ខេត្តសៀមរាប ៖ ក្រុមមន្ដ្រីទេសចរណ៍បានថ្លែងថា មគ្គុទ្ទេសក៍ទេសចរណ៍និយាយភាសាកូរ៉េទាំងអស់ដែលកំពុងធ្វើសកម្មភាពជូនភ្ញៀវទេសចរជនជាតិកូរ៉េនៅតាមប្រាសាទបុរាណ ឬតំបន់រមណីយដ្ឋានប្រវត្ដិសាស្ដ្រនានា នឹងតម្រូវឱ្យមកចូលរៀនក្នុងវគ្គបណ្ដុះបណ្ដាលពិសេសមួយដែលមានរយៈពេលពីរសប្ដាហ៍ បើពុំដូច្នេះអាជ្ញាបណ្ណ័របស់ពួកគេនឹងមិនអាចបន្ដទៀតបានទេ។
ថ្លែងនៅក្នុងកិច្ចប្រជុំមួយក្នុងកិច្ចផ្ដួចផ្ដើមបង្កីតឡើងនូវសមាគមទីភ្នាក់ងារទេសចរណ៍កូរ៉េកាលពីព្រឹកថ្ងៃទី១៥ កក្កដា កន្លងទៅនេះ លោកង៉ូវ សេងកាក់ ប្រធានមន្ទីរទេសចរណ៍ខេត្ដមានប្រសាសន៍ថា នាពេលអនាគតដ៏ខ្លីខាងមុខនេះ ក្រសួងទេសចរណ៍នឹងរៀបចំវគ្គបណ្ដុះបណ្ដាល ពិសេសមួយរយៈពេលពីរសប្ដាហ៍ សម្រាប់ឱ្យក្រុមមគ្គុទ្ទេសក៍ទេសចរណ៍និយាយភាសាកូរ៉េដែលកំពុងតែប្រតិបត្ដិការនៅតាមទីភ្នាក់ងារទេសចរណ៍កូរ៉េទាំងអស់ចូលរៀនបន្ថែម។ លោកបានបន្ដថា វគ្គបណ្ដុះបណ្ដាលដ៏មានសារសំខាន់នេះធ្វើឡើងក្នុងគោលបំណងពង្រឹងនូវសុវត្ថិភាពមគ្គុទ្ទេសក៍ទេសចរណ៍ភាសាកូរ៉េ ទាំងជនជាតិកូរ៉េទាំងជនជាតិខ្មែរ ឱ្យយល់ដឹងបន្ថែមទៀតនូវពាក្យបច្ចេកទេសថ្មីៗ ប្រវត្ដិសាស្ដ្រ វប្បធម៌ អរិយធម៌ ប្រពៃណីទំនៀមទម្លាប់របស់ខ្មែរ ជៀសវាងការបកស្រាយខុសការពិត។ បើអ្នកណាមិនបានមកទទួលវគ្គបណ្ដុះបណ្ដាលនោះ យើងនឹងមិនបន្ដចេញអាជ្ញាប័ណ្ណឱ្យដើរបកស្រាយជូនភ្ញៀវទៀតទេ ។
គួររំលឹកថា កាលពីពេលថ្មីៗកន្លងទៅមានការបញ្ចេញជាទស្សនៈបែបស្ដីបន្ទោសនិងរិះគន់មួយពីអ្នកនយោបាយ និងក្រុមអ្នកប្រវត្ដិសាស្ដ្រខ្មែរទៅលើក្រសួងទេសចរណ៍ ជុំវិញការអនុញ្ញាតឱ្យមានមគ្គុទ្ទេសក៍ទេសចរណ៍ជាជនជាតិកូរ៉េ ដែលនាំមកនូវការព្រួយបារម្ភអំពីកំហុសឆ្គងនៃការបកស្រាយខុសប្រវត្ដិសាស្ដ្រខ្មែរ និងជាពិសេសធ្វើឱ្យបាត់បង់ឱកាសសម្រាប់ជនជាតិខ្មែរក្នុងការស្រូបយកចំណូលបានមកពីវិស័យទេសចរណ៍នេះ។ ប៉ុន្ដែការរិះគន់របៀបស្ដីបន្ទោសទាំងអស់នេះត្រូវបានលោកថោង ខុន រដ្ឋមន្ដ្រីក្រសួងទេសចរណ៍មានប្រសាសន៍បកស្រាយទៅវិញថា ការអនុញ្ញាតចេញអាជ្ញាប័ណ្ណបណ្ដោះអាសន្នឱ្យទៅជនជាតិកូរ៉េដើរបកស្រាយជូនភ្ញៀវកូរ៉េនោះ គឺជាយុទ្ធសាស្ដ្រដោះស្រាយវិបត្ដិចំពោះមុខ ខណៈភ្ញៀវទេសចរជនជាតិកូរ៉េសម្រុកចូលមកស្រុកខ្មែរយ៉ាងគំហុក ហើយកម្ពុជាពុំមានធនធានមនុស្សគ្រប់គ្រាន់សម្រាប់ឆ្លើយតបភ្លាមៗ ។
ថ្លែងនៅក្នុងកិច្ចប្រជុំមួយក្នុងកិច្ចផ្ដួចផ្ដើមបង្កីតឡើងនូវសមាគមទីភ្នាក់ងារទេសចរណ៍កូរ៉េកាលពីព្រឹកថ្ងៃទី១៥ កក្កដា នោះដែរ រដ្ឋលេខាធិការក្រសួងទេសចរណ៍លោកជុំ អៀក បានមានប្រសាសន៍ថា ភ្ញៀវទេសចរជនជាតិកូរ៉េបាននាំមកនូវចំណូលយ៉ាងច្រើនដល់ប្រទេសកម្ពុជាទាំងវិស័យឯកជនទាំងរដ្ឋ។ ក្នុងរយៈពេលប្រាំខែដើមឆ្នាំ២០១១ នេះ កម្ពុជាទទួលបានភ្ញៀវទេសចរកូរ៉េចំនួន១៥១.០៥៦នាក់ ស្មើនឹង១២,៦៧ភាគរយនៃចំនួនទេសចរអន្ដរជាតិសរុបដែលមានចំនួន១.១៩១.៧៥៧នាក់ គឺកើនឡើង១៣ភាគរយ បើប្រៀបធៀបនឹងរយៈពេលប្រាំខែដើមឆ្នាំ២០១០ ។
តាមរយៈកំណើនភ្ញៀវទេសចរអន្ដរជាតិចូលមកទស្សនាកម្ពុជា ជាពិសេសខេត្ដប្រវត្ដិសាស្ដ្រសៀមរាបដែលពោរពេញទៅដោយប្រាង្គប្រាសាទបុរាណ ក្នុងនោះមានប្រាសាទអង្គរបេតិកភណ្ឌពិភពលោកដ៏ល្បាញល្បីនោះ បានបង្កើតឱកាសការងារដ៏សម្បូរបែបសម្រាប់ពលរដ្ឋខ្មែរនិងអ្នកវិនិយោគ ហើយក៏មានសេវាកម្មដើរពន្យល់ភ្ញៀវនៅក្នុងតំបន់ប្រាសាទ ឬរមណីយដ្ឋានប្រវត្ដិសាស្ដ្រនានាដែរ។ គិតមកត្រឹមឆ្នាំ២០១១នេះ ព្រះរាជាណាចក្រកម្ពុជាមានមគ្គុទ្ទេសក៍ទេសចរណ៍ប្រមាណជាង៤.០០០នាក់នៅទូទាំងប្រទេស ក្នុងនោះសម្រាប់ខេត្ដប្រវត្ដិសាស្ដ្រសៀមរាបមានចំនួនជាង៣.០០០នាក់ដែលត្រូវបានក្រសួងជ្រើសរើសប្រឡងចូលបណ្ដុះបណ្ដាលជំនាញនេះ និងចេញអាជា្ញប័ណ្ណឱ្យប្រកបអាជីវកម្ម ហើយក្នុងនោះដែរមគ្គុទ្ទេសក៍ផ្នែកភាសាកូរ៉េមានចំនួនប្រមាណ១២០នាក់ ជាជនជាតិកូរ៉េដោយមានជនជាតិខ្មែរអមប្រមាណ១៤០នាក់ ។
ថ្វីបើយ៉ាងដូច្នេះក្ដី លោកង៉ូវ សេងកាក់ ប្រធានមន្ទីរទេសចរណ៍ខេត្ដបានបញ្ជាក់ថា មគ្គុទ្ទេសក៍ទេសចរណ៍ផ្នែកភាសាកូរ៉េជាជនជាតិខ្មែរទាំងអស់នៅមិនទាន់អាចដើរបកស្រាយជូនភ្ញៀវដោយខ្លួនឯងនៅឡើយ គឺមានតែជាង២០នាក់ប៉ុណ្ណោះអាចដើរខ្លួនឯង។ ក្រៅពីនោះជាមគ្គុទ្ទេសក៍អមជនជាតិកូរ៉េ រីឯជនជាតិកូរ៉េចំណេះដឹងផ្នែកប្រវត្ដិសាស្ដ្ររបស់ពួកគេក៏នៅមានការស្រពេចស្រពឹលនៅឡើយ។ ដូច្នេះលោកសូមជូនដំណឹងទៅអស់លោក លោកស្រីដែលជាប្រធាននិងតំណាងទីភ្នាក់ងារទេសចរណ៍កូរ៉េទាំងអស់់ត្រូវបញ្ចូនមគ្គុទ្ទេសក៍របស់ខ្លួនមកចូលរួមក្នុងវគ្គបណ្ដុះបណ្ដាលដែលគ្រោងធ្វើឡើងនៅពេលខាងមុខនេះកុំខាន បើមិនអីុចឹងទេ យើងនឹងមិនបន្ដអាជ្ញាប័ណ្ណឱ្យទៀតឡើយ៕
ចែករំលែកព័តមាននេះ