ខេត្តកំពង់ស្ពឺ៖ ក្រុមជនសង្ស័យជាចោរប្លន់ម៉ូតូកក្រើករាជធានីភ្នំពេញ និងខេត្ត ត្រូវបានកម្លាំងនគរបាលខេត្តកំពង់ស្ពឺ សហការជាមួយនគរបាលស្រុកអង្គស្នួល និង ខណ្ឌកំបូល រាជធានីភ្នំពេញធ្វើការឃាត់ខ្លួនបានចំនួន៩នាក់បន្តបន្ទាប់។ ក្រោយឃាត់ក្រុមចោរប្លន់ខាងលើនគរបាលដកហូតបានមធ្យោបាយជនរងគ្រោះនិងអាវុធមួយចំនួនផងដែរ។ ការឃាត់ខ្លួនក្រុមចោរប្លន់កក្រើករាជធានី~ខេត្ត…
ខេត្តកំពង់ស្ពឺ៖ ក្រុមជនសង្ស័យជាចោរប្លន់ម៉ូតូកក្រើករាជធានីភ្នំពេញ និងខេត្ត ត្រូវបានកម្លាំងនគរបាលខេត្តកំពង់ស្ពឺ សហការជាមួយនគរបាលស្រុកអង្គស្នួល និង ខណ្ឌកំបូល រាជធានីភ្នំពេញធ្វើការឃាត់ខ្លួនបានចំនួន៩នាក់បន្តបន្ទាប់។ ក្រោយឃាត់ក្រុមចោរប្លន់ខាងលើនគរបាលដកហូតបានមធ្យោបាយជនរងគ្រោះនិងអាវុធមួយចំនួនផងដែរ។
ការឃាត់ខ្លួនក្រុមចោរប្លន់កក្រើករាជធានី~ខេត្ត បានធ្វើឡើងកាលពីថ្ងៃទី២០ ខែកញ្ញា ឆ្នាំ២០២៥ ដោយបានដឹកនាំបញ្ជាដ៏ខ្ពង់ខ្ពស់ពី លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ។ ដើម្បីថែរក្សាសន្តិសុខសណ្តាប់ធ្នាប់សាធារណៈជូនប្រជាពលរដ្ឋក្នុងពិធីបុណ្យកាន់បិណ្ឌ~ភ្ជំបិណ្ឌ ឆ្នាំ២០២៥ កម្លាំងការិយាល័យនគរបាលព្រហ្មទណ្ឌកម្រិតស្រាលដឹកនាំដោយលោកវរសេនីយ៍ឯក ជា វណ្ណា នាយការិយាល័យ និងបានការដឹកនាំពីលោកឧត្ដមសេនីយ៍ត្រី សម សាក់ ស្នងការរង ផែនការងារនគរបាលព្រហ្មទណ្ឌ កំលាំងបានចុះសហការជាមួយកំលាំងនគរបាលស្រុកសំរោងទងស្រាវជ្រាវនិងល្បាតក្នុងភូមិសាស្ដ្រឃុំត្រពាំងគង ស្រុកសំរោងទង បានឃើញជនសង្ស័យជាក្មេងទំនើងមួយក្រុមមានគ្នាប្រមាណ៦នាក់ជិះម៉ូតូចំនួន០៣គ្រឿងម៉ាកហុងដាសេ១២៥ ចំនួន០២គ្រឿងនិងម៉ាកនិចចំនួន០១គ្រឿងដោយមានកាំបិតផ្កាក់ចំនួន០២ដេីមនិងដាវចំនួន០១ដេីមធ្វេីសកម្មភាពដេញកាប់ជនរងគ្រោះកំពុងជិះម៉ូតូម៉ាកហុងដាសេ១២៥ ស៊េរីឆ្នាំ២០២២ ពណ៌ខ្មៅក្នុងគោលបំណងប្លន់យកម៉ូតូ។
លោក សម សាក់ ស្នងការរងទទួលផែនព្រហ្មទណ្ឌបាននិយាយឱ្យដឹងថា ភ្លាមៗនោះកម្លាំងល្បាតបានអន្តរាគមន៍ ឃាត់ខ្លួនបានជនសង្ស័យចំនួន០២នាក់ចំណោមបក្ខពួកចំនួន០៦នាក់ខាងលើ។ ជនសង្ស័យទី១~ឈ្មោះ ធី ស៊ីធុយ ភេទប្រុស អាយុ១៧ឆ្នាំ ជាសិស្ស រស់នៅក្នុងភូមិកណ្តោស ឃុំលំហាច ស្រុកអង្គស្នួល ខេត្តកណ្តាល និងទី០២~ឈ្មោះ មឿន ភក្ត្រា ហៅ ភ័ក្ក្រ ភេទប្រុស អាយុ ១៨ឆ្នាំមុខរបរកម្មកររោងចក្រ រស់នៅក្នុងភូមិថ្មសំលៀង ឃុំត្រពាំងគង ស្រុកសំរោងទង ក្រោយឃាត់ខ្លួន ដកហូតវត្ថុតាងមានកាំបិតផ្គាក់០១ដើម និង ម៉ូតូម៉ាកហុងដា សេ១២៥ ស៊េរីឆ្នាំ២០២១ ពណ៌ខ្មៅ។ ផ្លាកលេខកំពង់ស្ពឺ 1T.9088 ជនសង្ស័យដោះទុកក្រោមកែបម៉ូតូ។ក្រោយឃាត់ខ្លួនជនសង្ស័យបានសារភាពថាមុនពេលធ្វើសកម្មភាពពួកខ្លួនទាំង០៦នាក់បានមកពីផឹកស៊ីនិងបានប្លន់យកម៉ូតូតាមផ្លូវបានមួយគ្រឿង។
លោក សម សាក់ ស្នងការរងទទួលផែនព្រហ្មទណ្ឌនៃស្នងការដ្ឋាននគរបាលខេត្តកំពង់ស្ពឺបាននិយាយបន្តថា÷ ដោយបានការសម្របសម្រួលនីតិវិធីពីឯកឧត្តម សុិន វិរៈ ព្រះរាជអាជ្ញាអមសាលាដំបូងខេត្ដកំពង់ស្ពឺ និងការឯកភាពពីអយ្យការខេត្តកណ្តាលបានសហការជាមួយកំលាំងអធិការដ្ឋានស្រុកនគរបាលអង្គស្នួល ធ្វេីការស្រាវជ្រាវឃាត់ខ្លួនបានបក្ខពួកជនសង្ស័យចំនួន០៤នាក់បន្ថែមទៀត។ ទី១~ឈ្មោះ អេង វុទ្ធី ភេទប្រុស អាយុ១៨ឆ្នាំ ក្នុងចំណោមជនសង្ស័យម្នាក់មានដីកាបង្គាប់ឲ្យចាប់ខ្លួនករណីប្លន់ម៉ូតូ ទី២~ឈ្មោះ អ៊ីម សុវណ្ណាថាច់ ភេទប្រុស អាយុ១៧ឆ្នាំ ទី៣~ឈ្មោះ វ៉ាត់ ពិសិដ្ឋ ភេទប្រុស អាយុ១៥ឆ្នាំ និងទី៤~ឈ្មោះ ភាព មនា ភេទប្រុស អាយុ១៥ឆ្នាំ ដកហូតបានម៉ូតូម៉ាកហុងដាសេ១២៥ ស៊េរីឆ្នាំ២០១៧ ពណ៌ខ្មៅពាក់ផ្លាកលេខភ្នំពេញ1GG-0575 និងបន្ដសហការជាមួយអធិការដ្ឋាននគរបាលខណ្ឌកំបូលនិងនគរបាលក្រុងតាខ្មៅធ្វេីការឃាត់ខ្លួនបក្ខពួកជនសង្ស័យបានចំនួន០៣នាក់ថែមទៀត។ ទី១~ឈ្មោះ សុខ ធី ភេទប្រុស អាយុ ១៧ឆ្នាំ ទី២~ឈ្មោះ ផល ចំរ៉ុង ភេទប្រុស អាយុ១៧ឆ្នាំ និងទី៣~ឈ្មោះ ឆេន ពិសិដ្ឋ ភេទប្រុស អាយុ១៦ឆ្នាំ។
បើតាមការបញ្ជាក់ពីលោកវរសេនីយ៍ឯក ឃុត សុផលអធិការនគរបាលស្រុកសំរោងទងដែលបានចូលរួម ក្នុងប្រតិបត្ដិការឆ្លងខេត្ដ និង រាជធានីភ្នំពេញ រួចមក សមត្ថកិច្ចនគរបាលធ្វេីការដកហូតបានម៉ូតូសរុបចំនួន០៤គ្រឿង ដាវ០១ដេីម កាំបិតផ្គាក់០២ដេីម និងឃាត់ខ្លួនជនសង្ស័យសរុបចំនួន៩នាក់ បញ្ជូនទៅការិយាល័យព្រហ្មទណ្ឌ នៃស្នងការដ្ឋាននគរបាលខេត្ដកំពង់ស្ពឺ ដេីម្បីកសាងសំណុំរឿងទៅស្ថាប័នអយ្យការ អមសាលាដំបូងខេត្ដ ចាត់ការបន្តតាមផ្លូវច្បាប់៕
ចែករំលែកព័តមាននេះ