រាជធានីភ្នំពេញ ៖ ឆ្នាំ២០២៥នេះ ត្រូវបានថ្នាក់ដឹកនាំ នៃប្រទេសទាំងពីរ បានចាត់ទុកថា គឺជាឆ្នាំទេចរណ៍កម្ពុជា-ចិន ហើយឆ្នាំនេះដែរមានភ្ញៀវទេចរចិន បានមកកម្ពុជា មានចំនួនកើនរហូតដល់៨០ម៉ឺននាក់…
រាជធានីភ្នំពេញ ៖ ឆ្នាំ២០២៥នេះ ត្រូវបានថ្នាក់ដឹកនាំ នៃប្រទេសទាំងពីរ បានចាត់ទុកថា គឺជាឆ្នាំទេចរណ៍កម្ពុជា-ចិន ហើយឆ្នាំនេះដែរមានភ្ញៀវទេចរចិន បានមកកម្ពុជា មានចំនួនកើនរហូតដល់៨០ម៉ឺននាក់ ខណៈទេសចរណ៍កម្ពុជា ក៏បានទៅចិន មានចំនួនច្រើនដែរ។ នេះបើតាមការ បញ្ជាក់របស់ឯកអគ្គរដ្ឋទូតចិន ប្រចាំនៅកម្ពុជា ។
ថ្លែងក្នុងពិធីការសម្តែងសិល្បៈ និងការផ្លាស់ប្តូរវប្បធម៌ឆ្នាំទេចរណ៍កម្ពុជា-ចិន រាត្រី Tsing Dao នៅល្ងាចថ្ងៃទី២៥ ខែកញ្ញា ឆ្នាំ២០២៥ ឯកឧត្តម វ៉ាង វិនពិន ឯកអគ្គរដ្ឋទូតសាធារណរដ្ឋប្រជាមានិតចិន ប្រចាំនៅកម្ពុជា បានលើកឡើងថា ឆ្នាំ២០២៥ គឺជាឆ្នាំទេសចរណ៍រវាងចិន និងកម្ពុជា ដែលចាប់ផ្តើមតាំងពីខែមេសាមក ។
ឯកឧត្តម បានលើកឡើងថា បណ្តាខេត្តនានារបស់ចិន បានធ្វើការស្តែងសិល្បៈ ដើម្បីផ្សព្វផ្សាយពីតំបន់ទេសចរណ៍នៅកម្ពុជា។ មានក្រុមហ៊ុនអាកាសចរណ៍ចិនកើនឡើង បានធ្វើការហោះហើរត្រង់ពីកាន់ប្រទេសកម្ពុជា ។ ទន្ទឹមនឹងនេះ កម្ពុជាក៏បានធ្វើការចូលរួមតាំងពិព័រណ៌ទេសចរណ៍ នៅក្នុងប្រទេសចិន និងបានធ្វើការចុះអនុស្សារណៈជាមួយគ្នាទាក់ទង និងទាក់ទាញភ្ញៀវទេសចរផងដែរ ។
ជាមួយគ្នានោះដែរ ឯកឧត្តម អគ្គរដ្ឋទូតចិន ក៏បានគូសបញ្ជាក់ថា ៖ «ឆ្នាំ២០២៥នេះ ភ្ញៀវទេសចរចិនមកកម្ពុជា មានចំនួនកើនឡើង ជាង៨០ម៉ឺននាក់ ដែលមានចំនួនកើន៤៥.៧% បើប្រៀបធៀបនឹងរយៈពេលដូចគ្នានៅឆ្នាំមុន។ ហើយភ្ញៀវទេសចរណ៍កម្ពុជា បានទៅប្រទេសចិន ក៏មាន ចំនួនកើនឡើងដែរ» ។
បើតាមឯកឧត្តមទូត បានអះអាងថា សម្រាប់ឆ្នាំទេសចរណ៍រវាងចិន និងកម្ពុជា មានចំនួន អ្នកទេសចរណ៍ យ៉ាងល្អប្រសើរ ហើយកិច្ចសហប្រតិបត្តិការរវាងប្រទេសទាំងពីរបានកើនឡើងយ៉ាងប្រសើរផងដែរ ។
លើសពីនេះទៅទៀត ឯកឧត្តមទូត បានលើកឡើងថា កម្ពុជា និងចិន មានវប្បធម៌ តភ្ជាប់ជាមួយគ្នា ហើយមានមែកធាងជាមួយគ្នា និងមានទេសចរណ៍ដ៏សំបូរបែប ពិសេសអាចនិយាយថា មានសក្តានុពលយ៉ាងខ្លាំងក្លាចំពោះវិស័យទេសចរណ៍នេះ ។
ក្នុងឱកាសនោះដែរ ឯកឧត្តម ហោ សារុន រដ្ឋលេខាធិការក្រសួងទេសចរណ៍ បានលើកឡើងថា វិស័យទេសចរណ៍បានរួមចំណែកយ៉ាងសំខាន់ ដល់ការអភិវឌ្ឍសេដ្ឋកិច្ច-សង្គម ជាពិសេសលំហូរចូលយ៉ាងច្រើន នៃភ្ញៀវទេសចរចិនមកកម្ពុជា នៅមុនវិបត្តិជំងឺកូវីដ-១៩ មានចំនួនប្រមាណ២,៤លាននាក់ នៅឆ្នាំ២០១៩ ។
ឯកឧត្តម បានឲ្យដឹងថា កាលពីឆ្នាំ២០២៤ កន្លងទៅ កម្ពុជាទទួលបានភ្ញៀវទេសចរអន្តរជាតិស រុបប្រមាណ៦,៧លាននាក់ កើនឡើងប្រមាណ២៣% ធៀបនឹងឆ្នាំ២០២៣ ក្នុងនោះ ភ្ញៀវទេសចរចិនមានចំនួនប្រមាណ៨៥ម៉ឺននាក់ កើនឡើង៥៥%។ សម្រាប់រយៈពេល៨ខែដើមឆ្នាំ២០២៥ នេះ កម្ពុជាទទួលបានភ្ញៀវទេសចរអន្តរជាតិប្រមាណ ៤,០៥លាននាក់ ក្នុងនោះ ភ្ញៀវទេសចរចិនមានចំនួន ៧៨,៥ ម៉ឺននាក់ កើនឡើង ៤៥,៧% ។
ឯកឧត្តមបញ្ជាក់ថា ៖ «តាមនិន្នាការនេះ យើងខ្ញុំសង្ឃឹមយ៉ាងមុតមាំថា ការកំណត់យកឆ្នាំ២០២៥ ជា «ឆ្នាំទេសចរណ៍ កម្ពុជា-ចិន» នឹងក្លាយជាចលករយ៉ាងសំខាន់ក្នុងការជំរុញកំណើនភ្ញៀ វទេសចរចិនមកទស្សនាកម្ពុជា បង្កើនការវិនិយោគក្នុងវិស័យទេសចរណ៍ និងការផ្លាស់ប្តូរវប្បធម៌រវាងប្រទេសទាំងពីរ សំដៅរួមចំណែកដល់ការសម្រេចបំណងប្រាថ្នាក្នុងការកសាងសហគមន៍ជោគវាសនារួមកម្ពុជា-ចិន។ យើងសង្ឃឹមថា កម្ពុជានឹងទទួលបានភ្ញៀវទេសចរចិន លើសពីមួយលាននាក់សម្រាប់ឆ្នាំ២០២៥នេះ» ។
ឯកឧត្តម ថា អនាគត នៃវិស័យទេសចរណ៍កម្ពុជា គឺមិនអាចកាត់ផ្ដាច់ពីការស្រូបទាញកំណើន នៃលំហូរទេសចរ និងវិនិយោគិនចិន បានឡើយ។ សម្រាប់កម្ពុជា យើងបានត្រៀមលក្ខណសម្បត្តិគ្រប់គ្រាន់ និងបន្តខិតខំពង្រឹងការត្រៀមលក្ខណសម្បត្តិទទួលភ្ញៀវទេសចរចិន តាមរយៈការពង្រឹងការអនុវត្តស្តង់ដាគុណភាព ផលិតផល និងសេវាកម្មទេសចរណ៍សម្រាប់ទីផ្សារទេសចរណ៍ចិន (China-ready) ការបង្កើនបទពិសោធល្អៗគួរឱ្យចងចាំសម្រាប់ភ្ញៀវទេសចរ ការដាក់ឱ្យដំណើរការប្រព័ន្ធ E-arrival ការសម្រួលការធ្វើដំណើរនៅតាមច្រកទ្វារអន្តរជាតិ ការធ្វើពិពិធកម្មផលិតផលទេសចរណ៍ ការរៀបចំព្រឹត្តិការណ៍ និងពិព័រណ៌នានា ការផ្សព្វផ្សាយ និងលើកកម្ពស់រូបភាពគោលដៅទេសចរណ៍អាទិភាពជាដើម ។ល។
ជាមួយគ្នានោះដែរ ឯកឧត្តមបង្ហាញការជឿជាក់ថា កិច្ចខិតខំប្រឹងប្រែងខាងលើ ពិតជានឹងបង្កើនភាពទាក់ទាញទេសចរបន្ថែមពីប្រទេសចិន ហើយក៏សង្ឃឹមថា ប្រជាជននៃ ប្រទេសចិនទាំងមូល ជាពិសេសប្រជាជន នៃខេត្តសានតុង ផ្ទាល់នឹងធ្វើការជ្រើសរើសមក ទស្សនាប្រទេសកម្ពុជានៅគ្រប់រដូវកាល ពិសេសក្នុងរដូវកាលនេះ ដែលជារដូវកាលបៃតង Green Season របស់កម្ពុជា។
ឯកឧត្តម បន្ថែមថា ទន្ទឹមនេះ ដើម្បីជំរុញលំហូរភ្ញៀវទេសចររវាងកម្ពុជា-ចិនពិសេសតាមរយៈយុទ្ធនាការ «ឆ្នាំទេសចរណ៍ កម្ពុជា-ចិន» ដែលយើងបាន និងកំពុងអនុវត្តរួមគ្នាក្នុងរយៈពេលមួយឆ្នាំពេញ គិតចាប់ពីការប្រកាសបើកជាផ្លូវការ ឆ្នាំទេសចរណ៍កម្ពុជា-ចិន» កាលពីខែ ឧសភា ឆ្នាំ២០២៥ រហូតដល់ខែឧសភា ឆ្នាំ២០២៦ និងឆ្នាំបន្ត បន្ទាប់ទៀត ក្រសួងទេសចរណ៍ ក៏បានត្រៀមលក្ខណៈរួចជាស្រេចក្នុងការសហការជាមួយមិត្តចិនដែលយើង នឹងរៀបចំជាព្រឹត្តិការណ៍ និងកម្មវិធីដ៏សម្បូរបែបច្នៃប្រឌិតមានភាពទាក់ទាញ និងរស់រវើក ដែលរួមមាន ៖ ព្រឹត្តិការណ៍វប្បធម៌ផ្សារភ្ជាប់ទេសចរណ៍ ព្រឹត្តិការណ៍ពិព័រណ៍ ព្រមជាមួយការរៀបចំ និងចូលរួមកម្មវិធីមួយចំនួនទៀត ទាំងនៅប្រទេសកម្ពុជា និងនៅប្រទេសចិនផងដែរ ។
ចំណែកលោក ចឹង ចានយ៉ុង សមាជិកអចិន្ត្រៃយ៍ នៃគណៈកម្មការបក្សខេត្តសានតុង ប្រទេសចិន បានលើកឡើងថា ប្រទេសកម្ពុជាជាប្រទេសដែលមានអរិយធម៌បុរាណប្រវត្តិសាស្ត្រដ៏យូរលង់ ហើយបានបង្កើតអរិយធម៌ខ្មែរដ៏អស្ចារ្យ។ ប្រទេសចិន និងកម្ពុជាជា ប្រទេសជិតខាងល្អ និងជាមិត្តភក្តិដែកថែបនឹងគ្នា។ កាលពីខែមេសាឆ្នាំនេះ ឯកឧត្តម ស៊ី ជីនពីង (Xi Jinping) ប្រធានាធិបតីចិន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានជួបពិភាក្សាគ្នានៅទីក្រុងភ្នំពេញ ហើយបានប្រកាសរួមគ្នាឆ្នាំ 2025 ជា “ឆ្នាំទេសចរណ៍ចិន-កម្ពុជា” ដែលនាំមក នូវឱកាសសំខាន់ៗសម្រាប់ការធ្វើឱ្យកាន់តែស៊ីជម្រៅនូវកិច្ច សហប្រតិបត្តិការលើវិស័យវប្បធម៌ និងទេសចរណ៍រវាងប្រទេសចិន-កម្ពុជា។
លោកបញ្ជាក់ថា ៖ «ការប្រារព្ធពិធីនេះ គឺជាសកម្មភាពជាក់ស្តែងមួយ ដើម្បីអនុវត្តការឯកភាពដ៏សំខាន់ ដែលសម្រេចបានរវាងប្រមុខដឹកនាំនៃប្រទេសទាំងពីរ ហើយក៏ជាវិធានការជាក់ស្តែងមួយ ដើម្បីបន្តទំនាក់ទំនងមិត្តភាពដ៏រឹងមាំរវាងចិននិងកម្ពុជា» ៕
ចែករំលែកព័តមាននេះ