ទីក្រុងព្យុងយ៉ាង៖ កូរ៉េខាងជើងកំពុងអភិវឌ្ឍមីស៊ីលអន្តរទ្វីបឈានដល់ដំណាក់កាលចុងក្រោយហើយ។ បើផលិតបានសម្រេច កូរ៉េខាងជើងអាចបាញ់មីស៊ីលនេះដល់ទឹកដីអាមេរិកដោយបំពាក់ក្បាលគ្រាប់នុយក្លេអ៊ែរ។ ប៉ុន្តែកូរ៉េខាងជើងនៅខ្វះខាតចំណុចមួយទៀតគឺបច្ចេកវិទ្យាបញ្ជូនគ្រាប់មីស៊ីលឱ្យធ្លាក់ពីលើអាកាសចុះទៅផែនដី។ នេះបើយោងតាមការអះអាងរបស់ប្រធានាធិបតីកូរ៉េខាងត្បូង លោកលីជេម្យុង។
លោកលីជេម្យុងដែលកំពុងស្ថិតនៅទីក្រុងញូយ៉កដើម្បីចូលរួមមហាសន្និបាតអង្គការសហប្រជាជាតិបានរៀបចំពិធីសំណេះសំណាលជាមួយអ្នកវិនិយោគ។ ដើម្បីទាក់ទាញអ្នកវិនិយោគ និងដោះស្រាយបញ្ហាសេដ្ឋកិច្ច លោកនឹងកាត់បន្ថយហានិភ័យផ្នែកសន្តិសុខដែលបង្កឡើងដោយកូរ៉េខាងជើង។ លោកថ្លែងបន្តទៀតថាមិនថាពួកគេអភិវឌ្ឍមីស៊ីលដើម្បីទុកតថ្លៃជាមួយអាមេរិកនៅពេលមានការចរចាគ្នា ឬមិនថាពួកគេផលិតដើម្បីការពាររបបដឹកនាំរបស់ពួកគេនោះទេ ពួកគេកំពុងផលិតមីស៊ីលអន្តរទ្វីបបំពាក់ក្បាលគ្រាប់នុយក្លេអ៊ែរដើម្បីធ្វើម៉េចបាញ់ឱ្យដល់ទឹកដីអាមេរិក។
រហូតមកដល់ពេលនេះ កូរ៉េខាងជើងមិនទាន់ធ្វើបានសម្រេចទេ។ ប៉ុន្តែពួកគេខិតខំអភិវឌ្ឍដល់ដំណាក់កាលចុងក្រោយហើយ ហើយនៅខ្វះតែបច្ចកវិទ្យាទម្លាក់គ្រាប់មីស៊ីលពីលើអាកាសមកដីតែប៉ុណ្ណោះ។ ចំពោះការខ្វះខាតត្រង់ចំណុចនេះលោកលីយល់ថាកូរ៉េខាងជើងអាចនឹងដោះស្រាយចេញឆាប់ៗនេះ។ កាលពីឆ្នាំមុន កូរ៉េខាងជើងបាញ់សាកល្បងគ្រាប់មីស៊ីលអន្តរទ្វីបដែលធំជាងគេរបស់ខ្លួនឈ្មោះវ៉ាសុង១៩ (Hwasong-19) ដែលហោះបានខ្ពស់សន្លឹមទៅក្នុងអាកាស។
ប្រធានាធិបតីកូរ៉េខាងត្បូងយល់ថាមានតែលោកត្រាំម្នាក់ប៉ុណ្ណោះដែលអាចនិយាយជាមួយមេដឹកនាំកូរ៉េខាងជើងបាន។ កាលពីខែសីហា លោកត្រាំប្រាប់ថាគាត់ចង់ជួបមុខផ្ទាល់ជាមួយលោកគីមជុងអ៊ុន អាចនៅក្នុងឆ្នាំនេះតែម្ដង។ គ្រាន់តែឡើងកាន់អំណាចកាលពីខែមិថុនាភ្លាម មេដឹកនាំកូរ៉េខាងត្បូងក៏ចាប់ផ្ដើមស្វះស្វែងរកការកែសម្រួលទំនាក់ទំនងឡើងវិញជាមួយកូរ៉េខាងជើង និងស្នើឱ្យមានការសន្ទនាគ្នារវាងប្រទេសទាំង២។ ប៉ុន្តែកូរ៉េខាងជើងបដិសេធរាល់សំណើទាំងនេះ។ លោកគីមជុងអ៊ុនថ្លែងថាការជួបសន្ទនាគ្នាជាមួយអាមេរិកអត់បញ្ហាទេ។ សំខាន់កុំឱ្យតែអាមេរិកទាមទារឱ្យកូរ៉េខាងជើងបោះបង់ចោលកម្មវិធីនុយក្លេអ៊ែរទៅបានហើយ។ នេះបើយោងតាមការផ្សាយរបស់ទីភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ