រាជធានីភ្នំពេញ ៖ អយ្យការអមសាលាដំបូងរាជធានីភ្នំពេញ កាលពីថ្ងៃទី២៥ ខែកញ្ញា ឆ្នាំ២០២៥ បានចេញសេចក្តីប្រកាសព័ត៌មាន ស្តីពី ជនសង្ស័យចំនួន០៣ នាក់(យួន២…
រាជធានីភ្នំពេញ ៖ អយ្យការអមសាលាដំបូងរាជធានីភ្នំពេញ កាលពីថ្ងៃទី២៥ ខែកញ្ញា ឆ្នាំ២០២៥ បានចេញសេចក្តីប្រកាសព័ត៌មាន ស្តីពី ជនសង្ស័យចំនួន០៣ នាក់(យួន២ នាក់ខ្មែរម្នាក់) ត្រូវបានចោទប្រកាន់ពាក់ពន្ធនឹងគ្រឿងញៀនជិត១០០គីឡូក្រាម (៩៥ គីឡូក្រាម) និងបទសម្អាតប្រាក់ ដែលពួកគេបានធ្វើចរចរនៅទីងងឹតក្នុងរាជធានីភ្នំពេញ។
អ្នកនាំពាក្យសាលាដំបូងរាជធានីភ្នំពេញ មានកិត្តិយសសូមជម្រា បជូនសាធារណៈជនមេត្តាជ្រាបថា ៖ កាលពីថ្ងៃទី១៦ ខែកញ្ញា ឆ្នាំ២០២៥ រហូតមកដល់ថ្ងៃទី១៨ ខែកញ្ញា ឆ្នាំ២០២៥ សមត្តកិច្ចនៃការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ សងការជាមួយកម្លាំងសមត្តកិច្ចនៃអធិការដ្ឋាននគរបាលខណ្ឌសែនសុខ បានបង្ក្រាបករណីគ្រឿងញៀនជាច្រើនទីតាំងស្ថិតក្នុងភូមិសាស្ត្ររាជធានីភ្នំពេញ។
ពេកប្រតិបត្តិការបង្ក្រាបបទល្មើសសមត្តកិច្ចបានឃាត់ខ្លួនជនសង្ស័យចំនួន០៣ នាក់និងដកហូតវត្ថុតាងពីជនសង្ស័យ
១-ឈ្មោះ ង្វៀង វ៉ាន់កាន់ (NGUYEN VAN CANH) ភេទប្រុស អាយុ២៨ ឆ្នាំ ជនជាតិវៀតណាម
២-ឈ្មោះ ង្វៀង កៅហ្វុក (NGUYEN CAO PHUC) ភេទប្រុស អាយុ២១ ឆ្នាំ ជនជាតិវៀតណាម
៣-ឈ្មោះ ជូ ចាន់រ៉ា ភេទប្រុស អាយុ៣៥ ឆ្នាំ ជនជាតិខ្មែរ នូវសារធាតុញៀនប្រភេទ កេតាមីន ទម្ងន់ ៤.០៩១,២១ ក្រាម សារធាតុញៀនប្រភេទ មេតំហ្វេតាមី ទម្ងន់ ៤,៦៣ ក្រាម សារធាតុញៀនប្រភេទ អ៊ិចស្តាស៊ី ទម្ងន់ ៤.២៣០,៨២ ក្រាម សារធាតុផ្សំ (មិនច្បាស់លាស់) ទម្ងន់ ៨៦.៨៨៥,២ ក្រាម ជញ្ជីងសម្រាប់ថ្លឺងគ្រឿងញៀនចំនួន០៣គ្រឿង ឧបករណ៍សម្រាប៎គៀបមាត់ស្បោង ចំនួន ០៤ គ្រឿង ឧបករណ៍សម្រាប់ក្រឡុកគ្រឿងញៀន ចំនួន ០១ គ្រឿង ឧបករណ៍សម្រាប់ប្រើប្រាស់គ្រឿងញៀន ចំនួន ០២ និងសំបកស្បោងប្លាស្ទិចសម្រាប់ច្រកគ្រឿងញៀនមួយចំនួន ព្រមទាំងភស្តុតាងផ្សេងទៀតដែលសង្ស័យមានជាប់ពាក់ពន្ធនឹងការសម្អាតប្រាក់។
បន្ទាប់ពីបញ្ចាប់ប្រតិបត្តិការនេះសមត្តកិច្ចបានកសាងសំណុំរឿង និងបញ្ជូនជនសង្ស័យទាំង០៣ នាក់ខាងលើមកកាន់អយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធី។ ចំណែកបក្ខពួកដែលពាក់ពន្ធនឹងករណីគ្រឿងញៀនខាងលើ សមត្តកិច្ចបាននឹងកំពុងស្រាវជ្រាវបន្ត។
ក្រោយពីបានទទួល និងពិនិត្យលើសំណុំរឿងនេះ តំណាងអយ្យការបានសម្រេចចោទប្រកាន់លើជនសង្ស័យទាំង០៣ នាក់ និងបក្ខពួក ពីបទ.ផ្តើមគំនិត សមគំនិត ផលិត ដឹកជញ្ជូន រក្សាទុក និងប្រើប្រាស់ដោយខុសច្បាប់នូវសារធាតុញៀន និងសម្អាតប្រាក់ ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០២៤ រហូតមកដល់ថ្ងៃទី១៦ ខែកញ្ញា ឆ្នាំ២០២៥ ជាបទល្មើសព្រហ្មទណ្ឌ និងត្រូវផ្តន្ទាទោសតាមបញ្ញត្តិមាត្រា ២៨ មាត្រា ២៩ នៃក្រមព្រហ្មទណ្ឌ មាត្រា ៣៩ មាត្រា ៤០ មាត្រា ៤៥ មាត្រា ៤៧ មាត្រា ៤៨ មាត្រា ៥៣ នៃច្បាប់ស្តីពីការត្រួតពិនិត្យគ្រឿងញៀន និងមាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេវរកម្ម។
ក្រោយពីតំណាងអយ្យការធ្វើការចោទប្រកាន់ ជនសង្ស័យទាំង០៣ នាក់ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនដាក់ពន្ធនាគារជាបណ្តោះអាសន្ន ដើម្បីរង់ចាំកាត់ទោសទៅតាមផ្លូវច្បាប់៕
ចែករំលែកព័តមាននេះ