ខេត្តមណ្ឌលគិរី ៖ អាជ្ញាធរបានរាយការណ៍ថា នៅថ្ងៃទី២៣ ខែកញ្ញា ឆ្នាំ២០២៥ ទឹកជំនន់បង្កឡើងដោយទឹកភ្លៀងនៅចំណុចជាច្រើនដោយសារភ្លៀងធ្លាក់ជាប់ៗគ្នា នៅស្រុកកោះញែក បានជួបប្រទះនឹងគ្រោះទឹកជំនន់ ខណៈមេឃនៅបន្តភ្លៀងជោគជាំ…
ខេត្តមណ្ឌលគិរី ៖ អាជ្ញាធរបានរាយការណ៍ថា នៅថ្ងៃទី២៣ ខែកញ្ញា ឆ្នាំ២០២៥ ទឹកជំនន់បង្កឡើងដោយទឹកភ្លៀងនៅចំណុចជាច្រើនដោយសារភ្លៀងធ្លាក់ជាប់ៗគ្នា នៅស្រុកកោះញែក បានជួបប្រទះនឹងគ្រោះទឹកជំនន់ ខណៈមេឃនៅបន្តភ្លៀងជោគជាំ ។
អាជ្ញាធរ និងកម្លាំងសមត្ថកិច្ច ក្នុងតំបន់បានចុះជួយសង្គ្រោះ និងជម្លៀសប្រជាពលរដ្ឋក៏ដូចជា សត្វពាហនៈចេញពីតំបន់រងគ្រោះ ។ គិតត្រឹមម៉ោង៨:៣០ នាទីព្រឹក ថ្ងៃទី២៣ ខែកញ្ញា របាយការណ៍របស់អធិការនគរបាលស្រុកកោះញែក បានបង្ហាញថា មានឃុំចំនួន ៥ ដែលរងផលប៉ះពាល់ ។
ក្នុងឃុំណងឃីលិក ទឹកទន្លេស្រែពក បានឡើងកម្ពស់២.៥ម៉ែត្រ និងជន់លិចផ្លូវចំនួន៣កន្លែង ដែលមានជម្រៅចាប់ពី៤តឹក ទៅ៦តឹក ។
សមត្ថកិច្ចបានដាក់ការប្រុងប្រយ័ត្ន ដើម្បីណែនាំប្រជាពលរដ្ឋឱ្យធ្វើដំណើរដោយប្រុងប្រយ័ត្ន ។ ចំណែកនៅឃុំស្រែសង្គម ទឹកជំនន់បានជន់លិច ទីតាំងសំខាន់ៗចំនួន៩កន្លែង រួមទាំងទីតាំងវត្តអារាម ស្ពាន និងផ្លូវទៅសាលារៀន ។ ឃុំសុខសាន្ត ទឹកលិចមានទីតាំងចំនួន១០ កន្លែង ដែលរងការជន់លិច ដែលភាគច្រើនជាផ្លូវលំ និងស្ពាននៅក្នុងភូមិ ដូចជា ស្ពានអូរត្រាវ និងស្ពានអូរម៉ាញ៉េ ។ ឃុំអបួនលើទឹកជំនន់កំពុងបន្តឡើង ដែលជន់លិចផ្លូវ ៣កន្លែង មានជម្រៅដល់ទៅ០.៥ ម៉ែត្រ ។
ទីតាំងដែលរងផលប៉ះពាល់មានដូចជា ផ្លូវទៅសាលាបឋមសិក្សាអបួន និងស្ពានយោលអន្ត្រេះ ។ ហើយនៅឃុំស្រែហ៊ុយ ទឹកបានជន់លិចផ្លូវលំមួយចំណុចក្នុងភូមិឈួល ប្រវែង១៥០ ម៉ែត្រ ។
រហូតមកដល់ពេលនេះ គ្រោះទឹកជំនន់មិនទាន់បង្កឱ្យមានគ្រោះថ្នាក់ដល់អាយុជីវិតប្រជាពលរដ្ឋនៅឡើយទេ ប៉ុន្តែស្ថានភាពទឹកកំពុងបន្តឡើង ៕
ចែករំលែកព័តមាននេះ