ខេត្តកំពង់ចាម ៖ ពិតជាគួរឱ្យកោតសរសើរដោយយុវតីជាកូនកសិករជនបទម្នាក់ បានខិតខំរៀនសូត្រទន្ទេញមេរៀន និងធ្វើលំហាត់ ដោយប្រឹងតស៊ូមុនប្រឡងបាក់ឌុបមួយខែ ។ ខណៈពេលឪពុកជូនកូនមកប្រឡងអត់ងងុយ យកកែបម៉ូតូធ្វើជាខ្នើយសម្រាន្តលក់មួយភាំង ដើម្បីយកកម្លាំង…
ខេត្តកំពង់ចាម ៖ ពិតជាគួរឱ្យកោតសរសើរដោយយុវតីជាកូនកសិករជនបទម្នាក់ បានខិតខំរៀនសូត្រទន្ទេញមេរៀន និងធ្វើលំហាត់ ដោយប្រឹងតស៊ូមុនប្រឡងបាក់ឌុបមួយខែ ។
ខណៈពេលឪពុកជូនកូនមកប្រឡងអត់ងងុយ យកកែបម៉ូតូធ្វើជាខ្នើយសម្រាន្តលក់មួយភាំង ដើម្បីយកកម្លាំង ហើយកូនស្រីវិញខំរៀនមើលគណិតវិទ្យា នៅក្រោមម្លប់ឈើមាត់ទន្លេក្រុងកំពង់ចាម ដើម្បីត្រៀមចូលប្រលងថ្ងៃផ្ដាច់ព្រាត់ ទីបំផុតយុវតីនេះ បានប្រឡងជាប់និទ្ទេសA ពិតជានឹកស្មានមិនដល់ ។
យុវតីធីម មករា អាយុ១៧ឆ្នាំ មានទីលំនៅភូមិអូរប៉ិ ឃុំជយោ ស្រុកចំការលើ បានប្រាប់ឲ្យដឹងនារសៀល ថ្ងៃទី២៣ ខែកញ្ញា ឆ្នាំ២០២៥ថា: ចំពោះមណ្ឌលប្រឡងនៅវិទ្យាល័យព្រះសីហនុ ក្រុងកំពង់ចាម ផ្នែកខាងត្បូងបន្ទប់ប្រឡងលេខ៣១ លេខតុ៧៧៤ ទោះបីឪពុកម្ដាយជាកសិករនាង គឺជាកូនបងគេក្នុងចំណោមបងប្អូន៤នាក់ បានប្រឹងប្រែងយកចិត្តទុកដាក់រៀនសូត្រ នៅថ្នាក់ទី១២ ដែលត្រៀមប្រលងបាក់ឌុប គឺពេលថ្ងៃរៀនគួរពេលយប់ធ្វើលំហាត់ ហើយនិងក្រោកម៉ោង៤ទាបភ្លឺដើម្បីទន្ទេញមេរៀន ។
យុវតីរូបនេះបានប្រាប់បន្តឲ្យដឹងទៀតថា ពេលរៀននៅបឋមសិក្សាដល់ថ្នាក់វិទ្យាល័យប៊ុន រ៉ានី-ហ៊ុន សែន ស្ពឺ ចំពោះចំណាត់ថ្នាក់រាល់ខែគឺទទួលបានពិន្ទុគ្រាន់បើ ចំណែកប្អូនៗវិញក៏រៀនពូកែដូចជានាងដែរ។ក្តីសម័យពេលខាងមុខនឹងត្រូវប្រលងយកជំនាញផ្នែកIT ឬឌីហ្សាញនៅសាកលវិទ្យាល័យរាជធានីភ្នំពេញ ។ បើមានឱកាស គឺចង់បន្តសិក្សានៅប្រទេសជប៉ុនបន្ថែមទៀតបើតាមលទ្ធភាពអាចទៅរួច ។
គួររំលឹកថា ៖ ក្រឡេកមើលពីទឹកចិត្តរបស់ឪពុកមានគុណទំហំធំធេងណាស់មិនអាចកាត់ថ្លៃបាន ទោះបីងងុយយ៉ាងណាក៏សុខចិត្តអង្គុយឈ្ងោកយកក្បាលដាក់លើកែបម៉ូតូ ហើយសម្រានលក់បន្តិចក្រោយពិសាអាហារថ្ងៃត្រង់រួច ស្របពេលខ្យល់ជំនោរបក់មករៀងត្រជាក់ផង ។
ចំណែកកូនស្រីបានអង្គុយក្បែរក្រោមម្លប់ឈើសួនច្បារមាត់ទន្លេក្រុងកំពង់ចាម នៅវេលាម៉ោងជាង១២ថ្ងៃត្រង់ទី២៩ សីហា ឆ្នាំ២០២៥ ដោយបំប៉នមើលមេរៀនគណិតវិទ្យា ត្រៀម និងចូលប្រលងនាថ្ងៃបង្ហើយ នៅមណ្ឌលវិទ្យាល័យព្រះសីហនុ ក្រុងកំពង់ចាម ។ ទោះជាយ៉ាងណា មេឃរាងខ្មៅកល់នឹងរកភ្លៀងទៀតផង ។
យុវតីឈ្មោះធីម មករា អាយុ១៧ឆ្នាំ បានរៀបរាប់ឲ្យដឹងថា: មុនពេលប្រឡងក្នុងគ្រាដែលកំពុងសិក្សានៅស្រុកកំណើតរបស់ខ្លួនពេលដែលចេញពីផ្ទះមកកាន់សាលារៀន គឺមានមិត្តភក្កិស្រីរៀនជាមួយគ្នាបានឌុបពីផ្ទះទៅកាន់សាលា ហើយមានពេលខ្លះនាងក៏បានជិះម៉ូតូឌុបមិត្តម្ដងម្នាក់ ក្នុងស្មារតីសាមគ្គីភាព ហើយតែងតែក្រើនរំលឹកមេរៀនដែលគ្រូបានបង្រៀននៅសាលា ដោយលើកយកចំណុចសំខាន់ៗ ដើម្បីត្រិះរិះពិចារណា និងខិតខំរៀនសូត្រតាមមុខវិជ្ជានីមួយៗ ដោយទទួលបានលទ្ធផលគ្រាន់បើគ្រប់មុខទាំងអស់ គឺចំណាត់ថ្នាក់លេខ៦ ប្រចាំឆ្នាំ ហើយនាង គឺកូនបងគេក្នុងចំណោមបងប្អូនបួននាក់ ដែលមានឪពុកម្ដាយជាកសិករ។
យុវតីរូបនេះបានរៀបរាប់បន្តឱ្យដឹងទៀតថា មុនពេលប្រឡងមួយថ្ងៃត្រូវបានឪពុករបស់ខ្លួនឌុបតាមម៉ូតូមួយគ្រឿង ចេញពីស្រុកកំណើតដើម្បីមកប្រឡងបាក់ឌុបនៅមណ្ឌលវិទ្យាល័យព្រះសីហនុ ក្រុងកំពង់ចាម ផ្នែកវិទ្យាសាស្ត្រ ចំពោះមុខវិជ្ជាដែលត្រូវប្រឡងក្នុងនោះរួមមាន ៖ ប្រវត្តិវិទ្យា ជីវៈវិទ្យា គីមីវិទ្យា ភាសាអង់គ្លេស អក្សរសាស្ត្រខ្មែរ រូបវិទ្យា និងគណិតវិទ្យា ដែលត្រូវចូលប្រឡងនារសៀលថ្ងៃទី២៩ សីហា។
ដោយសារពេលទំនេរម៉ោងនៅសល់រាងច្រើនបន្តិច ត្រូវបានឪពុករបស់ខ្លួនឌុបតាមម៉ូតូមួយគ្រឿងមកអង្គុយក្រោមម្លប់ឈើសួនច្បារមាត់ទន្លេក្រុងកំពង់ចាម ក្នុងនោះនាងបានប្រឹងមើលដោយប្រើប្រាជ្ញាលើមុខវិជ្ជាគណិត ដែលនឹងត្រៀមចូលប្រឡង រកគន្លឹះសំខាន់ៗ ដើម្បីឱ្យងាយឆាប់យល់ ។ ចំពោះការរំពឹងលទ្ធផលប្រឡងនេះ សង្ឃឹម៦០ទៅ៧០% ពេលប្រឡងជាប់នឹងត្រូវបន្តរៀនផ្នែកឧត្តមសិក្សាលើជំនាញវិទ្យាសាស្ត្រកុំព្យូទ័រ(IT) ធ្វើយ៉ាងណាប្រឹងរៀនពេលចេញបម្រើការងារជួយសម្រាលបន្ទប់ក្រុមគ្រួសារដែលឪពុកម្ដាយជាកសិករខំប្រឹងថែរក្សាបីបាច់ឱ្យរៀនសូត្រ តាំងពីតូចរហូតដល់វ័យ១៧ឆ្នាំ។
លោកលី ម៉េងសាន ប្រធានមន្ទីរអប់រំយុវជន និងកីឡាខេត្តមានប្រសាសន៍ឲ្យដឹងថា ចំពោះការប្រឡងរយៈពេល២ថ្ងៃជាថ្ងៃទី ២៨-២៩សីហា ឆ្នាំ២០២៥ ដំណើរការប្រឡងតាមមណ្ឌលចំនួន១៥ នៅក្នុងខេត្តកំពង់ចាម បានដំណើរការទៅដោយរលូនក្នុងនោះមានសិស្ស មិនបានមកប្រឡងចំនួន១០៤នាក់ ។
ក្រោយបញ្ចប់ការប្រឡងពីរថ្ងៃនេះ ក្នុងនាមរូបលោករំពឹងទុកថា សិស្សប្រឡងជាប់និងកើនលើសឆ្នាំ២០២៤ ។ ចំពោះលទ្ធផលប្រឡងបាក់ឌុបក្នុងនោះសិស្សជាប់និទ្ទេសA:១៤១នាក់ B :៦០៧នាក់ C :១៨២៥នាក់ D: ២៩០២នាក់ E : ២២៧៥នាក់ ៕
ចែករំលែកព័តមាននេះ