ទីក្រុងវ៉ាស៊ីនតោន៖ អាមេរិកត្រៀមចាប់បញ្ជូនជនអន្តោប្រវេសន៍អ៊ីរ៉ង់ខុសច្បាប់ចំនួន៤០០នាក់ត្រឡប់ទៅមាតុភូមិរបស់ពួកគេវិញ។ ពួកគេភាគច្រើនចូលទឹកដីអាមេរិកដោយខុសច្បាប់។ វាជាផ្នែក១នៃយុទ្ធនាការរបស់លោកត្រាំដើម្បីបង្ក្រាបជនអន្តោប្រវេសន៍ទ្រង់ទ្រាយធំ។ នេះបើតាមការបង្ហើបឱ្យដឹងពីមន្ត្រីជាន់ខ្ពស់របស់អ៊ីរ៉ង់។ ជាដំណាក់កាលដំបូង អាមេរិកសម្រេចចិត្តចាប់បញ្ជូនជនជាតិអ៊ីរ៉ង់១២០នាក់ដែលឆ្លងចូលប្រទេសអាមេរិកតាមប្រទេសម៉ិកស៊ីកូ (មានមេខ្យល់អ្នកនាំ)។
មុននឹងឈានដល់ការសម្រេចបានកិច្ចព្រមព្រៀងបញ្ជូន និងទទួលយកជនជាតិអ៊ីរ៉ង់ទាំងនេះត្រឡប់ទៅវិញ អាមេរិក និងអ៊ីរ៉ង់បានចរចាគ្នាអស់រយៈពេលជាច្រើនខែ។ នេះបើយោងតាមការផ្សាយរបស់សារព័ត៌មានញូយ៉កថាមស៍។ ជនអន្តោប្រវេសន៍ដែលបណ្ដេញចេញជុំទី១ទាំង១២០នាក់នោះនឹងទៅដល់អ៊ីរ៉ង់នៅក្នុងអំឡុងពេលមួយ ឬពីរថ្ងៃខាងមុខនេះ។
ញូយ៉កថាមស៍ផ្សាយថាយន្តហោះពិសេសរបស់អាមេរិកដែលសម្រិតសម្រាំងទុកសម្រាប់ដឹកជនជាតិអ៊ីរ៉ង់ទាំងនោះបានចាកចេញដំណើរពីអាកាសយានដ្ឋាននៃរដ្ឋលូស៊ីអាណា (Louisiana) កាលពីយប់មិញ រំពឹងថានឹងទៅដល់អ៊ីរ៉ង់ដោយជិះកាត់តាមដែនអាកាសប្រទេសកាតានៅថ្ងៃអង្គារ។ នៅក្នុងចំណោមអ្នកទាំងនោះ អ្នកខ្លះស្ម័គ្រចិត្តផ្ដិតមេដៃឱ្យគេចាប់បញ្ជូនទៅអ៊ីរ៉ង់វិញបន្ទាប់ពីជាប់ឃុំរយៈពេលជាច្រើនខែមើលទៅដូចជាគ្មានសង្ឃឹមថាបានរស់នៅលើទឹកដីបិតាប្រជាធិបតេយ្យតទៅទៀតបានឡើយ។
ប៉ុន្តែនៅក្នុងចំណោមនោះក៏មានអ្នកខ្លះក្រាញមិនចង់ចេញពីទឹកដីអាមេរិកទេ។ ទោះជាយ៉ាងណាក្ដី អ្នកទាំងនោះត្រូវគេចាប់បង្ខំឱ្យវិលត្រឡប់ទៅវិញឱ្យទាល់តែបាន។ រដ្ឋាភិបាលអ៊ីរ៉ង់ (ដែលទើបតែត្រូវអង្គការសហប្រជាជាតិដាក់ទណ្ឌកម្មឡើងវិញកាលពីពេលថ្មីៗនេះពីបទរំលោភកិច្ចព្រមព្រៀងនុយក្លេអ៊ែរឆ្នាំ២០១៥) សង្ឃឹមថាអាមេរិកនឹងគោរពសិទ្ធិជនអន្តោប្រវេសន៍៕
ចែករំលែកព័តមាននេះ