ចាប់ខ្លួនអាពស់វែកដើរលួចមាន់ និងកាត់ខ្សែភ្លើង ពេលឆែកឆេរបែរជារកឃើញរក្សាទុកគ្រឿ.ង.ញៀ.ន
- បាត់ដំបង
ខេត្តបាត់ដំបង ៖ អា«ពស់វែក» គឺជារហស្សនាមបុរសម្នាក់ដែលមានអាជីព «លួចនិងជួញដូរថ្នាំញៀន» ត្រូវបានកម្លាំងសមត្ថកិច្ចឃាត់ខ្លួន កាលពីរសៀលថ្ងៃទី១៩ សីហា នៅភូមិបឹងព្រីង ឃុំបឹងព្រីង ស្រុកថ្មគោល ជាមួយនឹងវត្ថុតាង «សត្វមាន់ជាច្រើនក្បាល និងខ្សែភ្លើងជាច្រើនខ្សែ ថែមទាំងឆែករកឃើញថ្នាំញៀន» មួយចំនួនទៀត ។
តាមរយៈរបាយការណ៍អធិការស្រុកថ្មគោល លោក សេង លុច បានឲ្យដឹងថា ជនសង្ស័យឈ្មោះ ថា សុខធា ហៅអាពស់វែក ភេទប្រុស អាយុ២៩ឆ្នាំ រស់នៅភូមិអូរញ ឃុំបឹងព្រីង ស្រុកថ្មគោល ។ ជននេះជាមុខសញ្ញាប្រព្រឹត្តអំពើ «ចោរកម្ម» យ៉ាងសកម្មនៅក្នុងមូលដ្ឋាន និងថែមមុខរបរបន្ទាប់បន្សំមួយទៀត «ជួញដូរគ្រឿងញៀន» រហូតអ្នកភូមិផ្ដល់រហស្សនាមហៅថា «អាពស់វែក» ។
លោក សេង លុច បានបញ្ជាក់ថា ជនសង្ស័យម្នាក់នេះ ត្រូវបានកម្លាំងសមត្ថកិច្ចរបស់លោកឃាត់ខ្លួនតាមបណ្ដឹងជនរងគ្រោះជាច្រើននាក់ ដែលបានប្ដឹងចោទប្រកាន់ជននេះពីរឿង «លួចមាន់ លួចកាត់ខ្សែភ្លើង និងមង សំណាញ់» ប៉ុន្តែពេលត្រួតពិនិត្យ និង ឆែកឆេរ ក៏រកគ្រឿងញៀនបន្ថែមទៀត ដែលជននេះលាក់ទុកជាប់ខ្លួន ។
លោកបានបញ្ជាក់ថា បើយោងតាមការឆ្លងយោបល់លោកព្រះរាជអាជ្ញា «អាពស់វែក» នេះ អាចប្រឈមនឹងបទចោទចំនួន០២ករណី គឺ «ចោរកម្មនិងជូញគ្រឿងញៀនដោយខុសច្បាប់» ។
អា«ពស់វែក» ជាឈ្មោះហៅក្រៅរបស់ជនសង្ស័យរូបនេះ ដែលទំនងផ្ដើមចេញពីសកម្មភាពប្រព្រឹត្តអំពើ «ទុច្ចរិត» មិនឈប់ឈរនៅក្នុងមូលដ្ឋាន ។ ជាពិសេស ការប្រព្រឹត្តអំពើ «ចោរកម្មមិនរើសមុខ អមជាមួយនឹងការជួញដូរគ្រឿងញៀន»ផង ។
ជាមួយនឹងការឃាត់ខ្លួន សមត្ថកិច្ចដកហូតវត្ថុតាងរួមមាន៖ ១-ថ្នាំញៀនប្រភេទម៉ាទឹកកកចំនួន០៤ថង់ ២-សម្ភារៈប្រើប្រាសថ្នាំញៀនមួយចំនួន ។ ក្រៅពីថ្នាំញៀន សមត្ថកិច្ចដកហូតបានសត្វមាន់ជាច្រើនក្បាល ខ្សែភ្លើងចំនួន០២ដុំ មងនិងសំណាញ់ រួមទាំងវត្ថុតាងពាក់ព័ន្ធមួយចំនួនទៀត ។
ប៉ុន្តែបើតាមលោក សេង លុច អធិការស្រុកថ្មគោលបានបញ្ជាក់ថា អា«ពស់វែក» អាចនឹងប្រឈមបទចោទប្រកាន់ចំនួន០២ដូចខាងលើ ។ លោកបន្ថែមថា ជាអទិភាព សំណុំរឿងគ្រឿងញៀនត្រូវបានចោទក្នុងបទល្មើសដែលជននេះ បានប្រព្រឹត្តជាក់ស្ដែង ហើយបូកបន្ថែមសំណុំរឿងមួយដាច់ដោយឡែកទៀតគឺអំពើ«ចោរកម្ម» ។ ពេលនេះឈ្មោះ ថា សុខធា ហៅអាពស់វែក ត្រូវបានកសាងសំណុំរឿងបញ្ជូនទៅសាលាដំបូងខេត្តហើយ ៕
ចែករំលែកព័តមាននេះ