ខេត្តកំពត ៖ ប្តីប្រពន្ធមួយគ្រួសារមានកូន៤នាក់ក្នុងបន្ទុក មានស្រុកកំណើតនៅក្រុងដូនកែវ ខេត្តតាកែវ បានមករស់នៅក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ខេត្តកំពត ដោយស្នាក់នៅក្នុងផ្ទះជួលមួយកន្លែងនៅភូមិសង្កាត់ខាងលើ…
ខេត្តកំពត ៖ ប្តីប្រពន្ធមួយគ្រួសារមានកូន៤នាក់ក្នុងបន្ទុក មានស្រុកកំណើតនៅក្រុងដូនកែវ ខេត្តតាកែវ បានមករស់នៅក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ខេត្តកំពត ដោយស្នាក់នៅក្នុងផ្ទះជួលមួយកន្លែងនៅភូមិសង្កាត់ខាងលើ ដើម្បីប្រកបអាជីវកម្មលក់ពងមាន់អាំង ។
បើតាមការរៀបរាប់ពីស្ត្រីឈ្មោះ សុខ រ៉ា អាយុ៤២ឆ្នាំ ជាប្រពន្ធ និងជាអ្នកច្នៃផ្សំគ្រឿងធ្វើពងមាន់អាំងឱ្យប្តីយកទៅលក់បានប្រាប់អ្នកយកពត៌មានយើង កាលពីថ្ងៃទី២៣ កញ្ញា ឆ្នាំ ២០២៥ថា ការចាប់មុខរបរធ្វើពងមាន់អាំងនេះ រូបគាត់២នាក់ប្តីប្រពន្ធបានចាប់អាជីពនេះអស់រយៈពេល៧ឆ្នាំមកហើយ ។ កាលនោះ ធ្វើនៅខេត្តតាកែវអស់រយៈពេល៤ឆ្នាំ ដោយសារតែនៅខេត្តតាកែវមុខរបរនេះ គេធ្វើច្រើនគ្នាពេកពិបាកក្នុងការលក់ដូរពុំសូវដាច់ ហើយក៏នាំប្តីប្រពន្ធចេញពីស្រុកកំណើតមកមកស្នាក់នៅផ្ទះជួលក្នុងក្រុងកំពតដើម្បីបន្តអាជីពលក់ពងមាន់អាំងនេះអស់រយៈពេល៣ឆ្នាំមកហើយ ។
ស្ត្រីរូបនោះបានឲ្យដឹងទៀតថា ការធ្វើអាជីវកម្មលក់ពងមាន់អាំងនេះ ការរកចំណូលឬផលចំណេញមិនបានទៀងទាត់នោះទេ មានថ្ងៃខ្លះស្រណុកលក់ ថ្ងៃខ្លះក៏លក់មិនអស់ផងដែរ ហើយការលក់បានដាច់ក៏មិនសូវបានចំណេញដូចពីមុននោះទេ ដោយសារពងមាន់ទិញចូលពីម៉ូយឡើងថ្លៃជាងមុន រីឯលក់ចេញនៅតម្លៃដដែល ចំណេញដែរតែចំណេញតិច ។ គ្រាន់តែផាត់ថ្លៃគ្រឿងផ្សំ ពងមាន់ចំនួន១០០ពង នៅសល់ប្រាក់ចំណេញបានត្រឹមតែ៦ទៅ៧ម៉ឺនរៀលប៉ុណ្ណោះ បើថ្ងៃណាលក់មិនអស់ក៏រកមិនឃើញប្រាក់ចំណេញផងដែរ ។
ស្ត្រីជាប្រពន្ធឲ្យដឹងទៀតថា ពងមាន់ដែលម៉ូយយកមកដាក់ឲ្យម្តងមួយដុំក្នុងមួយដុំនោះមានចំនួន៣០០គ្រាប់ (ក្នុង១ដុំ) តម្លៃ១៤ម៉ឺនរៀល ។ ហើយក្នុង៣០០គ្រាប់នេះ គឺត្រូវច្នៃលាយគ្រឿងរួចយកទៅចំអិនឲ្យឆ្អិនទាំងអស់ក្នុងមួយថ្ងៃ ។ រីឯរយៈពេលចំអិនចាប់ពីម៉ោង៧០០ព្រឹក រហូតដល់ម៉ោង១២,០០នាទីយប់ ទើបអាចឆ្អិន ក្នុងការចំអិនពងនេះ ត្រូវការមើលភ្លើងជាប់ជាប្រចាំមិនអាចធ្វេសប្រហែសបានឡើយ បើភ្លើងឆេះខ្លាំងពេកក៏មិនបាន ភ្លើងឆេះតិចពេកក៏មិនបានដែរ ឲ្យឆេះម៉ាល្មម ទើបមិនខូចពងមាន់ ស្ត្រីរូបនេះបានបញ្ជាក់ថា កូនៗគាត់ទាំងតូចទាំងធំចេះមើលភ្លើងចំហុយពងមាន់ទាំងអស់គ្នា ដោយសាររូបគាត់បានបង្រៀនកូនៗ ។
គាត់បានឲ្យដឹងទៀតថា មុខរបរច្នៃធ្វើពងមាន់អាំងលក់នេះ ទោះបីចំណេញតិចក៏ពិតមែន ប៉ុន្តែវាអាចដោះស្រាយជីវភាពក្នុងគ្រួសារបានមួយកម្រិត ។ ហើយការងារនេះជាការងារស្រាលដែលរូបគាត់ជាស្ត្រីអាចធ្វើបាននិងអាចឈ្លៀតពេលជួយធ្វើការងារផ្ទះក្រោយពីចប់កិច្ចការឆ្នៃគ្រឿងធ្វើពងមាន់នេះរួចរាល់ផងដែរ៕
ចែករំលែកព័តមាននេះ