រាជធានីភ្នំពេញ ៖ រយៈពេលជាង២ឆ្នាំមកនេះ ក្នុងនីតិកាលទី៧នៃរដ្ឋសភា កម្ពុជាបានបណ្ដេញចេញនូវជនបរទេសពាក់ព័ន្ធបទល្មើសអនឡាញជាង១៥០០០នាក់រួចទៅហើយ។នេះបើតាមការបញ្ជាក់របស់ឯកឧត្តមឧបនាយករដ្ឋមន្ដ្រី ស សុខា រដ្ឋមន្ដ្រីក្រសួងមហាផ្ទៃ។ ថ្លែងបើកសិក្ខាសាលាស្ដីពីការផ្លាស់ប្ដូរបទពិសោធន៍ ក្នុងការប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា…
រាជធានីភ្នំពេញ ៖ រយៈពេលជាង២ឆ្នាំមកនេះ ក្នុងនីតិកាលទី៧នៃរដ្ឋសភា កម្ពុជាបានបណ្ដេញចេញនូវជនបរទេសពាក់ព័ន្ធបទល្មើសអនឡាញជាង១៥០០០នាក់រួចទៅហើយ។នេះបើតាមការបញ្ជាក់របស់ឯកឧត្តមឧបនាយករដ្ឋមន្ដ្រី ស សុខា រដ្ឋមន្ដ្រីក្រសួងមហាផ្ទៃ។
ថ្លែងបើកសិក្ខាសាលាស្ដីពីការផ្លាស់ប្ដូរបទពិសោធន៍ ក្នុងការប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា និងការសម្អាតប្រាក់ នៅព្រឹកថ្ងៃទី៨ ខែតុលា ឆ្នាំ២០២៥ នាទីស្ដីការក្រសួងមហាផ្ទៃ ឯកឧត្តមឧបនាយករដ្ឋមន្ដ្រី ស សុខា បានថ្លែងរំលឹកថា កាលពីអាណត្តិទី៦ កម្ពុជាក៏បានបណ្ដេញចេញនូវបរទេសពាក់ព័ន្ធបទល្មើសអនឡាញជាង ២១០០០នាក់ ក្នុងមួយអាណត្តិ ។
ជាមួយគ្នានោះដែរ ឯកឧត្តមប្រមុខក្រសួងមហាផ្ទៃបានបញ្ជាក់ថា «ក្នុងអាណត្តិទី៦ ក្រោមការដឹកនាំរបស់សម្ដេចតេជោ ហ៊ុន សែន អតីតនាយករដ្ឋមន្ដ្រី ព្រមទាំងសម្ដេចក្រឡាហោម ស ខេង យើងបានបណ្ដេញចេញជនបរទេសដែលពាក់ព័ន្ធអនឡាញជាង ២១០០០នាក់ ក្នុងមួយអាណត្តិ ។ ដោយឡែក ក្នុងនីតិកាលទី៧នេះ គិតត្រឹមជាង២ឆ្នាំ នៃដើមអាណត្តិទី៧នេះ យើងបានបណ្ដេញចេញប្រមាណជាង ១៥០០០នាក់រួចទៅហើយ»។
ប្រមុខក្រសួងមហាផ្ទៃបន្ដថា ការបណ្ដេញជនបរទេសទាំងនេះ បានឆ្លុះបញ្ចាំងឱ្យឃើញថា រាជរដ្ឋាភិបាលនីតិកាលទី៧ បានយកចិត្តទុកដាក់ខ្ពស់ ទៅលើកិច្ចការងារបទល្មើសអនឡាញ ។
ប្រមុខដឹកនាំក្រសួងមហាផ្ទៃកម្ពុជាក៏បានលើកឡើងថា កិច្ចការងារបង្ក្រាបបទល្មើសអនឡាញ មិនមែនតែកម្ពុជាម្នាក់ឯងទទួលខុសត្រូវនោះទេ ដូច្នេះ ប្រមុខក្រសួងមហាផ្ទៃកម្ពុជាបានស្នើដល់បណ្ដាប្រទេសនានាស្វែងយល់ពីគ្នាទៅវិញទៅមក ដើម្បីរួមបង្ក្រាបបទល្មើសអនឡាញ។
បើតាមឯកឧត្តមរដ្ឋមន្ត្រីក្រសួងមហាផ្ទៃកម្ពុជាបានឲ្យដឹងថា ការវិវត្តន៍នៃការឆបោកបទល្មើសអនឡាញមានភាពជឿនលឿន បើធៀបនឹង ៥ឆ្នាំមុន គឺមានលក្ខណៈខុសគ្នា។ ការឆបោកបទល្មើសអនឡាញ សម្រាប់ប្រទេសកម្ពុជា មិនមែនជាទីផ្សារសម្រាប់ក្រុមឧក្រិដ្ឋជននោះទេ គឺពិភពលោក ដូច្នេះ ត្រូវមានការចូលរួមទប់ស្កាត់ពីគ្រប់ភាគីពាក់ព័ន្ធ។
ឯកឧត្តមបានបន្ថែមថា «ពេលមុខនេះ មានលក្ខណៈទីប្រជុំជន (ឆបោកអនឡាញ) មានន័យថា មួយកន្លែងៗច្រើននាក់។ ប៉ុន្ដែមកដល់នេះ គាត់បែងចែកជាដុំតូចៗ» ៕
ចែករំលែកព័តមាននេះ