ខេត្តកណ្តាល ៖ បានទៅយកព័ត៌មានដល់ទីតាំងបឹងធម្មជាតិ១កន្លែង ហៅបឹងបបុស្ស ស្ថិតនៅចំណុចរួមនៃសង្កាត់ព្រែកអំពិល និងសង្កាត់ព្រែក លួង ក្រុងអរិយក្សត្រ ដែលប្រជាពលរដ្ឋធ្លាប់អាស្រ័យ ផល…
ខេត្តកណ្តាល ៖ បានទៅយកព័ត៌មានដល់ទីតាំងបឹងធម្មជាតិ១កន្លែង ហៅបឹងបបុស្ស ស្ថិតនៅចំណុចរួមនៃសង្កាត់ព្រែកអំពិល និងសង្កាត់ព្រែក លួង ក្រុងអរិយក្សត្រ ដែលប្រជាពលរដ្ឋធ្លាប់អាស្រ័យ ផល រកត្រី ក្តាម ខ្យង និងបេះបន្លែប្រកបរបរដើម្បីចិញ្ចឹមជីវិតរាប់ជំនាន់មកហើយ ពេលនេះក្លាយជាកម្មសិទ្ធិស្របច្បាប់ទៅហើយរបស់ឈ្មោះភឺន ផល្លី មានទំហ៉ុជិត១០ហិកតា ហើយកំពុងចាក់ខ្សាច់លុបធ្វើជាកម្មសិទ្ធិបានប្រមាណ៥០ភាគរយហើយ ធ្វើឱ្យពលរដ្ឋភ្ញាក់ផ្អើលនិយាយតៗគ្នា ។
នៅពេលដែលរឿងរ៉ាវនៃការចាក់ដីលុបបឹងធម្មជាតិដ៏ធំនេះត្រូវបានបែកធ្លាយ ធ្វើឱ្យប្រជាពលរដ្ឋភ្ញាក់ផ្អើលមិនតិចទេ ខ្សិបពីមួយទៅមួយមិនអស់ចិត្ត ។ យ៉ាងណាក៏ដោយ គេមិន ដឹងថា តើករណីចាក់ដីលុបបឹងធម្មជាតិនេះ មានការដឹងឮពីថ្នាក់ជាតិដែរឬទេ? ដែលប្រការនេះទាមទារឲ្យថ្នាក់ជាតិស៊ើបអង្កេតរឿងនេះឲ្យ បានច្បាស់លាស់ និងផ្សព្វផ្សាយឱ្យពលរដ្ឋក្នុងតំបន់បានដឹងឮគ្រប់គ្នាផង ដែលកោះសន្តិភាពសន្យាយកមកផ្សាយជូនអ្នកស្រុកអរិយក្សត្រឱ្យបានជ្រាប ។
ប្រជាពលរដ្ឋដែលធ្លាប់ចេញ-ចូលអាស្រ័យផល បានឲ្យដឹងថា៖ ដំបូងឡើយអាជ្ញាធរនៃរដ្ឋក្រុងអរិយក្សត្រ បាននាំគ្នាធ្វើសកម្មភាពប្រកាសប្រមែលប្រមូលពលរដ្ឋឲ្យផ្តិតមេដៃ ក្រោមលេសថា ដើម្បីស្តារបាតបឹងផ្ទុកទឹកដើម្បីស្រោចស្រពផលដំណាំ តែការពិតត្រូវបានបែក ធ្លាយថាផ្តិតមេដៃលក់បឹងឲ្យឈ្មួញទៅវិញ។ អ្នកស្រុកនៅតែនិយាយបែបនេះរហូតមក ប៉ុន្តែមិនហ៊ានធ្វើសកម្មភាពទេ ខ្លាចនៅមិនសុខ ។
បន្ទាប់ពីប្រមូលស្នាមមេដៃប្រជាពលរដ្ឋ នៅក្នុងមូលដ្ឋានរួចហើយ មកដល់ពេលនេះគេសង្កេតឃើញថា បឹងធម្មជាតិនេះ កំពុងមានការបូមខ្សាច់យ៉ាងមមាញឹកទាំង យប់ទាំងថ្ងៃ ដើម្បីចាក់លុបផ្ទៃបឹងនេះទាំងមូល។ រីឯប្រជាពលរដ្ឋនៅក្នុងមូលដ្ឋានទាំងនោះបានត្រឹមតែយកដៃរឹតដើមទ្រូងស្រណោះស្រណោកបឹងធម្មជាតិនេះតែប៉ុណ្ណោះ ព្រោះបាត់បង់ការរកអាស្រ័យផល ។
ជុំវិញករណីខាងលើលោកគន់ សុគឿន ចៅសង្កាត់ព្រែកលួងបានអោយកោះសន្តិភាពដឹងថាលោកមិនបានស៊ីញ៉េឯកសារពាក់ពន្ធ័អ្វីទាំងអស់ចំពោះប្លង់កម្មសិទ្ធដីបឹងបបុស្សនេះ លោកថាសូមអ្នកកាសែតសួរទៅខាងភូមិបាលទៅ គឺជារឿងរបស់ថ្នាក់លើ។
ចំណែកលោកចាន់ដារ៉ាចៅហ្វាយក្រុងអរីយក្សត្របានត្រឹមតែប្រាប់អ្នកកាសែតថាជួបគ្នាផ្ទាល់បានស្រួលនិយាយ ប៉ុន្តែកោះសន្តិភាពមិនបានទៅជួបទេ…។
ជាចុងក្រោយ ប្រជាពលរដ្ឋរស់នៅតំបន់នោះសំណូមពរប្រាប់កោះសន្តិភាព យ៉ាងទទូចជូនលោក គួច ចំរើន អភិបាលខេត្តកណ្ដាល ក៏ដូចជាស្ថាប័នជាតិពាក់ព័ន្ធ ដើម្បីជួយដឹងឮប៉ុណ្ណោះ ។
បន្ទាប់ពីកោះសន្តិភាពនៅរាជធានីភ្នំពេញ សុំមតិទៅលោកអភិបាលខេត្តកណ្តាលមក ដើម្បីសុំការបំភ្លឺខ្លះៗ ស្តីពីការចាក់ដីលុបបឹងបបុស្សដ៏មហិមានេះ លោកអភិបាលខេត្តបានបំភ្លឺតាមសេចក្តីរាយការណ៍មួយរបស់ថ្នាក់ក្រោមខេត្ត ដែលយើងយកមកចុះផ្សាយអមជាមួយរឿងរ៉ាវខាលើដូចតទៅ ដែលកោះសន្តិភាពមិនធ្វើអត្ថាធិប្បាយបន្ថែមណាមួយឡើយ…ព្រោះស្ទើរតែពុំមានវាចានឹងថ្លែងទេ ។
ប៉ុន្តែរឿងចាក់ដីលុបនេះ ពិតជាចាក់លុបបឹងបបុស្សយ៉ាងពិតប្រាកដមែនប្រមាណជិត១០ហិកតា មិនមែនជាង៣ហិកតារបស់អ្នកដទៃ ក្រៅពីបឹងបបុស្សដ៏អស្ចារ្យដែលថ្នាក់មូលដ្ឋានរាយការណ៍ជូនខេត្តនេះទេ…សូមជ្រាប…ហេ! ហេ! ។
សេចក្តីបំភ្លឺបញ្ជូនមកពីខេត្តកណ្តាល
សូមគោរពរាយការណ៍ជូន ឯកឧត្ដម អភិបាល នៃគណៈអភិបាលខេត្ដ មេត្ដាជ្រាបដ៏ខ្ពង់ខ្ពស់អំពីករណីសារព័ត៌មាន កោះសន្ដិភាព បានចុះផ្សាយថា «មានការតវ៉ាពីប្រជាពលរដ្ឋ ដោយមានបុគ្គល បូមខ្សាច់ចាក់លើដីទំហំប្រមាណ ១០ហិកតា (ចំណុចបឹងបបុស្ស) លើដីអាស្រ័យផលរបស់ពួកគាត់ ដែលមានទីតាំងស្ថិតភូមិព្រែកអំពិល សង្កាត់ព្រែកអំពិល ក្រុងអរិយក្សត្រ ខេត្ដកណ្ដាល» ដូចខាងក្រោម៖ – តាមការចុះពិនិត្យ និងអះអាងពីអាជ្ញាធរមូលដ្ឋាន បានឱ្យដឹងថា ចំណុចដីដែលបូមខ្សាច់ដើម្បីចាក់បំពេញដីនោះ គឺស្ថិតនៅចំណុចដីរបស់ឈ្មោះ សុខ ឈួង ដែលមានបង្កាន់ដៃចុះបញ្ជីជាប្រព័ន្ធ (ក្បាលដីលេខ ១៦៤១, ១៦៣៩, ១៦៣៤, ១៥៩៤, ១៥៩៣ និងលេខ ១៦៣៤)។ ដីនេះ ឈ្មោះ សុខ ឈួង បានទិញពីប្រ/ជ មានទទួលដឹងឮដល់ស្រុក និងបានបង់ពន្ធប្រថាប់ត្រាផងដែរ។
– រដ្ឋបាលក្រុងអរិយក្សត្រ បានបញ្ជាក់ថា ទីតាំងចាក់ខ្សាច់ខាងលើ គឺមានលិខិតអនុញ្ញាតឱ្យចាក់ដី-ខ្សាច់ ចំនួន ៤លិខិត លើផ្ទៃដីសរុបទំហំ ៣ហិកតា ៥០៤០ម៉ែត្រការ៉េ ពីរដ្ឋបាលក្រុងអរិយក្សត្រ។ -ទន្ទឹមនេះ អាជ្ញាធរក្រុង-សង្កាត់ រាយការណ៍ថា ពុំមានការតវ៉ាពីប្រជាពលរដ្ឋ ចំពោះការរបូមខ្សាច់/ចាក់បំពេញដីនោះទេ។ – ផ្អែកតាមនេះ ទីតាំងចាក់ខ្សាច់ គឺមិនស្ថិតនៅចំណុចបឹងបប្សុសនោះទេ ដោយមានចម្ងាយប្រហែល ១០០ម៉ែត្រ ពីចំណុចបឹងបប្សុស។ អាស្រ័យដូចបានគោរពជម្រាបជូនខាងលើ សូម ឯកឧត្ដម អភិបាល នៃគណៈអភិបាលខេត្ដ មេត្ដាជ្រាបជារបាយការណ៍ដ៏ខ្ពង់ខ្ពស់។ សូម ឯកឧត្ដម មេត្ដាទទួលនូវការគោរពដ៏ខ្ពង់ខ្ពស់អំពីខ្ញុំ។
ព័ត៌មានបន្ថែមនឹងមានផ្សាយបន្តនៅលើកាសែតកោះសន្តិភាព ៕
ចែករំលែកព័តមាននេះ