ទីក្រុងហ្កាហ្សា៖ ថ្ងៃនេះ គេស្ដាប់ឮសំឡេងផ្ទុះគ្រាប់បែកជាច្រើនករណី ជាពិសេសនៅពេលរំលងអធ្រាត្រឆ្លងចូលព្រឹកថ្ងៃសៅរ៍ ទោះបីលោកត្រាំបានអំពាវនាវឱ្យអ៊ីស្រាអែលបញ្ឈប់យុទ្ធនាការទម្លាក់គ្រាប់បែកយ៉ាងណាក្ដី។ លោកត្រាំកាលពីយប់មិញ បានប្រាប់ឱ្យអ៊ីស្រាអែលឈប់ទម្លាក់គ្រាប់បែកបន្ទាប់ពីក្រុមហាម៉ាស់ប្រកាសដោះលែងចំណាប់ខ្មាំងដែលនៅរស់ និងប្រគល់សាកសពចំណាប់ខ្មាំងដែលស្លាប់។ មិនតែប៉ុណ្ណោះ ហាម៉ាស់ប្រកាសទទួលយកផែនការសន្តិភាពដែលផ្ដួចផ្ដើមឡើងដោយលោកត្រាំមួយផ្នែក (មានន័យថាមិនទាន់ឯកភាព១០០%ទេព្រោះត្រូវយកទៅពិភាក្សាគ្នាជាមួយក្រុមប៉ាឡេស្ទីនដទៃទៀត)។
ខុទ្ទកាល័យនាយករដ្ឋមន្ត្រីអ៊ីស្រាអែលថ្លែងថារដ្ឋាភិបាលរបស់ខ្លួនកំពុងត្រៀមអនុវត្តផែនការសន្តិភាពរបស់លោកត្រាំនៅដំណាក់កាលទីមួយ។ នោះគឺការដោះលែងចំណាប់ខ្មាំងជនជាតិអ៊ីស្រាអែលដូចអ្វីដែលហាម៉ាស់បានប្រកាស។ មិនយូរប៉ុន្មាន សារព័ត៌មានអ៊ីស្រាអែលផ្សាយថាថ្នាក់ដឹកនាំអ៊ីស្រាអែលបានណែនាំទៅមន្ត្រីយោធារបស់ខ្លួនឱ្យកាត់បន្ថយការវាយប្រហារទៅលើតំបន់ហ្កាហ្សា។ ទូរទស្សន៍អាល់ចាស៊ីរ៉ាផ្សាយថាទោះបីលោកត្រាំអំពាវនាវយ៉ាងណាក្ដី អ៊ីស្រាអែលនៅឆ្លៀតទម្លាក់គ្រាប់បែកស្លាប់មនុស្សយ៉ាងតិចម្ភៃនាក់ថែមទៀត។
ក្រុមហាម៉ាស់បានបញ្ជូនសំណុំឯកសារឆ្លើយតបទៅនឹងផែនការរបស់លោកត្រាំហើយ។ ក្នុងនោះ ពួកគេយល់ព្រមប្រគល់សិទ្ធិគ្រប់គ្រងផ្នែករដ្ឋបាលទៅឱ្យគណៈកម្មការបច្ចេកទេស (មានន័យថាមិនមែនគ្រប់គ្រងដោយអ្នកនយោបាយ ឬចលនាប្រដាប់អាវុធតទៅទៀតទេ)។ ចំណុចមួយទៀត ហាម៉ាស់យល់ព្រមដោះលែងចំណាប់ខ្មាំងទាំងអស់តែម្ដង។ អ៊ីស្រាអែលក៏ត្រៀមដោះលែងអ្នកទោសជនជាតិប៉ាឡេស្ទីនពីពន្ធនាគារផងដែរ។
ទោះជាយ៉ាងណាក្ដី ការទាមទារឱ្យហាម៉ាស់ទម្លាក់អាវុធចុះនោះប្រហែលជាពួកគេមិនយល់ព្រមទេ។ ជំនួសឱ្យការទម្លាក់អាវុធចុះ ហាម៉ាស់ចង់ដើរតាមសេណរីយោផ្សេងវិញ។ នោះគឺការចូលតុចរចាដោយប្រយោលជាមួយអ៊ីស្រាអែលដោយមានប្រទេសទីបីធ្វើជាអន្តរការី។ គ្រាន់តែឮដូច្នេះ លោកត្រាំបង្ហាញសុទិដ្ឋិនិយមយ៉ាងខ្លាំង។ លោកចេញវីឌីអូឃ្លីបបង្ហោះនៅលើបណ្ដាញសង្គមដោយមានជំនឿយ៉ាងមុតមាំថាហាម៉ាស់ត្រៀមខ្លួនទទួលយកសន្តិភាពជាស្ថាពរ។ នេះបើយោងតាមការផ្សាយរបស់រ៉យទ័រ, អាល់ចាស៊ីរ៉ា និងប្រភពដទៃទៀត៕
ចែករំលែកព័តមាននេះ