ទីក្រុងប៉ារីស៖ ប្រធានាធិបតីបារាំង លោកម៉ាក្រុង កំពុងប្រឈមនឹងសម្ពាធកាន់តែខ្លាំងដែលតម្រូវឱ្យលោកមានជម្រើស២ដែលអាចទៅរួច ទី១ត្រូវលាលែងពីតំណែង និងទី២រៀបចំការបោះឆ្នោតជ្រើសតាំងអ្នកតំណាងរាស្ត្រជាថ្មីដើម្បីបិទបញ្ចប់វិបត្តិនយោបាយដែលជំរុញឱ្យនាយករដ្ឋមន្ត្រីលាលែងពីតំណែងអស់៥នាក់ត្រឹមតែរយៈពេលមិនដល់២ឆ្នាំស្រួលបួលផង។
មេដឹកនាំឆ្វេងនិយមកណ្ដាលវ័យ៤៧ឆ្នាំរូបនេះនៅតែបញ្ជាក់ជាថ្មីថាលោកនឹងបន្តកាន់អំណាចរហូតដល់ចប់អាណត្តិឆ្នាំ២០២៧។ ប៉ុន្តែការអំពាវនាវឱ្យលោកចុះចេញពីតំណែងមានកាន់តែច្រើនឡើងៗពីគ្រប់និន្នាការនយោបាយ។ នេះជាវិបត្តិដ៏ធំមិនធ្លាប់មានចាប់តាំងពីឆ្នាំ១៩៥៨។ នៅថ្ងៃអង្គារនេះ លោកឡឺគ័រនូ ដែលជានាយករដ្ឋមន្ត្រីលាលែងពីតំណែងកាលពីម្សិលមិញ បានបើកកិច្ចប្រជុំលើកចុងក្រោយនៅក្នុងគណៈរដ្ឋមន្ត្រីថ្មី។
ទន្ទឹមនឹងនោះ អតីតនាយករដ្ឋមន្ត្រីបារាំងកាលពីជំនាន់លោកម៉ាក្រុងកាន់អំណាចអាណត្តិទីមួយ លោកអេដ្វាត ហ្វ៊ីលីព (Edouard Philippe) យល់ថាសភាពការណ៍បានឈានដល់ដំណាក់កាលទុំជោរដែលតម្រូវឱ្យលោកម៉ាក្រុងត្រូវតែសម្រេចចិត្តជ្រើសរើសយកផ្លូវណាមួយដើម្បីបំបែកភាពទ័លច្រក។ ថ្លែងនៅក្នុងបទសម្ភាសជាមួយវិទ្យុបារាំងអ៊ែតេអឹល (RTL) លោកហ្វ៊ីលីពយល់ថាលោកម៉ាក្រុងគួរតែលាលែងពីតំណែងតាមសម្រួលដើម្បីឱ្យប្រទេសជាតិចាកផុតពីវិបត្តិ។
លោកហ្វ៊ីលីពជាមនុស្សម្នាក់ទៀតដែលបង្ហាញជំហរផ្ទុយពីលោកម៉ាក្រុង។ លោកជាមនុស្សទី២នៅក្នុងចំណោមអតីតនាយករដ្ឋមន្ត្រីបារាំងជំនាន់លោកម៉ាក្រុងដែលបង្ហាញជំហរបែបនេះ។ លោកកាព្រីយែល អាតាល់ (Gabriel Attal) ដែលជាអ្នកស្មោះស្ម័គ្រនឹងលោកម៉ាក្រុង និងធ្លាប់ធ្វើជានាយករដ្ឋមន្ត្រីបានប៉ុន្មានខែកាលពីឆ្នាំ២០២៤។ លោកក៏បង្ហាញជំហរផ្ទុយពីលោកម៉ាក្រុងផងដែរ និងនិយាយរិះគន់លោកម៉ាក្រុងដោយត្រង់ៗតែម្ដង។
លោកអាតាល់ថ្លែងថាមិនខុសពីប្រជាជនបារាំងទូទៅនោះទេ លោកមិនយល់ទាល់តែសោះថាតើលោកម៉ាក្រុងសម្រេចចិត្តបែបណា។ លោកថ្លែងដូច្នេះបន្ទាប់ពីលោកម៉ាក្រុងប្រាប់ឱ្យលោកឡឺគ័រនូនិយាយជាមួយក្រុមប្រឆាំងដើម្បីចរចាគ្នា។ លោកគ័រនូមានពេល២ថ្ងៃដើម្បីដើរកៀរគរសហមតិពីក្នុងចំណោមគណបក្សនយោបាយនានា។ ប៉ុន្តែផ្ទុយពីលោកហ្វ៊ីលីពដែលចង់ឱ្យលោកម៉ាក្រុងចុះពីតំណែង លោកអាតាល់មិនគាំទ្រគំនិតនេះទេ។
លោកឡឺគ័រនូទើបតែជជែកគ្នាជាមួយមន្ត្រីធំៗរបស់គណបក្សនៅក្នុងរដ្ឋាភិបាលចម្រុះជាមួយគ្នា និងជាមួយក្រុមអភិរក្សនិយម។ ពួកគេយល់ស្របគ្នាថាសំខាន់ត្រូវតែរកវិធីដោះស្រាយបញ្ហាថវិកាសម្រាប់ប្រើប្រាស់នៅឆ្នាំ២០២៦។ លោកឡឺគ័រនូត្រៀមពិភាក្សាជាមួយក្រុមប្រឆាំងនៅល្ងាចថ្ងៃអង្គារ និងព្រឹកថ្ងៃពុធ។ ប៉ុន្តែគណបក្សស្ដាំនិយមជ្រុល សមាជជាតិ ថ្លែងថាពួកគេគ្មានការចាំបាច់ដើម្បីពិភាក្សាជាមួយលោកឡឺគ័រនូទេ។ នេះបើយោងតាមការផ្សាយរបស់ឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ