សហរដ្ឋអាមេរិក ៖ កញ្ញា Red Dela Cruz ដែលជាអតីតបុគ្គលិកការិយាល័យជនជាតិហ្វីលីពីន កាលពីពេលថ្មីៗនេះ ទទួលបានការចាប់អារម្មណ៍យ៉ាងខ្លាំងក្នុងនាមជា Ring…
សហរដ្ឋអាមេរិក ៖ កញ្ញា Red Dela Cruz ដែលជាអតីតបុគ្គលិកការិយាល័យជនជាតិហ្វីលីពីន កាលពីពេលថ្មីៗនេះ ទទួលបានការចាប់អារម្មណ៍យ៉ាងខ្លាំងក្នុងនាមជា Ring Girl (នារីកាន់ស្លាកទឹកការប្រកួត) អំឡុងពេលការប្រកួតប្រដាល់សេរីដណ្តើមខ្សែក្រវាត់ពិភពលោក Super Middleweight ដ៏កក្រើករវាងអ្នកប្រដាល់ឆ្នើមម៉ិកស៊ិក Canelo Alvarez និងអ្នកប្រដាល់ឆ្នើមសញ្ជាតិអាមេរិក Terence Crawford កាលពីថ្ងៃទី១៣ ខែកញ្ញា កន្លងទៅ។
មុនពេលការប្រកួតនៅកីឡដ្ឋាន Allegiant នាទីក្រុង Las Vegas ឈានចូលមកដល់ កញ្ញា Red Dela Cruz បានចែករំលែកសារដ៏រំភើបមួយលើបណ្តញាសង្គម Instagram របស់នាងថា «សូមថ្លែងអំណរគុណចំពោះឱកាសក្លាយជា Ring Girl នៅឯកីឡដ្ឋាន Allegiant សម្រាប់ការប្រកួតរវាង Canelo នឹង Crawford !!!» សារនេះទទួលបានការចូលចិត្ត និងការបញ្ចេញមតិជាច្រើន ដែលភាគច្រើនលើកសរសើរពីសម្រស់របស់នាងថា ល្អឥតខ្ចោះ។
ស្ថិតនៅវ័យ៣៥ឆ្នាំ Dela Cruz ធ្លាប់ធ្វើការងារ៨ម៉ោងក្នុង១ថ្ងៃជាបុគ្គលិកការិយាល័យនៅក្រុមហ៊ុនមួយ មុនពេលផ្លាស់ប្តូរមប្រឡុកនៅក្នុងពិភពកីឡាក្នុងនាមជា Ring Girl។ ភាពល្បីល្បាញរបស់នាងបានចាប់ផ្តើមក្នុងឆ្នាំ ២០១៥ នៅពេលដែលនាងបានឈ្នះពានរង្វាន់ UFC Octagon Girl Search នៅអាស៊ី គឺជាការប្រកួតរៀបចំឡើងដោយ UFC ដើម្បីស្វែងរកនារីស្រស់ស្អាតពោរពេញដោយទេពកោសល្យថ្មី សម្រាប់តំណែង Ring Girl។ តាមរយៈជ័យជម្នះនេះ Dela Cruz បានក្លាយជា Ring Girl ជនជាតិហ្វីលីពីនដំបូងគេដែលបានចុះកុងត្រាជាផ្លូវការជាមួយ UFC ហើយបង្ហាញវត្តមានក្នុងការប្រកួតរបស់ UFC ជិត១០ឆ្នាំ ចាប់តាំងពីពេលនោះ។
មានដើមកំណើតមកពីប្រទេសហ្វីលីពីន Dela Cruz បានបន្តអាជីពជាតារាបង្ហាញម៉ូត និង Ring Girl ដើម្បីបំពេញក្តីស្រមៃម្តាយរបស់នាងក្នុងការក្លាយជារាជនីសម្រស់នៃការប្រកួតបរវកញ្ញា។ នាងបានប្រាប់កាសែត Daily Mail ថា «ឥឡូវនេះ ខ្ញុំកំពុងតែរស់នៅក្នុងក្តីសុបិននោះ ខ្ញុំដើរតាមគន្លងនេះសម្រាប់ខ្លួនឯង ប៉ុន្តែក៏ដើម្បីធ្វើឱ្យម្តាយខ្ញុំមានមោទនភាពផងដែរ»។
នៅក្នុងការប្រកួតដណ្តើមខ្សែក្រវាត់ទម្ងន់មធ្យម Super Middleweight នៅកីឡដ្ឋាន Allegiant កាលពីថ្ងៃទី១៣ ខែកញ្ញា កីឡាករ Terence Crawford បានយកឈ្នះលើកីឡាករ Canelo Alvarez តាមរយៈការសម្រេចចិត្តជាឯកច្ឆ័ន្ទពីចៅក្រម ១១៦-១១២, ១១៥-១១៣ និង ១១៥-១១៣ ក្រោយបញ្ចប់ ១២ ទឹកដ៏ស្វិតស្វាញ។
ស្ថិតក្នុងវ័យ៣៧ឆ្នាំ Crawford បានឈ្នះខ្សែក្រវាត់ WBA, WBC, IBF, WBO និង The Ring ទាំងអស់របស់ Canelo ដើម្បីក្លាយជាម្ចាស់ខ្សែក្រវាត់ទម្ងន់មធ្យម Super Middleweight ថ្មីរបស់ពិភពលោក។ កំណត់ត្រាអាជីពរបស់ Crawford ឥឡូវនេះគឺ ៤២ប្រកួត ឈ្នះទាំងអស់ និងផ្តួលគូប្រកួតឱ្យសន្លប់សរុបចំនួន ៣១ លើក។
ប្រភពពីកាសែត New York Times បានឱ្យដឹងថា Canelo Alvarez រកបានចន្លោះពី ១០០ ទៅ ១៥០លានដុល្លារ ខណៈដែល Terence Crawford ទទួលបានយ៉ាងហោចណាស់ ១០លានដុល្លារពីជំនួបដ៏កក្រើកវិស័យប្រដាល់សកលពិភពលោករវាងអ្នកទាំងពីរ កាលពីថ្ងៃទី១៣ ខែកញ្ញា កន្លងទៅ៕ ប្រភព ៖ VnExpress
ចែករំលែកព័តមាននេះ