រាជធានីភ្នំពេញ៖ ការប្រើសំឡេងរំខានដោយយោធាថៃ ជាការបង្ហាញអំពីភាពក្មេងខ្ចីរបស់យោធាថៃក្នុងការគោរពច្បាប់ និងដំណើរការសន្តិភាព ។ នេះបើតាមការលើកឡើងរបស់នាយកមជ្ឈមណ្ឌលឯកសារកម្ពុជា ។ លោក ឆាំង យុ…
រាជធានីភ្នំពេញ៖ ការប្រើសំឡេងរំខានដោយយោធាថៃ ជាការបង្ហាញអំពីភាពក្មេងខ្ចីរបស់យោធាថៃក្នុងការគោរពច្បាប់ និងដំណើរការសន្តិភាព ។ នេះបើតាមការលើកឡើងរបស់នាយកមជ្ឈមណ្ឌលឯកសារកម្ពុជា ។
លោក ឆាំង យុ នាយកមជ្ឈមណ្ឌលឯកសារកម្ពុជាបានលើកឡើងបណ្តាញសង្គមថា វប្បធម៌ត្លុកកំប្លែង និងគោលនយោបាយមុខពីររបស់ថៃ ការប្រើសំឡេងរំខានដោយយោធាថៃ គឺជាការបំភិតបំភ័យផ្លូវចិត្ត និងយាយីលើជនស៊ីវិលកម្ពុជា កំពុងរស់នៅតាមព្រំដែន ដែលនេះ គឺមិនមែនជាសញ្ញាយុទ្ធសាស្ត្រយោធាប្រកបដោយភាពច្នៃប្រឌិតនោះទេ ប៉ុន្តែជាការបង្ហាញអំពីភាពក្មេងខ្ចីរបស់យោធាថៃក្នុងការគោរពច្បាប់ និងដំណើរការសន្តិភាព។
លោកថា លក្ខណៈសម្គាល់យោធាដែលមានវិជ្ជាជីវៈ និងភាពចាស់ទុំ គឺការប្រកាន់ខ្ជាប់នូវ
វិន័យ តម្លៃជាយោធា និងការគោរពនីតិរដ្ឋ ។ រចនាសម្ព័ន្ធយោធាណា ដែលយាយីលើជនស៊ីវិលស្លូតត្រង់ គឺមិនបានអនុវត្តទៅតាមស្ដង់ដាយោធាលំដាប់ពិភពលោកនោះទេ ។ ពោល គឺយោធាទាំងនោះ កំពុងទទួលយកអត្តចរិត និងស្តង់ដាក្រុមមិនស្របច្បាប់ ដែលស្ថិតនៅក្រៅព្រំដែននៃស្ថាប័នវិជ្ជាជីវៈ ដូចជាអ្នកលេង ជនពាល ចោរប្លន់ ឬជនល្មើសច្បាប់ជាដើម ។
លោកនាយកបានគូសបញ្ជាក់ថា«យើងគួរតែថ្កោលទោសចំពោះអត្តចរិតក្មេងខ្ចីមិនសមរម្យរបស់អ្នកជិតខាងយើង ហើយយើងគួរតែឆ្លើយតបដោយការតាំងចិត្តដ៏ឱឡោរិក និងសេចក្តីថ្លៃថ្នូរថា ប្រជាជាតិកម្ពុជា មិនប្រព្រឹត្តទង្វើដោយគ្មានការទទួលខុសត្រូវបែបនេះទេ ហើយយើងក៏មិនរាថយដោយសារទង្វើក្មេងខ្ចីរបស់យោធាថៃបែបនេះដែរ»។
យោធាថៃបន្តយុទ្ធនាការ «បំភិតបំភ័យផ្លូវចិត្ត»របស់ខ្លួននៅយប់ទី២ ដោយបានបន្លឺសំឡេងរំខានតាមព្រំដែន នៅចំណុចភូមិសាស្ត្រ ប្រទេសកម្ពុជា ស្ថិតក្នុងភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
រូបភាពរថយន្តថៃ (ឬរថយន្តដឹកទំនិញថៃ) ដែលមានលក្ខណៈ ពិសេសបង្ហាញអំពីវប្បធម៌របស់រថយន្តដឹកទំនិញនៅក្នុងប្រទេសថៃដោយមានបំពាក់ឧបករណ៍បំពងសំឡេង ដែលត្រូវបានប្រើប្រាស់ ដើម្បីបង្កការរំខានដល់អ្នកភូមិព្រៃចាន់ និងអ្នកភូមិជោគជ័យ ក្នុងទម្រង់ជាសង្គ្រាមចិត្តសាស្ត្រ ៕
ចែករំលែកព័តមាននេះ