ប្រទេសឥណ្ឌានិងនេប៉ាល់ ៖ ភ្លៀងបានធ្លាក់យ៉ាងខ្លាំងនៅនេប៉ាល់ និងភាគឦសានឥណ្ឌារយៈពេល៤៨ម៉ោងចុងក្រោយនេះ បណ្ដាលឲ្យមនុស្សស្លាប់ជាង៦០នាក់ ប៉ះពាល់ដល់មនុស្សជាច្រើនទៀត និងបង្កការខូចខាតធំធេង ។ នៅនេប៉ាល់ភ្លៀងបានធ្លាក់ខ្លាំងចាប់ពីថ្ងៃទី៣ តុលា…
ប្រទេសឥណ្ឌានិងនេប៉ាល់ ៖ ភ្លៀងបានធ្លាក់យ៉ាងខ្លាំងនៅនេប៉ាល់ និងភាគឦសានឥណ្ឌារយៈពេល៤៨ម៉ោងចុងក្រោយនេះ បណ្ដាលឲ្យមនុស្សស្លាប់ជាង៦០នាក់ ប៉ះពាល់ដល់មនុស្សជាច្រើនទៀត និងបង្កការខូចខាតធំធេង ។
នៅនេប៉ាល់ភ្លៀងបានធ្លាក់ខ្លាំងចាប់ពីថ្ងៃទី៣ តុលា មក បណ្ដាលឲ្យមនុស្សស្លាប់យ៉ាងតិច៤៤នាក់ ក្នុងនោះ៣៧នាក់ នៅក្នុងស្រុកអ៊ីលឡាមភាគខាងកើតប្រទេសតែមួយគត់ ។ នេះគ្រាន់តែជាតួលេខបណ្ដោះអាសន្ននៅឡើយ។ បណ្ដាអ្នកជួយសង្គ្រោះជួបប្រទះការលំបាកមកពីផ្លូវទាំងឡាយត្រូវស្ទះដោយការលិចទឹក និងការបាក់ដី។
បណ្ដាឧទ្ធម្ភាគចក្រនិងនាវាត្រូវបានប្រមូល សម្រាប់ជម្លៀសបណ្ដាជនរងគ្រោះចេញ។ ប៉ុន្តែប្រតិបត្តិការជួយសង្គ្រោះ ត្រូវបានផ្អាកនាពេលយប់។ ផ្នែកម្ខាងទៀតនៃព្រំដែន ភ្លៀងដែលធ្លាក់ខ្លាំងបំផុតក៏បណ្ដាលឲ្យទឹកជន់លិចតំបន់ដាជីលីញចុងភាគឦសានឥណ្ឌា។
នៅទីនោះកន្លែងខ្លះទឹកជំនន់បានជន់លិចទាំងស្រុង ស្ថិតនៅដាច់ពីពិភពខាងក្រៅ ដោយផ្លូវថ្នល់ទាំងឡាយរងការបំផ្លាញ។ ស្ពានយ៉ាងតិស២បានត្រូវទឹកបុកបាក់ ផ្លូវថ្នល់ជាច្រើននិងតំបន់ដ៏ធំ ត្រូវទឹកជន់លិចទាំងស្រុង ។
ទឹកជំនន់ក៏ប៉ះពាល់ផងដែរដលប្រទេសជាប់ជិតខាងប៊ូតាន ដោយនៅទីនោះកងទ័ពឥណ្ឌាបានជួយជម្លៀសមនុស្សចេញតាមឧទ្ធម្ភាគចក្រក្នុងទីក្រុងជាប់ព្រំដែនPHUENTSHOLING ៕
ចែករំលែកព័តមាននេះ