ឈ្មួញ មន្ត្រី សមត្ថកិច្ច និង អ្នកដែលពាក់់ព័ន្ធនៅដំណាក់កាលនេះទាមទារភាពស្មោះត្រង់និងការប្តេជ្ញាចិត្តខ្ពស់។ បើមិនដូច្នេះទេ ផលប្រយោជន៍និងកិត្តិយសនឹងអាប់ឱន ពីព្រោះតែកត្តាផលប្រយោជន៍បុគ្គលរបស់អស់លោកដឹកមុខនេះឯង ។ តាមការបែកធ្លាយនៅលើបណ្តាញសង្គមនិងសារព័ត៌មាននៅក្នុងស្រុកមួយចំនួន…
ឈ្មួញ មន្ត្រី សមត្ថកិច្ច និង អ្នកដែលពាក់់ព័ន្ធនៅដំណាក់កាលនេះទាមទារភាពស្មោះត្រង់និងការប្តេជ្ញាចិត្តខ្ពស់។ បើមិនដូច្នេះទេ ផលប្រយោជន៍និងកិត្តិយសនឹងអាប់ឱន ពីព្រោះតែកត្តាផលប្រយោជន៍បុគ្គលរបស់អស់លោកដឹកមុខនេះឯង ។
តាមការបែកធ្លាយនៅលើបណ្តាញសង្គមនិងសារព័ត៌មាននៅក្នុងស្រុកមួយចំនួន ទំនិញថៃដែលមានបរិមាណរហូតដល់ទៅជាង៨ពាន់កេស ស្មើនឹងជិត៧៧តោន ត្រូវបានសមត្ថកិច្ចជំនាញចុះបង្ក្រាបបាន សម្រេច ពេលដែលទំនិញទាំងនេះត្រូវបានលួចនាំចូលដោយខុសច្បាប់ពីព្រំដែនធ្លាយមកដល់ឃ្លាំងនៅរាជធានី ភ្នំពេញបាន ។
ប្រភពក៏បានបន្ថែមទៀតថា សមត្ថកិច្ចចម្រុះបានរកឃើញទំនិញទាំងនេះ ជាច្រើនមុខ ដែលមានដូចជា ពពួកប្រហិតសាច់ ប្រហិតដង្កៀបក្តាម ប្រហិតបង្កង ប្រហិតតៅហ៊ូ ជាដើម ។ ទំនិញទាំងនេះ ខ្លះជាទំនិញហួសកាលបរិច្ឆេតប្រើប្រាស់ ទៅទៀត ហើយត្រូវបានប្រភពអះអាងថា ត្រូវបានក្រុមជនខិលខូចលួចនាំចូលដោយខុសច្បាប់ ។
ទំនិញទាំងនេះត្រូវបានគេដឹងថា បានរកឃើញនៅឃ្លាំងមួយកន្លែងនៅម្តុំភូមិទ្រា សង្កាត់ស្ទឹងមានជ័យទី១ ខណ្ឌមានជ័យ ។
អាស្រ័យដោយការបែកធ្លាយនេះ សង្ឃឹមថា យើងទាំងអស់គ្នាគួរតែមានការប្រុងប្រយ័ត្ននៅក្នុងការហូបចុក និង យកទៅប្រើប្រាស់ ដែលមានលក់នៅតាមផ្សារទំនើបនានា ។ ម្យ៉ាងទៀត ពពួកទំនិញទាំងនេះក៏ជាមុខទំនិញ ដែលពលរដ្ឋយើងនិយមទទួលទានផងដែរ ហើយមានលក់នៅតាមដងផ្លូវ តាមរ៉ឺម៉ក លក់អាហារលឿនៗចល័ត តាមហាងស៊ុប ឫហាងប៊ូហ្វេនានា ជាច្រើន។
ដើម្បីសុវត្ថិភាពនិងដើម្បីចូលរួមទប់ស្កាត់ពពួកទំនិញខុសច្បាប់នាំចូលដោយមិនបង់ពន្ធមិនត្រួតពិនិត្យគុណភាពច្បាស់លាស់ យើងទាំងអស់គ្នាគួរតែប្រុងប្រយ័ត្ន មុននឹងសម្រេចចិត្តទទួលទាន ឫទិញយកទៅចម្អិនធ្វើម្ហូបទទួលទាន ។ មុននឹងជាវ គួរតែសួររកប្រភព ហើយពិនិត្យកាលបរិច្ឆេតឲ្យច្បាស់លាស់ ដោយឡែកអ្នកយក ទំនិញនេះមកលក់បន្ត គួរតែប្រុងប្រយ័ត្នដែរ កុំសួររកតែរបស់ថោក គឺគួរសួររកទំនិញដែលត្រឹមត្រូវមានពន្ធ មានការត្រួតពិនិត្យ មានស្តង់ដាដែលស្ថាប័នជំនាញទទួលស្គាល់។
អ្នកដែលនាំចូលគួរតែស្មោះត្រ ហើយងកុំគិតរឿងចំណេញនិងផលប្រយោជន៍ជាធំ ហើយក៏ត្រូវតែយល់និងដឹងកាលៈទេស: និងយល់ដឹងអំពីច្បាប់ ។ ដោយឡែកមន្ត្រីជំនាញនិងសមត្ថកិច្ចដែលពាក់ព័ន្ធ ដែលធ្លាប់ឃុបឃិតលើករណីនេះគួរតែបញ្ឈប់ ហើយចូលរួមទាំងអស់គ្នាទប់ស្កាត់អ្វីដែលខុសច្បាប់ ខុសស្តង់ដា ខុសគុណភាព ឫប្រភេទទំនិញដែលនាំឲ្យពលរដ្ឋមានបញ្ហាសុខភាព ។
អស់លោកជំនាញត្រូវចាំថា នៅពេលដែលអស់លោកបណ្តែតបណ្តោយឲ្យទំនិញទាំងនេះរបូតចូលទីផ្សារ អស់លោកមិនមែនជាអ្នកទទួលទានមែន ប៉ុន្តែកូន ចៅ ឫសាច់ញាតិរបស់អស់លោកគង់តែប៉ះទេ។ ដូច្នេះគួរចូលរួមទប់ស្កាត់ការឃុបឃិតជាមួយនឹងក្រុមមនុស្សដែលខិលខូច ។
ក្រៅពីនោះស្ថាប័នអនុវត្តច្បាប់នានាគួររួមគ្នាវែកមុខក្រុមជនខិលខូចទាំងនេះយកមកផ្តន្ទាទោសឲ្យបាន ខណៈដែលពេលនេះ គឺឃើញឃាត់បានតែទំនិញ ខណៈដែលមនុស្សនិងអ្នកដែលពាក់ព័ន្ធ ហើយជាមេក្លោងករណីនេះមិនដែលឃើញវែកមុខទាល់តែសោះ ។
យើងទាំងអស់គ្នាត្រូវតែយកចិត្តទុកដាក់លើបញ្ហានេះ។ បើមិនដូច្នេះទេ ទឹកប្រាក់រាប់សិបលានដុល្លារនឹងត្រូវខ្ជះខ្ជាយដោយពលរដ្ឋចំណាយលើចំណីអាហារនិងវត្ថុប្រើប្រាស់ដែលគ្មានគុណភាព ហើយត្រូវចំណាយថែមទៀត លើការព្យាបាលជំងឺ ដែលបណ្តាលមកពីពពួកទំនិញនិងអាហារខុសច្បាប់ទាំងនេះ ។ ក្រៅពីនេះ វាក៏ជាប្រភេទទំនិញដែលនឹងធ្វើឲ្យរដ្ឋប្រឈមមុខនឹងការធ្លុះធ្លាយចំណូល ខាតបង់ប្រយោជន៍សេដ្ឋកិច្ច ហើយផលទាំងនោះធ្លាក់តែទៅលើជនខិលខូច និង ពពួកមន្ត្រីឆ្លៀតឱកាសនិងពុករលួយ ។
ម្យ៉ាងវិញទៀតវាក៏ធ្វើឲ្យប៉ះពាល់ដល់កិត្តិយសជាតិ យើងផងដែរ ពីព្រោះតែនៅពេលនេះយើងកំពុងតែមានអរិភាពព្រំដែនហើយយើងពាក់ព័ន្ធនឹងរឿងរត់ពន្ធតាមច្រកដែលខុសច្បាប់ ទៅទៀត ។
សរុបទៅ អស់លោក ឈ្មួញ មន្ត្រី សមត្ថកិច្ច និង អ្នកដែលពាក់់ព័ន្ធនៅដំណាក់កាលនេះសូមកុំអោយផលប្រយោជន៍ដឹកមុខ សុខចិត្តយកសេចក្តីថ្លៃថ្នូររបស់ជាតិ យកផលប្រយោជន៍និងសុខភាពរបស់ពលរដ្ឋមកធ្វើអាជីវកម្ម ព្រោះតែផលប្រយោជន៍បន្តិចបន្តួចសម្រាប់ក្រុមអស់លោកមួយក្តាប់តូច ។
ក្រៅពីនោះសមត្ថកិច្ចនិងស្ថាប័នជំនាញគួរតែវែកមុខជនដែលជាមេក្លោង នៅពីក្រោយករណីនេះមកផ្តន្ទាទោស ដើម្បីឲ្យសមនឹងអ្វីដែលពួកគេគួរតែទទួលខុសត្រូវនៅចំពោះមុខច្បាប់ និង ចំពោះមុខផលប៉ះពាល់ដល់សាធារណៈជននៅទូទាំងប្រទេស ៕
ចែករំលែកព័តមាននេះ