ខេត្តកំពង់ឆ្នាំង ៖ ឃាតកម្មចាក់ ៣៣កាំបិត លើយុវតីអាយុ១៦ឆ្នាំម្នាក់ នៅស្រុកកំពង់ត្រឡាច ខេត្តកំពង់ឆ្នាំង ត្រូវកម្លាំងនាយកដ្ឋាននគរបាលព្រហ្មទណ្ឌបង្ក្រាបបានជនដៃដល់ហើយ គឺ(យុវតីវ័យ១៧ឆ្នាំ) មូលហេតុ…
ខេត្តកំពង់ឆ្នាំង ៖ ឃាតកម្មចាក់ ៣៣កាំបិត លើយុវតីអាយុ១៦ឆ្នាំម្នាក់ នៅស្រុកកំពង់ត្រឡាច ខេត្តកំពង់ឆ្នាំង ត្រូវកម្លាំងនាយកដ្ឋាននគរបាលព្រហ្មទណ្ឌបង្ក្រាបបានជនដៃដល់ហើយ គឺ(យុវតីវ័យ១៧ឆ្នាំ) មូលហេតុ ខឹងជនរងគ្រោះអូសទាញសាច់ញាតិឲ្យរួមមេត្រីជាមួយអ្នកដទៃ ។
បើតាមនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ បានឲ្យដឹងនៅថ្ងៃទី២០ ខែកញ្ញា ឆ្នាំ២០២៥នេះថា កាលពីថ្ងៃទី១៨ ខែកញ្ញា ឆ្នាំ២០២៥ វេលាម៉ោង០១៖១៥នាទី មានករណីប្រទះឃើញមនុស្សដេកស្លាប់ សង្ស័យជាករណីឃាតកម្ម នៅចំណុចក្នុងបន្ទប់ដេក ស្ថិតនៅភូមិសូរវង្ស ឃុំតាជេស ស្រុកកំពង់ត្រឡាច ខេត្តកំពង់ឆ្នាំង ជនរងគ្រោះមានឈ្មោះ ធឿន ជីន ភេទស្រី អាយុ១៦ឆ្នាំ ជនជាតិខ្មែរ មានស្នាមចាក់ដោយកាំបិតលើរាងកាយចំនួន ៣៣កន្លែង ។
ក្រោយពីមានហេតុការណ៍ខាងលើកើតឡើង ដោយអនុវត្តតាមបទបញ្ជារបស់លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ លោកឧត្តមសេនីយ៍ត្រី ហ៊ុន មុន្នីរ័ត្ន វរសេនីយ៍ឯក ហែម បូណា និងវរសេនីយ៍ឯក ឆាន់ គីមលី អនុប្រធាននាយកដ្ឋាន បានដឹកនាំកម្លាំងជំនាញរបស់នាយកដ្ឋាននគរបាលព្រហ្មទណ្ឌ សហការជាមួយស្នងការដ្ឋាននគរបាលខេត្តកំពង់ឆ្នាំង បានធ្វើការស្រាវជ្រាវតាមនីតិវិធី និងជំនាញ ដោយកំណត់បានអត្តសញ្ញាណរបស់ជនសង្ស័យ ដែលបានធ្វើសកម្មភាពខាងលើ ។
លុះនៅថ្ងៃទី២០ ខែកញ្ញា ឆ្នាំ២០២៥ កម្លាំងជំនាញបានបន្តដឹកនាំសហការដោយឃាត់ខ្លួនបានជនសង្ស័យម្នាក់ឈ្មោះ ធឿន ស្រីកា ភេទស្រី អាយុ១៧ឆ្នាំ ជនជាតិខ្មែរ ត្រង់ចំណុចភូមិសូង្ស ឃុំតាចេស ស្រុកកំពង់ត្រឡាច ខេត្តកំពង់ឆ្នាំង ។
ជនសង្ស័យខាងលើបានសារភាពថា កាលពីថ្ងៃទី១៥ ខែកញ្ញា ឆ្នាំ២០២៥ ខ្លួនបានទៅទិញកាំបិតចុងស្រួច នៅផ្សារមានតម្លៃ១២,០០០រៀល រួចបានទៅធ្វើសកម្មភាពចាក់សម្លាប់ជនរងគ្រោះខាងលើប្រាកដមែន។ មូលហេតុដោយសារតែ ជនរងគ្រោះ បានអូសទាញសាច់ញាតិរបស់ខ្លួន ធ្វើជាអនាចារផ្លូវភេទជាមួយអ្នកដទៃ ទើបធ្វើឲ្យខ្លួនខឹង និងធ្វើសកម្មភាពខាងលើតែម្តង ។
បច្ចុប្បន្ន ជនសង្ស័យខាងលើត្រូវបាននាយកដ្ឋាននគរបាលព្រហ្មទណ្ឌប្រគល់ជូនស្នងការដ្ឋាននគរបាលខេត្តកំពង់ឆ្នាំង អនុវត្តបន្តនីតិវីធី ។
សូមរម្លឹកថា «ករណីប្រទះឃើញយុវតីម្នាក់ដេកស្លា.ប់ក្នុងផ្ទះ គឺជារឿងឃាតកម្ម»រហូតដល់ធុំក្លិនស្អុយដល់អ្នកជិតខាង បង្កឱ្យភ្ញាក់ផ្អើលកាលពីថ្ងៃទី១៨ កញ្ញា ឆ្នាំ២០២៥ ។ លុះនៅព្រឹកថ្ងៃទី១៩ កញ្ញានេះ សមត្ថកិច្ចនគរបាលបានបញ្ជាក់ថា គឺជាករណីឃាតកម្មដោយយុវតីរងគ្រោះត្រូវបានជនពុំស្គាល់មុខចាក់ជាច្រើនកាំបិត ។
ក្រោយការពិនិត្យនិងធ្វើកុសល្យវិច័យ ដែលដឹកនាំដោយឯកឧត្តមព្រះរាជអាជ្ញាអមសាលាដំបូងខេត្តកំពង់ឆ្នាំងទៅលើសពយុវតីរងគ្រោះ សមត្ថកិច្ចបានបញ្ជាក់ថា យុវតីរងគ្រោះមានឈ្មោះ ធឿន ជីន អាយុ១៦ឆ្នាំ រស់នៅភូមិសូវង្ស ភូមិតាជេស ស្រុកកំពង់ត្រឡាច ។ យុវតីរងគ្រោះត្រូវបានជនដៃដល់ចាក់ជាច្រើនកាំបិតចាប់ពីក្បាលរហូតដល់ជើងនៅក្នុងលំនៅឋានរបស់យុវតីរងគ្រោះ ។
ប្រភពពីកន្លែងកើតហេតុបានឱ្យដឹងថា កាលពីថ្ងៃទី១៦ កញ្ញា ឆ្នាំ២០២៥ មានលោកយាយម្នាក់ ដែលរស់នៅជិតខាងបានបបួលយុវតីរងគ្រោះទៅវត្តក្នុងថ្ងៃកាន់បិណ្ឌទី៩ នាងបានយល់ព្រមថានឹងទៅជាមួយ ដោយឲ្យលោកយាយទៅមុន នាងទៅតាមក្រោយ ។ ប៉ុន្តែពេលលោកយាយទៅដល់វត្តមិនឃើញនាងទៅទេ ។ លុះត្រឡប់មកវិញ លោកយាយក៏មិនចាប់អារម្មណ៍ដែរ ស្មានតែយុវតីរងគ្រោះដើរទៅលេងឯណា រហូតដល់ថ្ងៃទី១៨ ខែកញ្ញា ទើបប្រទះឃើញនាងដេកស្លាប់ក្នុងផ្ទះតែម្ដង ។
តាមការពិនិត្យស្ថានភាពសពហើមស្អុយបែបនេះ សមត្ថកិច្ចសង្ស័យថា មានត្រូវបានគេចាក់សម្លាប់តាំងពីយប់ថ្ងៃទី១៦ កញ្ញា គឺមានរយៈពេល២ យប់៣ថ្ងៃ ទើបធុំក្លិនស្អុយចេញមកក្រៅ ហើយអ្នកជិតខាងទៅកើតមើលទើប បានប្រទះឃើញសពយុវតីរងគ្រោះមានក្លិនស្អុយទៅហើយ ។
ប្រភពដដែលបានបន្តថា យុវតីរងគ្រោះមានឪពុកឈ្មោះថន ធា អាយុ៤៣ឆ្នាំ ម្ដាយឈ្មោះម៉េង អង់ អាយុ៤០ឆ្នាំ ។ ឪពុកម្ដាយយុវតីរងគ្រោះបានបែកបាក់គ្នា ដោយម្ដាយបែកទៅរស់នៅជាមួយប្ដីថ្មី ចំណែកឪពុកមានមុខរបររត់ម៉ូតូកង់បី ដោយទៅប្រកបរត់ម៉ូតូកង់បីនៅឃុំឆ្នុកទ្រូស្រុកបរិបូណ៌៤ទៅ១០ថ្ងៃទើបមកផ្ទះម្ដង ។ យុវតីរងគ្រោះរស់នៅតែម្នាក់ឯង ក្រោមការឧបត្ថម្ភប្រាក់ពីឪពុកដែលប្រកបរបររត់ម៉ូតូកង់បីនៅឃុំឆ្នុកទ្រូផ្ញើមកឱ្យនាង ។
ជុំវិញករណីនេះ សមត្ថកិច្ចនគរបាលដែលបានចុះពិនិត្យធ្វើកោសល្យវិច័យបានបញ្ជាក់ថានារីរងគ្រោះត្រូវជនពុំស្គាល់មុខចាក់ចំក្បាល បំពង់.ក ដើមទ្រូង ដៃ និងជើង ជាច្រើនកាំបិតឡើងសុះសាច់ ។ សមត្ថកិច្ចកំពុងមមារញឹកស្រាវជ្រាវស៊ើបអង្កេត ដើម្បីស្វែងរកឃាតករយកមកផ្ដន្ទាទោសទៅតាមផ្លូវច្បាប់ ៕
ចែករំលែកព័តមាននេះ