ទីក្រុងតូក្យូ៖ ប្រទេសជប៉ុននឹងមាននាយករដ្ឋមន្ត្រីស្ត្រីដំបូងបំផុតនៅក្នុងប្រវត្តិសាស្ត្ររបស់ខ្លួនបន្ទាប់ពីគណបក្សប្រជាធិបតេយ្យសេរីដែលកំពុងដឹកនាំប្រទេសសព្វថ្ងៃនេះសម្រេចបោះឆ្នោតជ្រើសរើសលោកស្រីសាណាអិ តាកាអ៊ីឈិ (Sanae Takaichi) ជាប្រធានគណបក្ស ហើយអាចនឹងក្លាយជានាយករដ្ឋមន្ត្រីឆាប់ៗនេះ។ លោកស្រីជាអ្នកនយោបាយដែលមាននិន្នាការអភិរក្សនិយមដែលគេសង្ឃឹមថានឹងទាក់ទាញអ្នកវិនិយោគ ហើយនឹងបង្កើនទំនាក់ទំនងល្អជាមួយប្រទេសជិតខាង។
គណបក្សប្រជាធិបតេយ្យសេរីដែលបានដឹកនាំប្រទេសជប៉ុនសឹងតែគ្រប់ពេលចាប់តាំងពីក្រោយសង្គ្រាមលោកលើកទី២បានបោះឆ្នោតជ្រើសរើសលោកស្រីតាកាអ៊ីឈិ អាយុ៦៤ឆ្នាំ ដោយសេចក្ដីសង្ឃឹមថានឹងទទួលបានការជឿទុកចិត្តឡើងវិញពីសាធារណជន។ ប្រជាជនជប៉ុនមិនសប្បាយចិត្តនឹងស្ថានភាពសេដ្ឋកិច្ចធ្លាក់ចុះ និងថ្លៃចំណាយលើជីវភាពរស់នៅប្រចាំថ្ងៃកាន់តែច្រើន។
គេរំពឹងថាសភានឹងកោះប្រជុំដើម្បីបោះឆ្នោតផ្ដល់សេចក្ដីទុកចិត្តចំពោះលោកស្រីតាកាអ៊ីឈិនៅថ្ងៃទី១៥ខែតុលាដើម្បីជំនួសតំណែងនាយករដ្ឋមន្ត្រីចាំផ្ទះលោកអ៊ីស៊ីបា។ គេរំពឹងថាលោកស្រីអាចនឹងទទួលបានសំឡេងគាំទ្រគ្រប់គ្រាន់ពីសភាដោយមិនពិបាកព្រោះបណ្ដាគណបក្សនានានៅក្នុងរដ្ឋាភិបាលចម្រុះជាមួយគ្នាក៏បង្ហាញការពេញចិត្តចំពោះលោកស្រីផងដែរ។
មូលហេតុដែលនាំឱ្យលោកអ៊ីស៊ីបាត្រូវតែបង្ខំចិត្តចុះចេញពីតំណែងព្រោះលោកទទួលរងសម្ពាធខ្លាំងពីមន្ត្រីធំៗនៅក្នុងបក្សបន្ទាប់ពីលោកដឹកនាំបក្សមិនបានល្អ ធ្វើឱ្យគណបក្សធ្លាក់សំឡេងគាំទ្រទាំងនៅក្នុងរដ្ឋសភា និងព្រឹទ្ធសភា។ បន្ទាប់ពីទទួលជ័យជម្នះនៅក្នុងការបោះឆ្នោតជ្រើសរើសប្រធានគណបក្សថ្មី លោកស្រីតាកាអ៊ីឈិប្រកាសដាក់ចេញផែនការជាច្រើន។
នៅក្នុងចំណោមផែនការទាំងនោះក៏មានការកាត់បន្ថយពន្ធ និងការបង្កើនការឧបត្ថម្ភគាំទ្រពីរដ្ឋចំពោះវិស័យឯកជនផងដែរ។ ទន្ទឹមនឹងនោះ លោកស្រីក៏យល់ច្បាស់ណាស់ថារដ្ឋត្រូវតែគ្រប់គ្រងថវិកាដោយជំហានហ្មត់ចត់បំផុត។ ធនាគារកណ្ដាលជប៉ុន (ធនាគារជាតិ) ត្រូវដាក់ចេញនយោបាយហិរញ្ញវត្ថុដែលគិតទៅដល់ភាពផុយស្រួយនៃសេដ្ឋកិច្ចជាតិ និងការដំឡើងប្រាក់ឈ្នួល។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ