ខេត្តបន្ទាយមានជ័យ ៖ នៅថ្ងៃទី២០ ខែកញ្ញា ឆ្នាំ២០២៥ ប្រជាពលរដ្ឋខ្មែរចំនួន ១៣នាក់ ប្រុស៨នាក់ និងស្រី៥នាក់ ត្រូវបានសមត្ថកិច្ចថៃ…
ខេត្តបន្ទាយមានជ័យ ៖ នៅថ្ងៃទី២០ ខែកញ្ញា ឆ្នាំ២០២៥ ប្រជាពលរដ្ឋខ្មែរចំនួន ១៣នាក់ ប្រុស៨នាក់ និងស្រី៥នាក់ ត្រូវបានសមត្ថកិច្ចថៃ វរសេនាតូច ១២ ០៤ ធ្វើការឃាត់ខ្លួនក្រោយពីត្រូវមេខ្យល់នាំយកឆ្លងដែនចូលតាមច្រករបៀងក្នុងភូមិសាស្ត្រក្រោយផ្សារណងពឺ ក្នុងឃុំផាសឹក ស្រុកអារញ្ញ ខេត្តស្រះកែវ។ នេះបើតាមបណ្តាញសង្គមហ្វេសប៊ុករបស់ឯកឧត្តម ខៀវ កាញារីទ្ធ សមាជិករដ្ឋសភា ។
ទីតាំងឆ្លងដែនខុសច្បាប់នេះ ស្ថិតនៅក្រោមការទទួលខុសត្រូវរបស់លោកវរសេនីយ៍ត្រី ពៅ រតនា ប្រធានប៉ុស្តិ៍នគរបាលការពារព្រំដែនគោកស្ពានម៉ាឡៃ ត្រូវជាកូនប្រុសបង្កើតរបស់លោកវរសេនីយ៍ទោ ពៅ វុទ្ធី ហៅធីស្នា មេបញ្ជាការរងវរសេនាតូច ៨៩១ ដែលកំពុងរត់គេចខ្លួន ។
ប្រភពពីអ្នកស្រុកម៉ាឡៃ បានខ្សិបប្រាប់ថា លោកវរសេនីយ៍ត្រី ពៅ រតនា រកស៊ីមិនខុសពីឪពុកទេ ជាពិសេសពាក់ព័ន្ធមនុស្សឆ្លងដែនខុសច្បាប់។ សូមថ្នាក់លើមេត្តាពិនិត្យមើល និងពង្រឹងការងារឡើងវិញផង កុំអោយត្រីងៀតឆ្លៀតពង ។
ពាក់ព័ន្ធលោកវរសេនីយ៍ទោ ពៅ វុទ្ធី ហៅធីស្នា មេបញ្ជាការរងវរសេនាតូច ៨៩១ ដែលកំពុងរត់គេចខ្លួន កាលពីថ្ងៃទី១៧ ខែកញ្ញា ឆ្នាំ២០២៥ កម្លាំងចម្រុះឆ្មក់បង្ក្រាបកន្លែងស្តុកទំនិញនាំចូលពីថៃ ដោយរឹបអូសបានគ្រឿងក្រអូប៥៥កេសធំ ស្ថិតភូមិគីឡូម៉ែត្រលេខ៤ សង្កាត់អូរជ្រៅ ក្រុងប៉ោយប៉ែត ។
ប្រតិបត្តិការបង្ក្រាប ដឹកនាំដោយលោកវរសេនីយ៍ត្រី គង់ រិទ្ធា មន្ត្រីនគរបាលយុត្តិធម៌ បញ្ជាការមូលដ្ឋានកងរាជអាវុធហត្ថក្រុងប៉ែត និងមានការសម្របសម្បួសលោក សំរឹទ្ធ សុខុន ព្រះរាជអាជ្ញារងអមសាលាដំបូងខេត្តបន្ទាយមានជ័យ បានដឹកនាំកម្លាំងបង្ក្រាបផ្ទះឈ្មោះ ពៅ វុទ្ធី ហៅ ធីស្នា (មានឋានរស័ក្តិវរសេនីយ៍ទោ តួនាទីមេបញ្ជាការរងនគរបាលវរៈការពារព្រំដែន៨៩១) ផ្ទៈជាប់មាត់អូរព្រំដែន ស្ថិតក្នុងភូមិគីឡូលេខ៤ សង្កាត់ផ្សារកណ្ដាល ក្រុងប៉ោយប៉ែត ។
ប្រតិបត្តិការមានកម្លាំងមូលដ្ឋានកងរាជអាវុធហត្ថក្រុងប៉ោយប៉ែត សហការជាមួយកម្លាំងយោធាកងពលតូចថ្មើរជើងលេខ៥១ មានកម្លាំង១៥នាក់ រថយន្ត៣គ្រឿង រកឃើញដកហូតមានគ្រឿងក្រអូបចម្រុះចំនួន៥៥កេស មានផ្ទះជាប់អូរព្រំដែនមានជណ្តើរថ្មលយចូលអូរ មានទូកស្មាច់ ១គ្រឿង សម្រាប់ចម្លងទំនិញឆ្លងអូរព្រំដែន ។
សូមបញ្ជាក់ថា ក្រោយសភាពការណ៍ព្រំដែនភាគីថៃបានបិទច្រកព្រំដែនកម្ពុជា-ថៃ ហើយរាជរដ្ឋាភិបាលកម្ពុជាបិទ និងទប់ស្កាត់មិនឱ្យទំនិញថៃនាំចូលមកកម្ពុជា ហើយប្រជាពលរដ្ឋកម្ពុជាក៏ពហិការមិនប្រើប្រាស់ទំនិញថៃ ៕
ចែករំលែកព័តមាននេះ