រាជធានីភ្នំពេញ ៖ ក្រសួងសាធារណការ និងដឹកជញ្ជូន បានប្រកាសនាថ្ងៃទី១៦ ខែកញ្ញា ឆ្នាំ២០២៥ ថា ៖ ក្រុមការងារបច្ចេកទេសចុះពិនិត្យវឌ្ឍនភាពការងារ…
រាជធានីភ្នំពេញ ៖ ក្រសួងសាធារណការ និងដឹកជញ្ជូន បានប្រកាសនាថ្ងៃទី១៦ ខែកញ្ញា ឆ្នាំ២០២៥ ថា ៖ ក្រុមការងារបច្ចេកទេសចុះពិនិត្យវឌ្ឍនភាពការងារ នៃគម្រោងវិនិយោគបន្ទាន់លើហេដ្ឋារចនាសម្ព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិច នៅភូមិសាស្ត្ររាជធានីភ្នំពេញ តាមបណ្តោយផ្លូវជាតិលេខ៤ និងផ្លូវរថភ្លើង ។
ក្រសួងសាធារណការ និងដឹកជញ្ជូន បានបញ្ជាក់ថា នារសៀលថ្ងៃទី១៥ ខែកញ្ញា ឆ្នាំ២០២៥ ឯកឧត្តម ចៅ សុភៈភិបាលអគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ និងជាប្រធានគ្រប់គ្រងគម្រោង និងឯកឧត្តម ហ៊ាង វុត្ថា អគ្គនាយកនៃអគ្គនាយកដ្ឋានបច្ចេកទេស និងជាប្រធានក្រុមការងារបច្ចេកទេសគម្រោង បានដឹកនាំក្រុមការងារបច្ចេកទេស ចុះពិនិត្យវឌ្ឍនភាពការងារ នៃគម្រោងវិនិយោគបន្ទាន់លើហេដ្ឋារចនាសម្ព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិចនៅភូមិសាស្ត្ររាជធានីភ្នំពេញ (លូតាមបណ្តោយផ្លូវជាតិលេខ៤ និងផ្លូវរថភ្លើង) ដែលអនុវត្តដោយក្រុមហ៊ុនសាងសង់ PHNOM PENH PRECAST PLANTS CO., LTD និង T.C.M. ENGINEERING COMPANY LTD ដោយមានការចូលរួមពីលោកអគ្គនាយករង លោកប្រធាន-អនុនាយកដ្ឋាន និងមន្ត្រីបច្ចេកទេសពាក់ព័ន្ធ ព្រមទាំងលោកអភិបាលនៃគណៈអភិបាលខណ្ឌពោធិ៍សែនជ័យ និងក្រុមការងាររបស់ក្រុមហ៊ុនសាងសង់។
ការចុះត្រួតពិនិត្យនេះ មានគោលបំណងពិនិត្យពីស្ថានភាពជារួមនៃដំណើរការរបស់ប្រព័ន្ធបង្ហូរទឹកនៅក្រោយពេលដែលមានភ្លៀងខ្លាំងក្នុងរយៈពេលប៉ុន្មានថ្ងៃចុងក្រោយ និងពិនិត្យលើលក្ខណៈបច្ចេកទេស ក៏ដូចជាស្វែងរកចំណុចខ្លាំង និងចំណុចខ្សោយនៃប្រព័ន្ធ ក្នុងការកែសម្រួលបន្ថែមសម្រាប់ប្រសិទ្ធភាពនៃគម្រោង បើទោះបីជាគម្រោងពុំទាន់បានបញ្ចប់១០០% ក៏ដោយ។
ជាមួយគ្នានេះ ឯកឧត្តមសហប្រធាន បានប្រគល់ជានិមិត្តរូបនូវសោរសម្រាប់បិទបើកទ្វារទឹកជាបណ្ដោះអាសន្នដល់លោកអភិបាលនៃគណៈអភិបាលខណ្ឌពោធិ៍សែនជ័យ ដើម្បីប្រើប្រាស់គ្រប់គ្រងប្រព័ន្ធបង្ហូរទឹក សម្រាប់បញ្ជៀសរំហូរទឹកហូរចូលរាជធានីភ្នំពេញជាពិសេសតំបន់ចោមចៅ ៕
ចែករំលែកព័តមាននេះ