ធ្លាប់ឃើញមានដុំពកតូចៗទន់ៗនៅលើបបូរមាត់ ឬក្នុងមាត់ទេ? កុំទាន់ភ័យស្លន់ស្លោ! ភាគច្រើនវាគ្រាន់តែជាជំងឺ គីសបបូរមាត់ (Mucocele of lip) ដែលជាបញ្ហាសុខភាពមាត់ធ្មេញទូទៅ ហើយ…
ធ្លាប់ឃើញមានដុំពកតូចៗទន់ៗនៅលើបបូរមាត់ ឬក្នុងមាត់ទេ? កុំទាន់ភ័យស្លន់ស្លោ! ភាគច្រើនវាគ្រាន់តែជាជំងឺ គីសបបូរមាត់ (Mucocele of lip) ដែលជាបញ្ហាសុខភាពមាត់ធ្មេញទូទៅ ហើយ មិនមែនជាជំងឺមហារីក នោះទេ។
យោងតាមមន្ទីរពេទ្យកាល់ម៉ែត បានឱ្យដឹងថា
ជំងឺនេះកើតឡើងនៅពេលដែល ក្រពេញទឹកមាត់តូចៗ ក្នុងមាត់របស់យើង ជួបប្រទះការស្ទះ ឬរងការប៉ះទង្គិច បណ្ដាលឲ្យទឹកមាត់ដក់ និងបង្កើតជាដុំគីស។
មូលហេតុបង្កឲ្យកើតគីសបបូរមាត់
ការខាំបបូរមាត់: ការខាំបបូរមាត់ដោយចៃដន្យ ឬជាទម្លាប់ គឺជាមូលហេតុញឹកញាប់បំផុត ដែលធ្វើឲ្យក្រពេញទឹកមាត់រងរបួស និងស្ទះ។
ការប៉ះទង្គិច: ការប៉ះទង្គិចដោយផ្ទាល់ទៅលើបបូរមាត់ ក៏អាចបង្កជាគីសបានដែរ។
រោគសញ្ញាដែលអ្នកគួរកត់សម្គាល់
គ្មានការឈឺចាប់: ជាទូទៅ គីសបបូរមាត់មិនបង្កការឈឺចាប់នោះទេ។
ពណ៌ប្លែក: វាអាចមានពណ៌ក្រហមថ្លា ឬខៀវ បន្តិចបន្តួច ស្រដៀងនឹងពណ៌នៃទឹកមាត់។
សភាពទន់និងរអិល: ពេលអ្នកប៉ះ នឹងមានអារម្មណ៍ថាវាជាដុំទន់ៗ និងរអិលនៅក្រោមស្បែក។
ការព្យាបាលគីសបបូរមាត់
បាត់ទៅវិញដោយឯកឯង: សម្រាប់គីសដែលមានទំហំតូច វាច្រើនតែកើតឡើងហើយក៏បាត់ទៅវិញដោយខ្លួនឯងក្នុងរយៈពេលខ្លី។
ការវះកាត់យកចេញ: ប្រសិនបើគីសមានទំហំធំជាង ១ សង់ទីម៉ែត្រ ឬមិនបាត់ទៅវិញ អ្នកនឹងត្រូវបានណែនាំឲ្យធ្វើការវះកាត់តូចមួយដើម្បីយកវាចេញ។
ដំបូន្មានសំខាន់: ប្រសិនបើអ្នកសង្ស័យថាមានដុំគីសនេះ សូមទៅជួប គ្រូពេទ្យជំនាញខាងធ្មេញ ឬវេជ្ជបណ្ឌិត ដើម្បីទទួលបានការពិនិត្យ និងណែនាំត្រឹមត្រូវ។ សូមកុំព្យាយាមចោះ ឬកាត់ដុំគីសដោយខ្លួនឯង ព្រោះវាអាចធ្វើឲ្យស្ថានការណ៍កាន់តែអាក្រក់ទៅវិញ៕
ចែករំលែកព័តមាននេះ