រាជធានីភ្នំពេញ ៖ អគ្គិភ័យនេះបានឆាបឆេះហាងយីហោ «ម៉ាដាមដា បា» ខូចខាតម៉ាស៊ីនត្រជាក់ រួមសម្ភារមួយចំនួន បង្កភ្ញាក់ផ្អើលកាលពីវេលាម៉ោង០៣និង២០នាទីរសៀលថ្ងៃទី១៩ ខែកញ្ញា ឆ្នាំ២០២៥…
រាជធានីភ្នំពេញ ៖ អគ្គិភ័យនេះបានឆាបឆេះហាងយីហោ «ម៉ាដាមដា បា» ខូចខាតម៉ាស៊ីនត្រជាក់ រួមសម្ភារមួយចំនួន បង្កភ្ញាក់ផ្អើលកាលពីវេលាម៉ោង០៣និង២០នាទីរសៀលថ្ងៃទី១៩ ខែកញ្ញា ឆ្នាំ២០២៥ នៅចំណុចផ្លូវលេខ៧៩បេតេ ក្នុងភូមិចំរើនផល សង្កាត់បឹងទំពន់ទី១ ខណ្ឌមានជ័យ រាជធានីភ្នំពេញ ។
ប្រភពពីប្រជាពលរដ្ឋ បានអោយដឹងថា ពួកគាត់ជាអ្នកជិតខាង បានឮសំឡេងទុស្សេខ្សែភ្លើង រហូតមានផ្សែងហ៊ុយខ្មួលខ្មាញ់ ទើបដឹងថា មានអគ្គិភ័យឆាបឆេះ។ ភ្លាមៗ ប្រជាពលរដ្ឋបាននាំគ្នា ជួយយកបំពង់ពន្លត់អគ្គិភ័យ មកបាញ់ពន្លត់ផងដែរ តែមិនអាចគ្រប់គ្រងបាន ទើបប្រញាប់រាយការណ៍ជូនសមត្ថកិច្ច ចុះមកអន្តរាគមន៍ ដើម្បីកុំអោយមានការរាលដាលដល់ផ្ទះក្បែរខង ។
ប្រភពពីម្ចាស់ហាងបានអោយដឹងថា មុនកើតហេតុ គាត់បានហៅក្រុមជាង មកកាន់ហាងរបស់គាត់ ក្នុងគោលបំណង ដើម្បីមកពិនិត្យមើលម៉ាស៊ីនត្រជាក់ រួមទាំងជួសជុលប្រព័ន្ធភ្លើងឡើងវិញផងដែរ។ ខណៈពេលជួសជុលរួចរាល់ ក្រុមជាងខាងលើ បានមកប្រាប់ម្ចាស់ហាងថា សុំថ្លៃឈ្នួលជួសជុល ប៉ុន្តែមិនទាន់បានលុយផង ក៏ស្រាប់តែឆាបឆេះចេញពីខ្សែភ្លើង ដែលសង្ស័យឆ្លងចរន្ត បណ្តាលអោយទុស្សេខ្សែភ្លើងឆាបឆេះ យ៉ាងរហ័សតែម្តង ។
អគ្គិភ័យនេះដែរ បានបង្កការខូចខាតសម្ភារមួយចំនួន និងបានបណ្តាលអោយម្ចាស់ហាងខាងលើ ឈ្លក់ផ្សែងសន្លប់ តែសំណាងល្អ មិនប៉ះពាល់អ្វីធ្ងន់ធ្ងរនោះឡើយ។ ក្នុងនោះ សមត្ថកិច្ចបានប្រើប្រាស់រថយន្តរបស់ការិយាល័យបង្ការ និងពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ ចំនួន៦គ្រឿង បាញ់អោយរលត់ជាស្ថាពរ។ ចំពោះមូលហេតុ សមត្ថកិច្ចកំពុងស្រាវជ្រាវ ៕
ចែករំលែកព័តមាននេះ