ទីក្រុងវ៉ាស៊ីនតោន៖ នៅក្នុងស្ថានភាពដែលប្រទេសអាមេរិកកំពុងបិទដំណើររដ្ឋាភិបាល (ដោយសារក្រុមអ្នកតំណាងរាស្ត្ររបស់គណបក្សទាំង២ចរចាមិនត្រូវគ្នាដើម្បីអនុម័តថវិកាសម្រាប់ប្រើប្រាស់ជាបន្តទៀត) លោកត្រាំចាប់ផ្ដើមវាយបកទៅគណបក្សប្រជាធិបតេយ្យដែលជាអ្នកធ្វើឱ្យជាប់គាំងថវិកា។ លោកនឹងជួបនាយកគ្រប់គ្រងថវិកា លោករ៉ាស់សល វ៉ត (Russell Vought) នៅយប់នេះដើម្បីកំណត់មុខសញ្ញាទីភ្នាក់ងារ ឬស្ថាប័នណាខ្លះដែលជារបស់គណបក្សប្រជាធិបតេយ្យ និងដែលត្រូវកាត់ផ្ដាច់ថវិកា។
លោកត្រាំបង្ហោះសារនៅលើបណ្ដាញសង្គមថា «លោកសឹងតែមិនជឿថាក្រុមប្រជាធិបតេយ្យឆ្វេងនិយមជ្រុលហុចឱកាសល្អកម្ររកបានយ៉ាងដូច្នេះ»។ លោកចង់មានន័យថាការដែលគណបក្សប្រជាធិបតេយ្យធ្វើឱ្យរដ្ឋាភិបាលបិទដំណើរការយ៉ាងដូច្នេះប្រៀបបាននឹងការហុចដងដាវឱ្យលោកយកលេសដើម្បីឈប់ផ្ដល់ថវិកាជាតិសម្រាប់ទ្រទ្រង់ស្ថាប័ននានាដែលបង្កើតឡើង ឬមាននិន្នាការគាំទ្រគណបក្សប្រជាធិបតេយ្យ។
តាំងពីមុននេះ លោកត្រាំបានផ្អឹបទុកថវិកាសម្រាប់ចំណាយលើស្ថាប័នមួយចំនួនដែលលម្អៀងទៅរកគណបក្សប្រជាធិបតេយ្យ។ ហើយឥឡូវនេះទៀត លោកគំរាមថានឹងបញ្ឈប់បុគ្គលិករបស់រដ្ឋបន្ថែមទៀតនៅអំឡុងពេលនៃការបិទដំណើរការរដ្ឋាភិបាល។ លោកបានដាក់ចេញផែនការធ្វើយ៉ាងណាកាត់បន្ថយបុគ្គលិករបស់រដ្ឋឱ្យបាន៣សែននាក់ត្រឹមចុងឆ្នាំ២០២៥។ ដូច្នេះទន្ទឹមនឹងពេលដែលរដ្ឋាភិបាលបិទដំណើរការយ៉ាងដូច្នេះ វាជាឱកាសល្អសម្រាប់លោកបញ្ឈប់ការងារកាន់តែលឿន។
លោកត្រាំបានបង្ហោះសារនៅលើបណ្ដាញសង្គម រំលឹកអំពីការចូលរួមរបស់ប្រធានគ្រប់គ្រងថវិកា លោកវ៉ត (Vought) នៅក្នុង «ផែនការឆ្នាំ២០២៥» ដែលជាផែនការរបស់ក្រុមអភិរក្សនិយម។ ផែនការនេះស្នើឱ្យកាត់បន្ថយឱ្យបានច្រើនជាអតិបរមានូវចំនួនមន្ត្រីដែលបម្រើការនៅតាមមន្ទីរ-ក្រសួងនានារបស់រដ្ឋ។ រដ្ឋាភិបាលរបស់លោកត្រាំកំពុងអនុវត្តតាមទស្សនវិស័យនេះជាបណ្ដើរៗហើយ។ ឧទាហរណ៍ ការលុបចោលក្រសួងអប់រំ និងការកាត់បន្ថយតួនាទីរបស់រដ្ឋាភិបាលនៅក្នុងបញ្ហាបំពុលបរិស្ថាន។
អ្នកនាំពាក្យសេតវិមាន លោកស្រីខារ៉ូឡាញ លេវីត (Karoline Leavitt) ថ្លែងថាលោកត្រាំប្រហែលជាត្រូវបញ្ឈប់ការងារបុគ្គលិករបស់រដ្ឋរាប់ពាន់នាក់នាពេលឆាប់ៗនេះ។ ហេតុដូច្នេះ ក្រុមសហជីពការងាររបស់រដ្ឋបានដាក់ពាក្យប្ដឹងទៅតុលាការជាបណ្ដើរៗហើយដើម្បីតវ៉ាកុំឱ្យរដ្ឋាភិបាលបញ្ឈប់បុគ្គលិកយ៉ាងដូច្នេះ។ ប៉ុន្តែតុលាការសហព័ន្ធផ្ដល់សិទ្ធិឱ្យរដ្ឋាភិបាលបិទបញ្ចប់កិច្ចសន្យាការងារទាំងពាក់កណ្ដាលទី។ ចំណែកសំណុំរឿងដែលស្រដៀងគ្នានេះកំពុងត្រូវយកមកពិនិត្យមើល។
សមាជិកព្រឹទ្ធសភាមកពីគណបក្សប្រជាធិបតេយ្យ លោកស្រីផេតធី មូរ៉េ (Patty Murray) ថ្លែងថាលោកត្រាំបញ្ឈប់ការងារបុគ្គលិករបស់រដ្ឋមិនមែនជាការដោះស្រាយបញ្ហាជាប់គាំងថវិកានៅសភាទេ។ លោកស្រីយល់ថាបើលោកត្រាំបញ្ឈប់បុគ្គលិក មូលហេតុពិតមិនមែនដោយសាររដ្ឋាភិបាលបិទដំណើរការទេ។ ប៉ុន្តែដោយសារលោកចង់បញ្ឈប់តែម្ដង។ ជាលក្ខណៈមាន់មិនរងាវក៏ថ្ងៃនៅតែរះ ឬក៏អាចនិយាយថាព្រឹត្តិការណ៍ដែលគ្មានទំនាក់ទំនងគ្នា ប៉ុន្តែយកមកភ្ជាប់គ្នាដើម្បីបង្កើតភាពសមហេតុផល។ នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ