ទីក្រុងវ៉ាស៊ីនតោន៖ អតីតទីប្រឹក្សាសន្តិសុខជាតិរបស់លោកត្រាំកាលពីអាណត្តិទីមួយ លោកចនបូលតុន (John Bolton) ត្រូវបានចោទប្រកាន់នៅក្នុងតុលាការរដ្ឋម៉ារីលែន (Maryland) ពីបទបញ្ចេញឯកសារសម្ងាត់របស់ជាតិពាក់ព័ន្ធនឹងវិស័យយោធា។ លោកបូលតុនត្រូវបានចោទប្រកាន់ពាក់ព័ន្ធនឹងការបញ្ចេញឯកសារសម្ងាត់យោធាចំនួន៨ករណី និងពីបទកាន់កាប់ឯកសារយោធាចំនួន១០ករណី។…
ទីក្រុងវ៉ាស៊ីនតោន៖ អតីតទីប្រឹក្សាសន្តិសុខជាតិរបស់លោកត្រាំកាលពីអាណត្តិទីមួយ លោកចនបូលតុន (John Bolton) ត្រូវបានចោទប្រកាន់នៅក្នុងតុលាការរដ្ឋម៉ារីលែន (Maryland) ពីបទបញ្ចេញឯកសារសម្ងាត់របស់ជាតិពាក់ព័ន្ធនឹងវិស័យយោធា។ លោកបូលតុនត្រូវបានចោទប្រកាន់ពាក់ព័ន្ធនឹងការបញ្ចេញឯកសារសម្ងាត់យោធាចំនួន៨ករណី និងពីបទកាន់កាប់ឯកសារយោធាចំនួន១០ករណី។ ទង្វើទាំងនេះត្រូវចាត់ទុកជាការរំលោភច្បាប់ស្ដីពីការប្រឆាំងនឹងអំពើចារកម្ម។
បទចោទប្រកាន់នីមួយៗបើតុលាការរកឃើញថាមានទោសមែនអាចឱ្យលោកចនបូលតុនជាប់ពន្ធនាគារ១០ឆ្នាំ។ មេធាវីរបស់លោកបូលតុនថ្លែងថាកូនក្ដីរបស់ខ្លួន (លោកបូលតុន) មិនបានចែករំលែក ឬរក្សាទុកព័ត៌មានដោយខុសច្បាប់នោះទេ។ លោកបូលតុនធ្លាប់ធ្វើជាឯកអគ្គរដ្ឋទូតអាមេរិកប្រចាំអង្គការសហប្រជាជាតិ និងជាទីប្រឹក្សាសន្តិសុខជាតិប្រចាំសេតវិមាន។
បន្ទាប់មក លោកត្រូវលោកត្រាំបណ្ដេញចេញពីតំណែងដោយសារមានទស្សនៈផ្សេងគ្នា ជាពិសេសពាក់ព័ន្ធនឹងការចរចានុយក្លេអ៊ែររបស់កូរ៉េខាងជើង។ ក្រោយមក លោកបូលតុន និងលោកត្រាំក្លាយជាគូបដិបក្ខដ៏ជូរចត់។ លោកបូលតុនដើររិះគន់នយោបាយរបស់លោកត្រាំយ៉ាងចាស់ដៃតាមប្រព័ន្ធផ្សព្វផ្សាយ ឬវេទិកាសាធារណៈ។ នៅក្នុងសៀវភៅរំលឹកអនុស្សាវរីយ៍របស់លោក អតីតទីប្រឹក្សារូបនេះចាត់ទុកលោកត្រាំជាមនុស្សដែលគ្មានគុណវុឌ្ឍិគ្រប់គ្រាន់ដើម្បីធ្វើជាមេដឹកនាំទេ។
ការចោទប្រកាន់លោកបូលតុនលើកនេះកើតឡើង២ខែបន្ទាប់ពីភ្នាក់ងារអែហ្វប៊ីអាយចូលឆែកឆេរផ្ទះ និងការិយាល័យរបស់លោកដើម្បីស្វែងរកភស្តុតាងដាក់បន្ទុកចំពោះករណីសង្ស័យថាលោករំលោភច្បាប់ស្ដីពីការប្រឆាំងនឹងចារកម្ម។ ច្បាប់នេះចែងថារាល់ការរក្សាទុក ចែកចាយ និងដាក់តាមខ្លួននូវឯកសារសម្ងាត់ស្ដីពីវិស័យការពារជាតិត្រូវចាត់ទុកជាបទឧក្រិដ្ឋ។
នៅក្នុងគេហដ្ឋានរបស់លោកបូលតុនប្រចាំរដ្ឋម៉ារីលែន អែហ្វប៊ីអាយរឹបអូសបានទូរស័ព្ទដៃ២គ្រឿង, សំណុំឯកសារមួយចំនួនដែលដាក់ឈ្មោះលោកត្រាំ និងកម្រងឯកសារជាលក្ខណៈសេចក្ដីថ្លែងការណ៍ពាក់ព័ន្ធនឹងការវាយប្រហាររបស់ក្រុមសម្ព័ន្ធមិត្ត។ នៅពេលចូលឆែកឆេរនៅការិយាល័យរបស់លោកបូលតុន អែហ្វប៊ីអាយរកឃើញសំណុំឯកសារដែលដាក់ផ្លាកថា «ឯកសារសម្ងាត់ផ្ទៃក្នុង»។ ក្នុងនោះមានឯកសារស្ដីពីអាវុធមហាប្រល័យ, បេសកកម្មរបស់អាមេរិកនៅអង្គការសហប្រជាជាតិ និងឯកសារដទៃទៀតពាក់ពន្ធនឹងប្រព័ន្ធទំនាក់ទំនងជាយុទ្ធសាស្ត្ររបស់រដ្ឋាភិបាលអាមេរិក។
នៅក្នុងតុលាការ លោកបូលតុនត្រូវបានចោទប្រកាន់ថាបានបញ្ជូនព័ត៌មានសម្ងាត់តាមអ៊ីមែលផ្ទាល់ខ្លួន, ប្រើប្រាស់គណនីឯកជនដើម្បីបញ្ជូនឯកសារសម្ងាត់បំផុតរបស់ជាតិ និងរក្សាទុកឯកសារស៊ើបការណ៍សម្ងាត់នៅក្នុងផ្ទះរបស់គាត់។ លោកបូលតុនត្រូវបានចោទប្រកាន់បន្តទៀតថាលោកបានចែករំលែកទៅកាន់សាច់ញាតិរបស់លោកនូវព័ត៌មានសម្ងាត់កម្រាស់ជាងមួយពាន់ទំព័រពាក់ព័ន្ធនឹងការបំពេញការងាររបស់រដ្ឋាភិបាលអាមេរិក។ នេះបើយោងតាមការផ្សាយរបស់អាល់ចាស៊ីរ៉ា (Al Jazeera) និងប្រភពដទៃទៀត៕
ចែករំលែកព័តមាននេះ