រាជធានីភ្នំពេញ ៖ មនុស្សមានពិការភាពមានចំនួនច្រើនគួរឱ្យកត់សម្គាល់នៅក្នុងពិភពលោក ។ បើទោះបីជាបងប្អូនខ្លះ ជាមនុស្សមានពិការភាព តែគាត់មានលក្ខណៈពិសេស និងសមត្ថភាពដ៏រឹងមាំ ដែលយើងគួរតែឱ្យតម្លៃ និងទទួលស្គាល់…
រាជធានីភ្នំពេញ ៖ មនុស្សមានពិការភាពមានចំនួនច្រើនគួរឱ្យកត់សម្គាល់នៅក្នុងពិភពលោក ។ បើទោះបីជាបងប្អូនខ្លះ ជាមនុស្សមានពិការភាព តែគាត់មានលក្ខណៈពិសេស និងសមត្ថភាពដ៏រឹងមាំ ដែលយើងគួរតែឱ្យតម្លៃ និងទទួលស្គាល់ ជាជាងផ្តោតតែលើភាពខ្វះខាតរបស់ពួកគេ ។ ព្រោះមនុស្សម្នាក់ៗសុទ្ធតែមានចំណុចខ្លាំងរៀងៗខ្លួន ។
យោងតាមអង្គការសុខភាពពិភពលោកបានឱ្យដឹងថា ៖ ជនមានពិការភាពមានចំនួន១៦ភាគរយ នៃប្រជាជនពិភពលោក ។ អ្វីដែលស្មានមិនដល់នោះ ទោះបីជាបងប្អូនគាត់ជាជនមានពិការភាពក្តី ក៏គាត់មានភាពខ្លាំង និងគុណសម្បត្តិជាច្រើនដែលកើតចេញពីបទពិសោធន៍ប្លែកៗរបស់ពួកគេ ក្នុងការរស់នៅ និងសម្របខ្លួនទៅនឹងឧបសគ្គនៅក្នុងពិភពលោកផងដែរ ដោយជំនួសឱ្យការផ្តោតលើអ្វីដែលពួកគេ មិនអាចធ្វើបាន វាជារឿងសំខាន់ ក្នុងការទទួលស្គាល់នូវសមត្ថភាពពិសេសៗរបស់ពួកគេ ។
ជាក់ស្តែងនៅក្នុងកម្មវិធីសិក្ខាសាលា នាថ្ងៃទី០៧ ខែតុលា ឆ្នាំ២០២៥ ស្តីពី«ការលើកកម្ពស់សមភាពពិការភាពក្នុងប្រព័ន្ធផ្សព្វផ្សាយ» ដែលរៀបចំឡើងអង្គការមណ្ឌលព័ត៌មានស្ត្រីកម្ពុជា និងអង្គការជនពិការកម្ពុជា នៅសណ្ធាគារកាំបូឌីយ៉ា ។
នៅក្នុងកម្មវិធីនេះដែរ លោក ស្លេះ អាល់ហ្វីន អនុរដ្ឋលេខាធិការក្រសួងព័ត៌មាន បានមានប្រសាសន៍ថា ពិការភាពមិនមែនជាបញ្ហាបុគ្គលទេ ប៉ុន្តែជាបញ្ហាសង្គមដែលអាចដោះស្រាយបានដោយមានការចូលរួមរបស់យើងទាំងអស់គ្នា ។ ក្នុងនាមជាក្រុមមួយសង្គមមួយដែលងាយរងគ្រោះបំផុតនៅលើពិភពេលោក ។ ទោះយ៉ាងណា ពួកគេច្រើនត្រូវបានគេមើលរំលង និងផាត់ចេញជាប្រព័ន្ធពីវិសាលភាពផ្សាយនៃប្រព័ន្ធផ្សព្វផ្សាយ ។ ក្នុងករណីកម្រ ដែលពួកគេត្រូវបានរាប់បញ្ចូល ការពណ៌នាអំពីពួកគេច្រើនតែមានបង្កប់ផ្នត់គំនិត ។ ការណ៍នេះជះផលអវិជ្ជមានដល់ការរយល់ឃើញជាសាធារណៈ ហើយក្នុងរយៈពេលវែង មិនត្រឹមតែប៉ះពាល់ដល់ជីវិតរស់នៅប្រចាំថ្ងៃរបស់ជនមានពិការភាពប៉ុណ្ណោះទេ ប៉ុន្តែថែមទាំងបដិសេធការទទួលបានសិទ្ធិរបស់ពួកគេទៀតផង ។
លោកបានបន្ថែមទៀតថា ៖ ប្រព័ន្ធផ្សព្វផ្សោយមានតួនាទីលុបបំបាត់ឧបសគ្គ ដើម្បីឱ្យប្រជាពលរដ្ឋទាំងអស់ រួមទាំងជនមានពិការភាពអាចអនុវត្តសិទ្ធិ និងសេរីភាពរបស់ពួកគេបានយ៉ាងពេញលេញ និងរួមចំណែកដល់សង្គមដែលកាន់តែមានបរិយាបន្ន ។
បន្ថែមពីនេះទៀត លោកស្រីសាវតា ច័ន្ទគ្រឹស្នា នាយិកាប្រតិបត្តិនៃអង្គការមណ្ឌលព័ត៌មានស្ត្រីកម្ពុជា(WMC) បានលើកឡើងថា សិក្ខាសាលានេះនឹងជួយជំរុញឱ្យអ្នកសារព័ត៌មានបង្កើតបណ្ដាញផ្សព្វផ្សាយដែលប្រកបដោយភាពច្រមុះ សមភាព និងបរិយាបន្នស្របតាមគោលការណ៍ មិនទុកឱ្យនរណាម្នាក់ចោលឡើយ (Leave No One Behind) ។ ការអភិវឌ្ឍន និងកំណើនសេដ្ឋកិច្ចត្រូវតែផ្តល់ផលប្រយោជន៍ដល់ មនុស្សគ្រប់រូប ដោយគ្មានការរើសអើង ឬទុកចោលក្រុមណាមួយឡើយ ទោះបីជាពួកគេស្ថិតក្នុងស្ថានភាពលំបាក ឬងាយរងគ្រោះបំផុតក៏ដោយ ។
សូមបញ្ជាក់ថា ជនមានពិការភាព មិនមែនជាបន្ទុក ឬជនដែលគួរឱ្យអាណិតនោះទេ ប៉ុន្តែពួកគេជា កម្លាំងដ៏សំខាន់ មួយរបស់សង្គមជាតិ ។ ជាមួយនឹងចំនួនប្រមាណ១៦ ភាគរយ នៃប្រជាជនពិភពលោក ពួកគេតំណាងឱ្យក្រុមដ៏ធំមួយដែលមានសមត្ថភាព និងបទពិសោធន៍ប្លែកៗ ដែលអាចចូលរួមចំណែកយ៉ាងធំធេងក្នុងការអភិវឌ្ឍសេដ្ឋកិច្ច និងសង្គម ៕
ចែករំលែកព័តមាននេះ