ខេត្តត្បូងឃ្មុំ ៖ ឯកឧត្តម ប៉ែន កុសល្យ អភិបាល នៃគណៈអភិបាលខេត្តត្បូងឃ្មុំ អញ្ជើញជាអធិបតី ចែកកញ្ចប់ស្បៀងបម្រុងរបស់រាជរដ្ឋាភិបាលកម្ពុជា ជូនដល់គ្រួសាររងគ្រោះដោយសារទឹកជំនន់ទន្លេមេគង្គ…
ខេត្តត្បូងឃ្មុំ ៖ ឯកឧត្តម ប៉ែន កុសល្យ អភិបាល នៃគណៈអភិបាលខេត្តត្បូងឃ្មុំ អញ្ជើញជាអធិបតី ចែកកញ្ចប់ស្បៀងបម្រុងរបស់រាជរដ្ឋាភិបាលកម្ពុជា ជូនដល់គ្រួសាររងគ្រោះដោយសារទឹកជំនន់ទន្លេមេគង្គ ឆ្នាំ២០២៥ ចំនួន៩៩៨គ្រួសារ ដែលកំពុងស្នាក់នៅទីទួលសុវត្ថិភាព ស្ថិតនៅឃុំទន្លេបិទ ស្រុកត្បូងឃ្មុំ ។ នេះបើយោងតាមផេករដ្ឋបាលខេត្តត្បូងឃ្មុំបានផ្សាយនាថ្ងៃទី២១ ខែកញ្ញា ឆ្នាំ២០២៥ ។
ក្នុងនោះដែរក្រសួងមហាផ្ទៃ បានបញ្ជាក់ថា ក្នុងពិធីនេះ ធ្វើឡើងនាព្រឹកថ្ងៃអាទិត្យ ទី២១ ខែកញ្ញា ឆ្នាំ២០២៥ មានការចូលរួមពី ឯកឧត្តម សមាជិកក្រុមប្រឹក្សាខេត្ត ឯកឧត្តម អភិបាលរងខេត្ត មន្ទីរ/អង្គភាពជុំវិញខេត្ត កងកម្លាំងទាំង៣ប្រភេទ អ្នកពាក់ព័ន្ធជាច្រើនរូបទៀត ។
មានប្រសាសន៍នាឱកាសនោះ ឯកឧត្តម ប៉ែន កុសល្យ អភិបាល នៃគណៈអភិបាលខេត្តត្បូងឃ្មុំ បានពាំនាំនូវប្រសាសន៍ផ្តាំផ្ញើរសាកសួរសុខទុកពីសម្ដេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ច័ន្ទមុន្នី ហ៊ុន ម៉ាណែត ដែលជានិច្ចកាលសម្តេចទាំងទ្វេ តែងតែយកចិត្តទុកដាក់ចំពោះបងប្អូនប្រជាពលរដ្ឋដែលរងផលប៉ះពាល់ដោយសារគ្រោះមហន្តរាយនានា ។
នាឱកាសនោះ ឯកឧត្តម អភិបាលខេត្ត បានអំពាវនាវឱ្យបងប្អូនប្រជាពលរដ្ឋ ត្រូវបង្កើនការប្រុងប្រយ័ត្នខ្ពស់ ត្រូវថែរក្សាសុខភាពរបស់ខ្លួនឱ្យចៀសផុតពីជំងឺផ្សេងៗ ដែលបណ្តាលមកពីការខ្វះអនាម័យ ជាពិសេសត្រូវប្រយ័ត្នក្មេងតូចៗ និងមនុស្សចាស់ដែលគ្រោះថ្នាក់ដោយសារលង់ទឹក ។
ជាមួយគ្នានោះ ឯកឧត្តម ក៏បានស្នើឱ្យ រដ្ឋបាលស្រុក ព្រមទាំងអាជ្ញាធរពាក់ព័ន្ធ ត្រូវតាមដានស្ថានភាពទឹកជំនន់ទន្លេមេគង្គឱ្យបានជាប់ជាប្រចាំ ដើម្បីជូនដំណឹងបន្តទៅឱ្យប្រជាពលរដ្ឋ ជាពិសេសប្រជាពលរដ្ឋដែលងាយរងគ្រោះ និងគ្រួសារងាយរងហានិភ័យ ។
សូមបញ្ជាក់ថា ទឹកជំនន់ទន្លេមេគង្គនៅក្នុងខេត្តត្បូងឃ្មុំ បានជន់ឡើង២ដងជាប់ៗគ្នា ដែលបង្កការលំបាកដល់ប្រជាពលរដ្ឋជាច្រើននៅឃុំជីរោទ៍ទី១ និងឃុំទន្លេបិទ ។ ធ្វើឱ្យទឹកជំនន់លើកទី១ បានឡើងដល់កម្ពស់១៣,០០ម៉ែត្រ និងលើកទីពីរឡើងដល់១៣,២០ម៉ែត្រ ដែលធ្វើឱ្យលំនៅដ្ឋាន និងផ្ទះសម្បែងរបស់ប្រជាពលរដ្ឋរងការជន់លិចផងដែរ ៕
ចែករំលែកព័តមាននេះ