ខេត្តស្ទឹងត្រែង ៖ គណៈកម្មាធិការគ្រប់គ្រងគ្រោះមហន្តរាយខេត្តនៃរដ្ឋបាលខេត្តស្ទឹងត្រែ បានចេញសេចក្តីជូនដំណឹងជម្រាបជូន លោកអភិបាលនៃគណៈអភិបាលក្រុង ស្រុក និងជាប្រធានគណៈកម្មាធិការគ្រប់គ្រងគ្រោះមហន្តរាយក្រុង ស្រុក ដើម្បីធ្វើការពិនិត្យតាមដាន ត្រៀមបង្ការ…
ខេត្តស្ទឹងត្រែង ៖ គណៈកម្មាធិការគ្រប់គ្រងគ្រោះមហន្តរាយខេត្តនៃរដ្ឋបាលខេត្តស្ទឹងត្រែ បានចេញសេចក្តីជូនដំណឹងជម្រាបជូន លោកអភិបាលនៃគណៈអភិបាលក្រុង ស្រុក និងជាប្រធានគណៈកម្មាធិការគ្រប់គ្រងគ្រោះមហន្តរាយក្រុង ស្រុក ដើម្បីធ្វើការពិនិត្យតាមដាន ត្រៀមបង្ការ អន្តរាគមន៍ ឆ្លើយតបគ្រោះទឹកជំនន់ និងហានិភ័យនៃគ្រោះធម្មជាតិឱ្យបានទាន់ពេលវេលាដល់សហគមន៍ និងប្រជាពលរដ្ឋក្នុងមូលដ្ឋាន ។
ការត្រៀមបង្ការ អន្តរាគមន៍ ដើម្បីឆ្លើយតបគ្រោះទឹកជំនន់ និងហានិភ័យនៃគ្រោះធម្មជាតិនេះ បន្ទាប់ខេត្តស្ទឹងត្រែងមានឥទ្ធិពលពីខ្យល់ព្យុះ និងមានភ្លៀងធ្លាក់បន្តបន្ទាប់ ដែលអាចបង្កអោយតំបន់មួយចំនួនងាយជន់លិច ។
ការជម្រាបជូនរបស់រដ្ឋបាលខេត្តយោង ៖ ស្ថានភាពជាក់ស្តែងនៃការកើនឡើងកម្ពស់ទឹកទន្លេ និងផលប៉ះពាល់ដោយគ្រោះទឹកជំនន់។ តបតាមកម្មវត្ថុ និងយោងខាងលើ ខ្ញុំសូមជម្រាបជូន លោកអភិបាលក្រុង ស្រុក និងជាប្រធាន គណៈកម្មាធិការគ្រប់គ្រងគ្រោះមហន្តរាយក្រុង ស្រុក ជ្រាបថា ដើម្បីធានានូវការប្រតិបត្តិផែនការត្រៀម បម្រុងឆ្លើយតបគ្រោះអាសន្នទឹកជំនន់ គណៈកម្មាធិការគ្រប់គ្រងគ្រោះមហន្តរាយខេត្ត សូមធ្វើការណែនាំ ដល់គ្រប់ក្រុង ស្រុក ពិនិត្យចាត់ចែងអនុវត្ត ត្រៀមលក្ខណៈ និងអន្តរាគមន៍ ដូចខាងក្រោម៖
១-ចាត់តាំងឱ្យមានកម្លាំងសរុប មធ្យោបាយ និងធនធានសរុបក្នុងដែនសមត្ថកិច្ចចុះជាប់ជាប្រចាំ នៅតាមមូលដ្ឋានដែលមានផលប៉ះពាល់ ឬនឹងអាចមានផលប៉ះពាល់ដោយគ្រោះទឹកជំនន់ដើម្បីក្តាប់ជាប់ សភាពការណ៍ និងអន្តរាគមន៍ជួយប្រជាពលរដ្ឋរងគ្រោះបានទាន់ពេលវេលា។
២-គូសបញ្ជាក់ច្បាស់លាស់ដល់ក្រុមការងារជំនាញនៅថ្នាក់ក្រុង ស្រុក តាមដានជាប់ជាប្រចាំ សភាពការណ៍ហានិភ័យនានាពីគ្រោះទឹកជំនន់ ដោយធ្វើការជូនដំណឹងដល់ប្រជាពលរដ្ឋក្នុងមូលដ្ឋាន និងអាជ្ញាធរមូលដ្ឋានឃុំ សង្កាត់ ថ្នាក់ដឹកនាំភូមិ ក្រុមស្ម័គ្រចិត្ត ពិសេសប្រជាពលរដ្ឋដែលរស់នៅ ប្រកប មុខរបរនៅតាមដងទន្លេ និងមូលដ្ឋានងាយរងគ្រោះ ឱ្យមានការយកចិត្តទុកដាក់ និងប្រុងប្រយ័ត្នខ្ពស់។
៣- ត្រូវបង្កើនកិច្ចសហការជាប់ជាប្រចាំ ជាមួយលេខាធិការដ្ឋាន នៃ គ.គ.ម.ខ ដើម្បីផ្តល់ ព័ត៌មាន និងធ្វើរបាយការណ៍ស្តីពីស្ថានភាពគ្រោះមហន្តរាយក្នុងមូលដ្ឋាន បានទាន់ពេលវេលា និងបញ្ចូល ទៅក្នុងប្រព័ន្ធរបាយការណ៍ព័ត៌មានទាន់ហេតុការណ៍ (PRISM)។
៤- គណៈកម្មាធិការគ្រប់គ្រងគ្រោះមហន្តរាយថ្នាក់ក្រុង ស្រុក ត្រូវក្តាប់សភាពការណ៍ឱ្យបាន ជាប់ជាប្រចាំ ចាត់តាំងអនុវត្តក្នុងដែនសមត្ថកិច្ចទទួលខុសត្រូវ ធ្វើសេចក្តីរាយការណ៍ និងសុំគោលការណ៍ ដឹកនាំអនុវត្តជាបន្ទាន់ពីប្រធាន គ.គ.ម.ខ ក្នុងករណីចាំបាច់ ។
ជាមួយគ្នានេះ មន្ទីរធនធានទឹកនិងឧតុនិយមខេត្តស្ទឹងត្រែង នាព្រឹកថ្ងៃទី២៧ កញ្ញា ២០២៥ ក៏បានចេញសេចក្តីជូនដំណឹងអំពីស្ថានភាពអាកាសធាតុខេត្តស្ទឹងត្រែង នៅថ្ងៃទី២៧-២៩ ខែកញ្ញា ឆ្នាំ២០២៥ខាងមុខនេះ ៖ ប្រព័ន្ធសម្ពាធទាប និងជ្រលងនៃព្យុះ ទីហ្វុងប៊ូឡូយ លើកទី២០ បាននឹងកំពុងមានឥទ្ធិពលមកលើខេត្តស្ទឹងត្រែង ស្ថានភាពបែបនេះ និង ធ្វើឲ្យអាកាសធាតុមានពពកច្រើនដេរដាស មានភ្លៀងផ្គររន្ទះពីតិចទៅច្រើនខ្លាំង ភវនីយភាព ៨០% ខ្យល់កន្ត្រាក់បក់ក្នុងល្បឿនពី៧ ទៅ១១ម៉ែត្រវិនាទី និងមានសីតុណ្ហភាពពី ២៤°C ទៅ ២៩០។
អាស្រ័យដូចបានជម្រាបជូន មន្ទីរធនធានទឹក និងឧតុនិយមខេត្តស្ទឹងត្រែង សូមជូនដំណឹង ជាសាធារណៈ សូមមេត្តាយកចិត្តទុកដាក់ និងប្រុងប្រយ័ត្នខ្ពស់ អំពីស្ថានភាពទឹកភ្លៀងច្រើនលើស កម្រិតធម្មតា ខ្យល់កន្ត្រាក់ និងអាចកើតមានបាតុភូតផ្គររន្ទះ ដើម្បីចៀសវាងពីគ្រោះថ្នាក់ផ្សេងៗ ដូច ជាជំនន់ទឹកភ្លៀង ដែលអាចកើតមានជាយថាហេតុ ។
ចែករំលែកព័តមាននេះ