ដំណាំស្រូវ៣ស្រុក នៅក្នុងខេត្តកំពង់ធំ រងផលប៉ះពាល់ដោយជំនន់ទឹកភ្លៀង
- ភ្នំពេញ
រាជធានីភ្នំពេញ ៖ មន្ត្រីនៃមន្ទីរកសិកម្មរុក្ខាប្រមាញ់ និងនេសាទ ខេត្តកំពង់ធំ បានឱ្យដឹងកាលពីរសៀល ថ្ងៃទី១២ កញ្ញា ឆ្នាំ២០២៥ថា ខេត្តកំពង់ធំ…
រាជធានីភ្នំពេញ ៖ មន្ត្រីនៃមន្ទីរកសិកម្មរុក្ខាប្រមាញ់ និងនេសាទ ខេត្តកំពង់ធំ បានឱ្យដឹងកាលពីរសៀល ថ្ងៃទី១២ កញ្ញា ឆ្នាំ២០២៥ថា ខេត្តកំពង់ធំ រងផលប៉ះពាល់ដោយទឹកជំនន់ទឹកភ្លៀងលើដំណាំស្រូវ សរុបចំនួន១៧៨១ហិកតា លើ០៣ស្រុក ១៣ឃុំ ៧១ភូមិ ស្មើនឹង២១១២គ្រួសារ ក្នុងនោះខូចខាតចំនួន១០៥៦ហិកតា លើ០២ស្រុក ៧ឃុំ ៥២ភូមិ ស្មើនឹង១២៨៧គ្រួសារ ។ នេះបើតាមការចេញផ្សាយរបស់ទីភ្នាក់ងារសារព័ត៌មានកម្ពុជា(AKP) ។
ប្រភពបានលើកឡើងថា ស្រុកតាំងគោក ប៉ះពាល់ចំនួន១០៤៧ហិកតា លើ៦ឃុំ ៤៣ភូមិ ស្មើនឹង១១៦៦គ្រួសារ ក្នុងនោះខូចខាតចំនួន៦៦៤ហិកតា លើ០៤ឃុំ ៣៤ភូមិស្មើនឹង៨៨៨គ្រួសារ ។ ស្រុកបារាយណ៍ប៉ះពាល់ចំនួន៦៦៩ហិកតា លើ០៤ឃុំ ២៣ភូមិស្មើនឹង៨១៧គ្រួសារ ក្នុងនោះខូចខាតចំនួន៣៩២ហិកតា លើ០៣ឃុំ ១៨ភូមិ ស្មើនឹង៣៩៩គ្រួសារ ។ និងស្រុកសន្ទុកប៉ះពាល់ចំនួន៦៥ហិកតា លើ០៣ឃុំ ៥ភូមិស្មើនឹង១២៩គ្រួសារ ។
ស្ថានភាពទឹកជំនន់នៅខេត្តកំពង់ធំ ទឹកស្ទឹងសែន គិតត្រឹមថ្ងៃទី១២ ខែកញ្ញា ឆ្នាំ២០២៥ទឹកស្ទឹងសែន មានកម្ពស់១៣,២៨ម៉ែត្រធៀបទៅនឹងឆ្នាំមុន រយៈពេលដូចគ្នាខ្ពស់ជាង១,៨៥ម៉ែត្រ កម្ពស់ទឹកត្រូវប្រុងប្រយ័ត្ន១៣,៥០ម៉ែត្រ ។
ការងារបង្កបង្កើតផលលើដំណាំស្រូវ របស់កសិករខេត្តកំពង់ធំ គិតត្រឹមថ្ងៃទី១២ កញ្ញា ឆ្នាំ២០២៥ អនុវត្តបានលើផ្ទៃដីចំនួន២៣៦១២៦ហិកតា ស្មើនឹង១០៧,៣៣ភាគរយនៃផែនការ២២០០០០ហិកតាធៀបទៅនឹងឆ្នាំមុនរយៈពេលដូចគ្នា ខ្ពស់ជាងចំនួន១៧៩២៧ហិកតា ។
ទន្ទឹមនឹងនេះដែរប្រជាកសិករខេត្តកំពង់ធំ យកចិត្តទុកដាក់ដាំដំណាំរួមផ្សំបានចំនួនសរុបចំនួន៤៦១៧៦ហិកតាធៀបទៅនិងឆ្នាំមុន រយៈពេលដូចគ្នា ទាបជាងចំនួន៦៨៨៥ ហិកតា ។
ជាមួយគ្នានេះដែរ ប្រជាកសិករខេត្តកំពង់ធំ បានធ្វើការប្រមូលផលស្រូវស្រាលបង្កើនរដូវចំនួន៧២៨៩៩ហិកតា ដោយទទួលបានទិន្នផលមធ្យម៤,៤២៤តោនក្នុង០១ហិកតា៕
ចែករំលែកព័តមាននេះ