ខេត្តបាត់ដំបង ៖ ជនជាតិថៃចំនួន០៥នាក់ ក្នុងនោះ មានស្រីចំនួន០២នាក់ត្រូវបានកម្លាំងការពារព្រំដែនជួរមុខកម្ពុជាឃាត់ខ្លួនពេលពួកគេប៉ុនប៉ងលួចឆ្លងដែនចេញពីកម្ពុជាត្រឡប់ទៅកាន់ប្រទេសខ្លួនវិញតាមច្រករបៀងដោយខុសច្បាប់ កាលពីវេលារំលងអធ្រាត្រឈានចូលថ្ងៃទី២១ តុលា នៅក្នុងទឹកដីស្រុកសំពៅលូន ។ យោងតាមរបាយការណ៍ដែលកោះសន្តិភាពទទួលបាន…
ខេត្តបាត់ដំបង ៖ ជនជាតិថៃចំនួន០៥នាក់ ក្នុងនោះ មានស្រីចំនួន០២នាក់ត្រូវបានកម្លាំងការពារព្រំដែនជួរមុខកម្ពុជាឃាត់ខ្លួនពេលពួកគេប៉ុនប៉ងលួចឆ្លងដែនចេញពីកម្ពុជាត្រឡប់ទៅកាន់ប្រទេសខ្លួនវិញតាមច្រករបៀងដោយខុសច្បាប់ កាលពីវេលារំលងអធ្រាត្រឈានចូលថ្ងៃទី២១ តុលា នៅក្នុងទឹកដីស្រុកសំពៅលូន ។
យោងតាមរបាយការណ៍ដែលកោះសន្តិភាពទទួលបាន នៅព្រឹកថ្ងៃទី២២ តុលា ជនជាតិថៃទាំង០៥នាក់មាន៖ ១-ឈ្មោះ សុថាធីម ប៊ុនសាំង ភេទស្រី អាយុ៣២ឆ្នាំ ២-ឈ្មោះ ភីមវិផា កែវបុនលឿង ភេទស្រី អាយុ១៦ឆ្នាំ ៣-ឈ្មោះ សោមសិទ្ធ សុកចំរើន ភេទប្រុសអាយុ៣១ឆ្នាំ ៤-ឈ្មោះ ផាក់ឌីផាក់ផុង ជិនណាវ៉ាត ភេទប្រុស អាយុ៣២ឆ្នាំ និង៥-ឈ្មោះកាន់ផាកប ថាន់ណាឡាត់កន្ទ្រប ភេទប្រុស អាយុ២២ឆ្នាំ ពួកនេះរស់នៅខេត្តផ្សេងគ្នា នៃប្រទេសថៃ ។
ក្រុមជនជាតិថៃទាំងនេះ ត្រូវបានកម្លាំងការពារព្រំដែនជួរមុខកម្ពុជា សហការជាមួយកម្លាំងអធិការស្រុកសំពៅលូនធ្វើការឃាត់ខ្លួន ពេលពួកគេកំពុងផ្ដុំគ្នា ព្យាយាមរកកន្លែងឆ្លងអូរព្រំដែនចេញពីប្រទេសកម្ពុជាត្រឡប់ទៅប្រទេសខ្លួនវិញទាំងកណ្ដាលអធ្រាត្រ ។ អធិការស្រុកសំពៅលូន លោក ទឹម វិឆ័យ ដែលទទូលចាត់ការលើករណីនេះ បានប្រាប់កោះសន្តិភាពថា ក្រុមជនជាតិថៃ មានប្រុស មានស្រីទាំង០៥នាក់នេះ ត្រូវកម្លាំងជួរមុខឃាត់ខ្លួន នៅក្បែរច្រៀករបៀងមាត់អូរព្រំដែនមួយកន្លែង ដែលពួកគេបម្រុងនឹងឆ្លងត្រឡប់ពីកម្ពុជា ទៅកាន់ប្រទេសខ្លួនវិញដោយខុសច្បាប់ ។
លោកអធិការបានស្រង់ចម្លើយពួកជនជាតិថៃទាំងនេះថា ពួកគេធ្វើការងារនៅតំបន់ក្រុងប៉ោយប៉ែត ខេត្តបន្ទាយមានជ័យ ។ ពួកគេចង់វិលត្រឡប់ទៅប្រទេសកំណើតខ្លួនវិញ តែគ្មានច្រកសម្រាប់ឆ្លងកាត់ទេ ក៏នាំគ្នាធ្វើដំណើរមកកាន់ទឹកដីស្រុកសំពៅលូន តាមរយៈមេខ្យល់ខ្មែរម្នាក់ និងមេខ្យល់ជនជាតិថៃម្នាក់ ដែលពួកខ្លួនមិនស្គាល់ឈ្មោះ ។
ចម្លើយរបស់ពួកគេបានប្រាប់ថា ពួកមេខ្យល់បានប្រាប់ថា ពួកគេអាចនាំឆ្លងព្រំដែនតាមច្រករបៀង នៅក្នុងស្រុកសំពៅលូនបាន ទើបពួកខ្លួនសម្រេចមកតាមមេខ្យល់ តែពេលដឹកពួកខ្លួនដល់ចំណុចខាងលើ ក្បែរអូរព្រំដែន ស្រាប់តែបាត់មេខ្យល់ លុះបន្តិចក្រោយមក ក៏ត្រូវកម្លាំងយោធាកម្ពុជា មកដល់ឃាត់ខ្លួនល្មម ។
លោក ទឹម វិឆ័យ អធិការស្រុកសំពៅលូនបានបញ្ជាក់ដែរថា ក្រោយឃាត់ខ្លួនពួកគេសួរនាំបឋម ក្រោយមក ក៏បានបញ្ជូនបន្តទៅកាន់ការិយាល័យសើបអង្កេត និងអនុវត្តនីតិវិធី នៃស្នងការខេត្តភ្លាមៗដែរ ដើម្បីចាត់ការបន្ត ៕
ចែករំលែកព័តមាននេះ