រាជធានីភ្នំពេញ ៖ អង្គការមូលនិធិថែទាំសុខភាពអ្នកជំងឺអេដស៍កម្ពុជា (AHF) បានបង្ហាញសេវាពិនិត្យកាមរោគ ព្យាបាល និងមេរោគអេដស៍ ដោយឥតគិតថ្លៃ ព្រមទាំងរក្សាការសម្ងាត់បំផុត ខណៈយុវជនប្រឈមមុខនឹងការឆ្លងកាមរោគ…
រាជធានីភ្នំពេញ ៖ អង្គការមូលនិធិថែទាំសុខភាពអ្នកជំងឺអេដស៍កម្ពុជា (AHF) បានបង្ហាញសេវាពិនិត្យកាមរោគ ព្យាបាល និងមេរោគអេដស៍ ដោយឥតគិតថ្លៃ ព្រមទាំងរក្សាការសម្ងាត់បំផុត ខណៈយុវជនប្រឈមមុខនឹងការឆ្លងកាមរោគ និងមេរោគអេដស៍កើនឡើង ។
លើកឡើងក្នុងសន្និសីទសារព័ត៌មាន ស្តីពីការចូលរួមឆ្លើយតបទៅនឹងមេរោគ និងកាមរោគ នៅមណ្ឌលថែរក្សាសុខភាពទួលគោក នាថ្ងៃទី១៣ ខែកញ្ញា ឆ្នាំ២០២៥ វេជ្ជបណ្ឌិត ចន ផាន់ណា អ្នកគ្រប់គ្រងកម្មវិធីប្រចាំប្រទេសរបស់ AHF Cambodia បានបញ្ជាក់ថា ៖ «យើងមានសេចក្តីសោមនស្សរីករាយក្នុងការផ្តល់ជូនអ្នកសារព័ត៌មាន នូវឱកាសមួយដើម្បីទស្សនាគ្លីនិកពិនិត្យ និងព្យាបាលកាមរោគរបស់យើងចូលរួមដោយផ្ទាល់ជាមួយអតិថិជន និងបានឃើញដោយផ្ទាល់នូវសេវាកម្មដែលមានឥទ្ធិពលដែលយើងផ្តល់ជូន» ។
លោកវេជ្ជបណ្ឌិតក៏បានបន្ថែមថា «ជាមួយនឹងការថយចុះនៃជំនួយអន្តរជាតិ ការទ្រទ្រង់ការឆ្លើយតបនឹងមេរោគអេដស៍របស់កម្ពុជារហូតដល់ឆ្នាំ២០៣០ នៅតែជាបញ្ហាប្រឈមដ៏សំខាន់ ។ ឥឡូវនេះ គឺជាពេលវេលា ដើម្បីជំរុញការផ្តល់មូលនិធិក្នុងស្រុក ដើម្បីបំពេញតាមការប្តេជ្ញាចិត្តរបស់រាជរដ្ឋាភិបាល ។
AHF Cambodia កំពុងពង្រឹងកិច្ចខិតខំប្រឹងប្រែងរបស់ខ្លួន ដោយធានាបាននូវការទទួលបានការព្យាបាល១០០% សម្រាប់អតិថិជនដែលទើបធ្វើរោគវិនិច្ឆ័យថា មានផ្ទុកមេរោគអេដស៍ និងការពង្រីកសេវាកម្មរបស់យើង រួមទាំងមណ្ឌលពិនិត្យ និងព្យាបាលជំងឺកាមរោគ យើងផងដែរ» ។
ជាមួយគ្នានោះដែរលោកវេជ្ជបណ្ឌិត ម៉ា សួនសុភ័ក្ត្រ ប្រធានមណ្ឌលគ្រប់គ្រងមណ្ឌលថែទាំសុខភាព គ្លីនិកថែទាំ និងព្យាបាលជំងឺកាមរោគ Wellness Center នៃអង្គការមូលនិធិថែទាំសុខភាពអ្នកជំងឺអេដស៍កម្ពុជា បានថ្លែងថា សម្រាប់គ្លីនិកនេះ មានផ្តល់សេវាកម្មដូចជា ៖ ថែទាំ និងព្យាបាលជំងឺកាមរោគ, សេវាប្រឹក្សា និងតេស្តឈាមរកមេរោគអេសដ៍ , ផ្តល់ថ្នាំបង្ការជាមុនពេលប្រព្រឹត្តប្រឈមនឹងការឆ្លងមេរោគអេសដ៍, ផ្តល់ថ្នាំបង្ការក្រោយប្រព្រឹត្តប្រឈមនឹងការឆ្លងមេរោគអេសដ៍, និងមានផ្តល់ស្រោមអនាម័យបង្ការមេរោគអេសដ៍ ។
លោកវេជ្ជបណ្ឌិត ចន ផាន់ណា បានឱ្យដឹងទៀតថា យោងតាមកម្មវិធីជាតិរបស់អាជ្ញាធរប្រយុទ្ធប្រឆាំងជំងឺអេដស៍បានឱ្យដឹងថា បានធ្វើការសិក្សាស្រាវជ្រាវ និងបានធ្វើការវិភាគពោល គឺក្នុងចំណោមអ្នកឆ្លងមេរោគជំងឺអេដស៍នៅកម្ពុជា មានការកើនចំនួនឡើង ពិសេសក្នុងស្រទាប់យុវជនក្នុងអំឡុង អាយុ២០ដល់២៥ឆ្នាំ ។
ក្រុមយុវជនក្នុងវ័យនេះ មានការកើតឡើងនៃការឆ្លងជំងឺអេដស៍មានការកើនឡើងគួរឱ្យព្រួយបារម្ភ ។ ហេតុនេះបើយើងមានវិធានការទប់ស្កាត់ ពិសេសមាការផ្សព្វផ្សាយបង្កើនការបង្កឱ្យយុវជនយើងបានទទួលចំណេះដឹង កាន់តែច្រើនដើម្បីកុំឱ្យយុវជនភ្លេចខ្លួន ។ អ្នកខ្លះយល់ថា អស់អេដស៍តាមពិតវាកំពុងតែរីករាលដាលគួរឱ្យព្រួយបារម្ភទៅវិញទេ ។
ក្នុងចំណោមនេះ យុវជនវ័យក្មេងកំពុងប្រឈម ក្នុងកំឡុងអាយុ១៩ដល់នឹងដល់២៥យ៉ាងច្រើនដែរ ជាបញ្ហាគួរឱ្យបារម្ភ ជាតួលេខគួរឱ្យកត់សម្គាល់ខ្ពស់ខ្លាំង ។
វេជ្ជបណ្ឌិតបានថ្លែងដែរថា មានយុវជនមួយចំនួន មិនបានដឹងថា ជំងឺអេដស៍រីករាលដាលនៅឡើយទេ ដោយខ្លះបានចោទសួរថា«តើបច្ចុប្បន្ននៅមានជំងឺអេដស៍ ឬយ៉ាងណា ដែលតាមពិតជំងឺនេះកំពុងរីករាលដាល និងមានកំណើនមួយគួរឱ្យភ័យខ្លាចដែលយុវជនមិនអាចភ្លេចខ្លួនបានឡើយ ។
លោកវេជ្ជបណ្ឌិត ម៉ាសួន សុភក្តិ ប្រធានគ្រងគ្រងមណ្ឌលរក្សាសុខភាពជំងឺអេដស៍បានគូសបញ្ជាក់ថា យុវជនដែលរៀបអាពាហ៍ពិពាហ៍ចាំបាច់ ត្រូវតែពិនិត្យឈាមរកមេរោគជំងឺអេដស៍ មិនអាចមើលរំលងបានឡើយ ។
យុវជន ដែលដល់ពេលរៀបអាពាហ៍ពិពាហ៍ មិនអាចភ្លេចខ្លួនចំណុចនេះដាច់ខាត ។ ហើយកន្លែងពិនិត្យដែលសុវត្ថិភាព គឺមន្ទីរថ្នាក់ជាតិ យើងមានគ្រប់កន្លែងធ្វើតេស្ត ឬក៏អាចមកដលល់អង្គការមូលនិធិថែទាំសុខភាពអេដស៍ (AHF) កម្ពុជាក៏បានដូចគ្នា ។
អង្គការមូលនិធិថែទាំសុខភាពអ្នកជំងឺអេដស៍ គឺជាអង្គការពិភពលោកដ៏ធំបំផុតដែលបាន និងកំពុងផ្តល់សេវាថែទាំព្យាបាលដោយមិនគិតពីលទ្ធភាពនៃការបង់ប្រាក់ដល់អតិថិជនជាង២.៥លាននាក់ក្នុង៥០ប្រទេសជុំវិញពិភពលោក ដូចជា នៅសហរដ្ឋអាមេរិក អាហ្វ្រិក អាមេរិកឡាទីន ការាបៀន តំបន់អាស៊ី ប៉ាស៊ីហ្វិក និងអឺរ៉ុប៕
ចែករំលែកព័តមាននេះ