កុំភ្លេច ! ស្ទឹងសៀមរាបត្រៀមរៀបចំផ្សារទឹក ដ៏អ៊ូអររួមទាំងប្រណាំងទូកមិត្តភាព និងការប្រគំតន្ត្រីស្គរដៃដ៏ប្លែកភ្នែក(៤-៦ វិច្ឆិកា)
- សៀមរាប
ខេត្តសៀមរាប ៖ នាថ្ងៃទី១៥ ខែតុលា ឆ្នាំ២០២៥ នេះ លោក ប្រាក់ សោភ័ណ ដែលជាអភិបាលខេត្តសៀមរាប…
ខេត្តសៀមរាប ៖ នាថ្ងៃទី១៥ ខែតុលា ឆ្នាំ២០២៥ នេះ លោក ប្រាក់ សោភ័ណ ដែលជាអភិបាលខេត្តសៀមរាប និងជាប្រធានសហភាពសហព័ន្ធយុវជនកម្ពុជា (ស.ស.យ.ក.) ខេត្ត បានដឹកនាំក្រុមការងារចុះទៅពិនិត្យទីតាំងតាមដងស្ទឹងសៀមរាប ដើម្បីរៀបចំកម្មវិធីពិសេសគឺ «ផ្សារទឹក និងជិះទូកកម្សាន្ត» ។
ជាក់ស្តែង រដ្ឋបាលខេត្តសៀមរាប បានប្រកាសនៅលើផេកផ្លូវការ នាថ្ងៃទី១៥ ខែតុលានេះថា ៖ នាថ្ងៃទី១៥ ខែតុលា ឆ្នាំ២០២៥ លោក ប្រាក់ សោភ័ណអភិបាលខេត្តសៀមរាប និងជាប្រធាន ស.ស.យ.ក.ខេត្ត បានដឹកនាំក្រុមការងារចុះពិនិត្យទីតាំងគ្រោងរៀបចំកម្មវិធីផ្សារទឹក និងជិះទូកកំសាន្ត នៅតាមដងស្ទឹងសៀមរាប នាឱកាសព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ដែលនឹងប្រព្រឹត្តទៅនាថ្ងៃអង្គារ-ទី៤-៦ ខែវិច្ឆិកា ឆ្នាំ២០២៥ ដែលរៀបចំដោយសហភាពសហព័ន្ធយុវជនកម្ពុជា ខេត្តសៀមរាប ។
សូមបញ្ជាក់បន្ថែមថា ក្នុងឆ្នាំ២០២៥នេះ រដ្ឋបាលខេត្តពុំបានរៀបចំព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែទេ ដោយរដ្ឋបាលខេត្ត បានឱ្យសហភាពសហព័ន្ធយុវជនកម្ពុជា ខេត្តសៀមរាបរៀបចំកម្មវិធីកំសាន្តមួយចំនួនដូចជា ៖ កម្មវិធីជិះទូកកំសាន្ត កម្មវិធីប្រណាំងទូកមិត្តភាពសៀមរាបផ្ទះខ្ញុំ, កម្មវិធីប្រគុំតន្ត្រីស្គរដៃ, កម្មវិធីស្តង់ពិព័រណ៍, កម្មវិធីប្រដាល់គុនខ្មែរ, ល្ខោនបាសាក់ និងកម្មវិធីកំសាន្តផ្សេងៗជាច្រើនទៀត។
ការរៀបចំកម្មវិធីនេះ ធ្វើឡើងក្នុងគោលបំណងជំរុញដល់វិស័យទេសចរណ៍ក្នុងខេត្តសៀមរាប ឱ្យកាន់តែមានភាពរីកចម្រើន ក៏ដូចជា ចូលរួមក្នុងការស្តារ និងលើកស្ទួយសេដ្ឋកិច្ចខេត្តសៀមរាប តាមរយៈការគាំទ្រអំពីផលិតផលខ្មែរ ដែលធ្វើឡើងដោយស្នាដៃកូនខ្មែរ អនុវត្តតាមពាក្យស្លោក «ភូមិមួយផលិតផលមួយ» រួមទាំងបង្កើតឱ្យមាននូវផ្ទាំងទស្សនីយភាពប្លែកៗទៅកាន់ភ្ញៀវទេសចរជាតិ និងអន្តរជាតិមកកំសាន្តក្នុងខេត្តសៀមរាបយ៉ាងច្រើនកុះករបន្ថែមទៀត៕
ចែករំលែកព័តមាននេះ