បរទេស ៖ តម្លៃ​ប្រេង​ឆៅ​បាន​ធ្លាក់​ចុះ នៅ​ថ្ងៃ​ទី​៣០ ខែកញ្ញា ឆ្នាំ​២០២៥ ដោយសារ​ការ​កើនឡើង​ផលិតកម្ម​ដែល​រំពឹង​ទុក​ដោយ​អង្គការ OPEC+ និង​ការ​បន្ត​ការ​នាំ​ចេញ​ប្រេង​ឆៅ​ពី​តំបន់ Kurdistan របស់​ប្រទេស​អ៊ី​រ៉ា​ក់តាម​រយៈ​ប្រទេស​តួ​ក​គី ដោយ​បង្ក​ជា​ក្តី​បារម្ភ​អំពី​អតិរេក​ការ​ផ្គត់ផ្គង់​លើស​តម្រូវការ​។ នេះ​បើ​យោង​តាម​ប្រភព​ពី​ទីភ្នាក់ងារសារព័ត៌មាន Reuters បាន​ចេញផ្សាយ​។

តម្លៃ​ប្រេង​ឆៅ​នា​ពេល​អនាគត Brent សម្រាប់​ការ​ចែកចាយ​ខែវិច្ឆិកា ដែល​ផុតកំណត់​នៅ​ថ្ងៃ​ទី​៣០ ខែកញ្ញា ឆ្នាំ​២០២៥ បាន​ធ្លាក់​ចុះ ៥៤ សេន ឬ ០,៨% មក​នៅ​ត្រឹម ៦៧,៤៣​ដុល្លារ​អា​មេ​រិ​ក​ក្នុង​១​បារ៉ែល ត្រឹម​ម៉ោង ១០:២០​នាទី​ព្រឹក (​ម៉ោង​នៅ​កម្ពុជា​)​។ ចំណែក​កិច្ចសន្យា​ជួញដូរ​សម្រាប់​ខែធ្នូ បាន​ធ្លាក់​ចុះ ៥៣ សេន ឬ ០,៨% មក​នៅ​ត្រឹម ៦៦,៥៦​ដុល្លារ​ក្នុង​១​បារ៉ែល​។ ងាក​ទៅ​ប្រេង​ឆៅ​នា​ពេល​អនាគត West Texas Intermediate (WTI) របស់​អា​មេ​រិ​ក​កំពុង​ជួញដូរ​ក្នុង​តម្លៃ ៦២,៩៥​ដុល្លារ​ក្នុង​១​បារ៉ែល ធ្លាក់​ចុះ ៥០ សេន ឬ ០,៨%​។

ការ​ធ្លាក់​ចុះ​តម្លៃ​ប្រេង​បាន​កើតឡើង នៅ​ពេល​តំបន់ Kurdistan របស់​ប្រទេស​អ៊ី​រ៉ា​ក់បាន​បន្ត​ការ​នាំ​ចេញ​ប្រេង​ឆៅ​ឡើង​វិញ ហើយ​ចំ​ពេល​មាន​របាយការណ៍​ថា OPEC+ ទំនងជា​នឹង​យល់ព្រម​លើ​ការ​បង្កើន​ផលិតកម្ម​សម្រាប់​ខែវិច្ឆិកា នៅ​ក្នុង​កិច្ចប្រជុំ​របស់​ខ្លួន​នៅ​ចុង​ស​ប្តា​ហ៍​នេះ​។ នៅ​ក្នុង​កិច្ចប្រជុំ​ដែល​គ្រោងទុក​សម្រាប់​ថ្ងៃអាទិត្យ អង្គការ​ប្រទេស​នាំ​ចេញ​ប្រេង និង​សម្ព័ន្ធមិត្ត រួម​ទាំង​រុ​ស្ស៊ី ដែល​ត្រូវ​បាន​ស្គាល់​ថា OPEC+ ទំនងជា​នឹង​យល់ព្រម​ឱ្យ​មានការ​បង្កើន​ផលិតកម្ម​ប្រេង​ថែម​ទៀត​យ៉ាង​ហោច​ណាស់ ១៣៧ ០០០​បារ៉ែល​ក្នុង​១​ថ្ងៃ​។

ទន្ទឹម​ជាមួយ​គ្នា​នោះ ក្រសួង​ប្រេង​របស់​ប្រទេស​អ៊ី​រ៉ា​ក់បាន​ប្រកាស​ថា ប្រេង​ឆៅ​បាន​បង្ហូរ​ចេញ​កាលពី​ថ្ងៃ​សៅរ៍​ស​ប្តា​ហ៍​មុន តាម​រយៈ​បំពង់​បង្ហូរ​ប្រេង​ពី​តំបន់​ពាក់កណ្តាល​ស្វយ័ត Kurdistan នៅ​ភាគ​ខាងជើង​ប្រទេស​ទៅ​កាន់​ប្រទេស​តួ​ក​គី​ជា​លើក​ដំបូង​ក្នុង​រយៈពេល ២​ឆ្នាំ​កន្លះ បន្ទាប់​ពី​កិច្ចព្រមព្រៀង​បណ្តោះអាសន្ន​មួយ​បាន​បំបែក​ភាព​ជាប់​គាំង​នេះ​។

ទោះ​យ៉ាងណា​ក៏​ដោយ ទីផ្សារ​ប្រេង​នៅ​តែ​មានការ​ប្រុង​ប្រយ័ត្ន​ក្នុង​ប៉ុន្មាន​ស​ប្តា​ហ៍​ថ្មី​ៗ​នេះ ដោយ​ធ្វើ​ឱ្យ​មាន​ក្តី​បារម្ភ​ពី​ហានិភ័យ​នៃ​ការ​ផ្គត់ផ្គង់ ដែល​ភាគច្រើន​កើតឡើង​ពី​ការ​វាយប្រហារ​ដោយ​ដ្រូ​ន​របស់​អ៊ុយ​ក្រែ​ន​លើ​បណ្តា​រោងចក្រ​ចម្រាញ់​ប្រេង​រុ​ស្ស៊ី ក៏​ដូច​ជា​ក្តី​បារម្ភ​នៃ​ការ​ផ្គត់ផ្គង់​លើស​តម្រូវការ និង​ការ​ធ្លាក់​ចុះ​តម្រូវការ​សកល​។

អ្នកវិភាគ​ពី​ធនាគារ ANZ បាន​លើក​ឡើង​នៅ​ក្នុង​កំណត់​ត្រា​មួយ នៅ​ថ្ងៃ​ទី​៣០ ខែកញ្ញា ថា បន្ថែម​ពីលើ​ក្តី​បារម្ភ​នេះ ហានិភ័យ​ដែល​អាច​កើត​មាន​ពាក់ព័ន្ធ​នឹង​ការ​បិទ​រដ្ឋាភិបាល​របស់​សហរដ្ឋអាមេរិក​បាន​ធ្វើ​ឱ្យ​មានការ​ព្រួយបារម្ភ​លើ​តម្រូវការ​បន្ថែម​ទៀត​។

ការ​បិទ​រដ្ឋាភិបាល​របស់​សហរដ្ឋអាមេរិក​អាច​រំខាន​ដល់​សេវាកម្ម​ជា​ច្រើន និង​ពន្យារពេល​ការ​ចេញផ្សាយ​ទិន្នន័យ​សេដ្ឋកិច្ច រួម​ទាំង​របាយការណ៍​ប្រាក់បៀវត្សរ៍ ដែល​បាន​កំណត់ពេល​ចេញផ្សាយ​នៅ​ថ្ងៃ​សុក្រ​ស​ប្តា​ហ៍​នេះ ជា​កត្តា​សំខាន់​សម្រាប់​ការ​សម្រេចចិត្ត​លើ​ការ​បង្កើត​គោលនយោបាយ​របស់​ធនាគារកណ្តាល​អា​មេ​រិ​ក (Fed)​។

ការ​ផ្តល់​មូលនិធិ​សម្រាប់​រដ្ឋាភិបាល​អា​មេ​រិ​ក នឹង​ត្រូវ​កាត់​ផ្តាច់​នៅ​ផុត​ថ្ងៃ​ទី​៣០ ខែកញ្ញា​នេះ លុះត្រាតែ​គណបក្ស​សាធារណរដ្ឋ​របស់​លោក​ប្រធានាធិបតី ដូ​ណា​ល់ ត្រាំ (Donald Trump) អាច​ឈាន​ដល់​ការ​ព្រមព្រៀង​គ្នា​ជាមួយ​គណបក្ស​ប្រជាធិបតេយ្យ​លើ​សេចក្តី​ស្នើ​ច្បាប់​ចំណាយ​។ នៅ​ក្នុង​ការ​បិទ​នេះ រដ្ឋាភិបាល​សហព័ន្ធ​ត្រូវ​កាត់​បន្ថយ​សកម្មភាព និង​សេវាកម្ម​របស់​ភ្នាក់ងារ បញ្ឈប់​ប្រតិបត្តិការ​ដែល​មិន​សំខាន់ បញ្ឈប់​បុគ្គលិក​ដែល​មិន​សំខាន់ និង​រក្សា​ទុក​តែ​បុគ្គលិក​សំខាន់​ៗ​ក្នុង​នាយកដ្ឋាន​ប៉ុណ្ណោះ​។ ការ​បិទ​ក៏​អាច​រំខាន​ដល់​សកម្មភាព​ការងារ​កម្រិត​រដ្ឋ ដែនដី និង​ថ្នាក់​មូលដ្ឋាន​របស់​រដ្ឋាភិបាល​ផង​ដែរ​។

លោក ត្រាំ គ្រោង​នឹង​ជួប​ជាមួយ​សមាជិក​ជាន់ខ្ពស់​គណបក្ស​សាធារណរដ្ឋ និង​គណបក្ស​ប្រជាធិបតេយ្យ​ក្នុង​សភា ក្នុង​ពេល​ថ្ងៃ​ផុតកំណត់​ខិត​ជិត​មក​ដល់ ដើម្បី​បន្ត​ផ្តល់​មូលនិធិ​ដល់​រដ្ឋាភិបាល​សហព័ន្ធ​។

ក្តី​បារម្ភ​ផ្សេង​ទៀត​បាន​កើតឡើង នៅ​ពេល​ដែល​លោក ត្រាំ បាន​ឈ្នះ​ការ​គាំទ្រ​ពី​នាយក​រដ្ឋមន្ត្រី​អ៊ី​ស្រា​អែ​ល លោក ប៊េ​ន​ចា​មីន ណេ​តាន់​យ៉ា​ហ៊ូ (Benjamin Netanyahu) ចំពោះ​សំណើ​សន្តិភាព​នៅ​តំបន់​ហ្កា​ហ្សា (Gaza) ដែល​គាំទ្រ​ដោយ​អា​មេ​រិ​ក ប៉ុន្តែ​ជំហរ​របស់​ក្រុម​ហា​ម៉ាស (Hamas) នៅ​តែ​មិន​ប្រាកដប្រជា​៕