ទីប្រឹក្សាសំខាន់មួយរូបរបស់ប្រធានាធិបតីអាហ្វហ្គានីស្ថាន លោកហាមីដ កាហ្សៃ ត្រូវបានបាញ់ស្លាប់ កាលពីយប់ថ្ងៃទី១៧ កក្កដា កន្លងមក នៅភូមិគ្រឹះរបស់លោកក្នុងទីក្រុងកាប៊ុល។ តាមសេចក្តីរាយការណ៍ថា ក្នុងអំពើបាញ់ប្រហារនោះ ខ្មាន់កាំភ្លើង៣នាក់បានលបចូលភូមិគ្រឹះរបស់ជនរងគ្រោះ ហើយបាញ់ប្រហារតែម្តង។ មន្ត្រីសន្តិសុខមួយរូបនិយាយឱ្យដឹងថា ទីប្រឹក្សារូបនេះ ឈ្មោះ Jan Mohamad Khan ក៏ជាអតីតអភិបាលខេត្តមួយរបស់អាហ្វហ្គានីស្ថានផងដែរ។
មន្ត្រីដដែលបានប្រាប់ទីភ្នាក់ងារព័ត៌មានចិនស៊ីនហួថា ខ្មាន់កាំភ្លើងដែលមិនស្គាល់អត្តសញ្ញាណត្រូវគេជឿថា ជាពួកសកម្មប្រយុទ្ធតាលីបង់បានសម្រុកចូលភូមិគ្រឹះរបស់លោក Mohamad នៅវេលាម៉ោង៨យប់ម៉ោងក្នុងប្រទេសអាហ្វហ្គានីស្ថាន ហើយបាញ់រះពេញភូមិគ្រឹះនេះ បណ្តាលឱ្យស្លាប់លោក Mohamad និងភ្ញៀវរបស់លោកម្នាក់ឈ្មោះ Hashim Watawal។
អ្នកនាំពាក្យពួកតាលីបង់ឈ្មោះ Zabiullah Mujahid និយាយក្នុងសេចក្តីថ្លែងការណ៍មួយចេញផ្សាយតាមអ៊ីមែលរបស់តាលីបង់ថា ពួកតាលីបង់បានសម្លាប់លោក Mohamad ដោយលោក Mohamad ជួយកងកម្លាំងចម្រុះក្នុងការបើកការវាយឆ្មក់ពេលយប់ប្រឆាំងពលរដ្ឋអាហ្វហ្គានីស្ថាន។
ការស្លាប់របស់លោក Mohamad ជាទីប្រឹក្សាសំខាន់របស់លោកកាហ្សៃ កើតឡើងរយៈពេលមិនដល់មួយសប្តាហ៍ផង ក្រោយពីការស្លាប់ប្អូនប្រុសរបស់លោក។
ក្រោយពី លោក Mohamad ត្រូវបានបាញ់ស្លាប់កងកម្លាំងសន្តិសុខមួយកងធំក្នុងនោះមានកងកម្លាំងអាហ្វហ្គានីស្ថាន និងកងកម្លាំងអង្គការអូតង់ បានលើកទៅកាន់កន្លែងកើតហេតុ ដើម្បីគ្រប់គ្រងស្ថានការណ៍ ហើយនៅពេលនោះក៏មានការប៉ះទង្គិចគ្នាជាមួយខ្មាន់កាំភ្លើងបណ្តាលឱ្យស្លាប់ខ្មាន់កាំភ្លើងម្នាក់ ៕
ចែករំលែកព័តមាននេះ