fiyata គ្រងម្កុដ ខណៈពេលពេជ្រ វត្តីសារ៉ាវឌ្ឍី និងសុគា គីមលាង បានត្រឹមលំដាប់រង
នៅទីបំផុត កម្មវិធីប្រកួតបវរកញ្ញាឯកចក្រវាទ្បកម្ពុជា ២០២៥ (Miss Universe Cambodia2025) បានរកឃើញម្ចាស់ជ័យលាភីហើយ ដោយនៅក្នុងនោះថៃ នារីសុជាតា ហៅហ្វីយ៉ាតា…
នៅទីបំផុត កម្មវិធីប្រកួតបវរកញ្ញាឯកចក្រវាទ្បកម្ពុជា ២០២៥ (Miss Universe Cambodia2025) បានរកឃើញម្ចាស់ជ័យលាភីហើយ ដោយនៅក្នុងនោះថៃ នារីសុជាតា ហៅហ្វីយ៉ាតា បានគ្រងម្កុដ ខណៈពេលដែលសុគា គីមលាង ឈ្នះលំដាប់រងទី១ និងពេជ្រ វត្តីសារ៉ាវឌ្ឍី ឈ្នះលំដាប់រងទី២ ។
ការប្រកួតវគ្គផ្តាច់ព្រ័ត ដែលបានធ្វើឡើងកាលពីរាត្រី ថ្ងៃទី១២ ខែកញ្ញា ឆ្នាំ២០២៥ បេក្ខភាពជ័យលាភីទាំង៣ បានបង្ហាញខ្លួនយ៉ាងល្អ និងបានទទួលការចាប់អារម្មណ៍ពីគណៈកម្មការពីមួយវគ្គទៅមួយវគ្គ ។
យ៉ាងណា នៅវគ្កផ្តាច់ព្រ័ត គណៈកម្មការក៏បានសម្រេចជ្រើសរើស ថៃ នារីសុជាតា ជាអ្នកគ្រងម្កុដ ដោយសារនាងមានលក្ខណៈគ្រប់គ្រាន់ទាំងរូបសម្រស់ ចំណេះដឹង ជាពិសេសការប្រើប្រាស់ភាសា បានយ៉ាងល្អ ។
បន្ទាប់ពីបានគ្រងម្កុដកញ្ញាឯកចក្រវាទ្បកម្ពុជា ២០២៥ នាពេលនេះ ថៃ នារី សុជាតា បានបង្ហោះសំណេររបស់ខ្លួនលើបណ្តាញ សង្គមថា ខ្ញុំមិនយល់សប្តិទេ… ខ្ញុំបានធ្វើវា.. យើងធ្វើបានហើយបងប្អូន ។
នាងបន្តថា ខ្ញុំបានរស់នៅក្នុងប្រអប់ និងលាក់ខ្លួនពីពិភពលោកដ៏ស្រស់ស្អាតនេះយូរមកហើយ ពេលនេះ ខ្ញុំបានសម្រេចចិត្តចេញពីវា ហើយទៅបង្ហាញអ្វីដែលខ្ញុំមាននៅក្នុងខ្លួនខ្ញុំទៅកាន់ពិភពលោកដ៏ធំនេះ ។
នាងបញ្ជាក់ថា រឿងសំខាន់ ដែលខ្ញុំចង់ឱ្យអ្នករៀនពីខ្ញុំថ្ងៃនេះ គឺជឿជាក់លើខ្លួនឯង ហើយកុំបន្ទោសខ្លួនឯង ។ ដូចដែលខ្ញុំបាននិយាយនៅលើឆាក «ខ្ញុំជ្រើសរើសផ្លាស់ប្តូរ និងប្រែការឈឺចាប់ទៅជាគោលបំណង ។ នោះហើយជារបៀបដែលខ្ញុំបានរកឃើញ ថាមពលរបស់ខ្ញុំ ។ នាងថា ជឿជាក់លើឱកាសទីពីរថា អាចបង្កើតកំណែថ្មី ដោយខ្លួនឯងក៏មិនឈប់ដែរ អរគុណដល់គ្រួសារខ្ញុំ / គ្រួសារ MUC07 ទីពីររបស់ខ្ញុំ.. អ្នក គឺជាបេះដូងរបស់ខ្ញុំ ។
ដោយឡែក បើទោះបីជាមិនបានគ្រងម្កុដ ពេជ្រ វត្តីសារ៉ាវឌ្ឍី ក៏បានចូលរួមអបអរសាទរទៅកាន់ ថៃ នារីសុជាតា ដែលបានឈ្នះពីកម្មវិធីនះ ។
តារាស្រី រូបនេះបានបង្ហោះសំណេររបស់ខ្លួនថា ក្នុងបទសម្ភាសន៍បិទទ្វារ Miss Universe Cambodia ចៅក្រមបានសួរយើងថា «បើមិនមែនអ្នក តើអ្នកគិតថា អ្នកណាសមនឹងទទួលបានមកុដ? ពីក្នុងបេះដូងរបស់ខ្ញុំ ចម្លើយរបស់ខ្ញុំ គឺ MUC 07 (លេខសម្គាល់របស់ ថៃ នារីសុជាតា) ។ នាងថា ខ្ញុំពិតជារំភើបចិត្ត ដែលនៅទីបញ្ចប់លេខដែលត្រូវហៅ គឺ MUC 07 ដូចដែលខ្ញុំបានឆ្លើយនឹងសំណួរដែលបានសួរ ។ ខ្ញុំពិតជា អរគុណចំពោះលទ្ធផលដែលនាងបានជាប់ជាអ្នកឈ្នះ ។
សូមអបអរសាទរដល់ម្ចាស់ក្សត្រីរបស់ខ្ញុំ ប្អូនស្រីរបស់ខ្ញុំ fiyata ខ្ញុំមានមោទនភាពចំពោះអ្នកខ្លាំងណាស់ ហើយសូមឱ្យដំណើរឆ្ពោះទៅមុខរបស់អ្នកមានពន្លឺភ្លឺថ្លាពេញសកលលោក ។
ចំណែក សុគា គីមលាង វិញ ក្រោយចប់ការប្រកួត នាងមិនបាននិយាយអ្វីច្រើនឡើយ ពោលនាងគ្រាន់តែអរគុណដល់អ្នកគាំទ្រ ដែលបានផ្តល់កម្លាំងចិត្តដ៏ធំមកកាន់រូបនាង ។
យ៉ាងណាក៏ ដោយសម្រាប់ជ័យជំនះរបស់បេក្ខភាពទាំង៣ ខាងលើនេះ គឺទទួលបានការសាទរ និងគាំទ្រយ៉ាងខ្លាំងពីសំណាក់ទស្សនិកជន ខណៈពេលដែលមុនចូលថ្ងៃប្រកួតវគ្កផ្តាច់ព្រ័ត បេក្ខនារីទាំង៣នេះ សុទ្ធត្រូវបានគេដាក់ក្តីរំពឹងថា ពួកនឹងអាចគ្រងម្កុដពីកម្មវិធី Miss Universe Cambodia 2025 ៕
ចែករំលែកព័តមាននេះ