងថា ឯកឧត្តម សោម ពិសិដ្ឋ អភិបាល នៃគណៈអភិបាលខេត្តកែប នៅរសៀលថ្ងៃសុក្រ ទី១៧ ខែតុលា ឆ្នាំ២០២៥ បានមានប្រសាសន៍ថា ឆ្នេរតេជោសន្តិភាពកែប ដែលមានប្រវែង ២.៧០០ម៉ែត្រ ស្ថិតនៅភូមិថ្មី សង្កាត់ព្រៃធំ ក្រុងកែប ខេត្តកែប បាននិងកំពុងពន្លឿនការស្ថាបនាលេចចេញរូបរាងបណ្តើរៗ តាមគម្រោងប្លង់ទំនើប និងរួចរាល់ដាក់ជូនសាធារណៈកម្សាន្តសប្បាយនាពេលខាងមុខឆាប់ៗ។
ឯកឧត្តម អភិបាលខេត្ត បានប្រសាសន៍បែបនេះ ក្នុងសន្និបាទបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ ២០២៦ របស់មន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តកែប ដោយមានអញ្ជើញចូលរួមជាគណៈអធិបតី ឯកឧត្តម សូ សិង្ហា អនុរដ្ឋលេខាធិការ ក្រសួងរៀបចំដែនដីនគរូបនីយកម្ម និងសំណង់ តំណាង ឯកឧត្តម សាយ សំ អាល់ ឧបនាយករដ្ឋមន្ត្រី រដ្ឋមន្ត្រីមន្ត្រីក្រសួងរៀបចំដែនដី នគរូបនីយកម្ម និងសំណង់។
សូមជម្រាបជូនថា បើតាមប្លង់មេ គម្រោងអភិវឌ្ឍន៍រមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់នៅខេត្តកែបមានប្រវែង ២.៧០០ ម៉ែត្រ ចាប់ពីផ្សារក្ដាមទៅដល់ព្រៃកោងកាង ស្ថិតនៅភូមិថ្មី សង្កាត់ព្រៃធំ ក្រុងកែប ខេត្តកែប ក្នុងនោះត្រូវសាងសង់ឆ្នេរខ្សាច់កម្សាន្តសាធារណៈកម្រិតខ្ពស់មានទទឹងយ៉ាងតិចប្រវែង ៣០ ម៉ែត្រ។ ក្នុងគម្រោងក៏មានការសាងសង់សួនច្បារសាធារណៈ និងការដាំដើមឈើនៅលើដីចំណីឆ្នេរសមុទ្រមានទទឹង ៥០ ម៉ែត្រ៕
ចែករំលែកព័តមាននេះ