ទីក្រុងវ៉ាស៊ីនតោន៖ រដ្ឋមន្ត្រីការពារជាតិអាមេរិក លោកភីតហេកស៊ីតបានជួបសន្ទនាគ្នាជាលើកដំបូងជាមួយសមភាគីចិន។ លោកសង្កត់ធ្ងន់ថាអាមេរិកមិនចង់មានជម្លោះប្រដាប់អាវុធជាមួយចិនទេ ប៉ុន្តែទន្ទឹមនឹងនោះ អាមេរិកនឹងការពារផលប្រយោជន៍ជាតិរបស់ខ្លួនសំខាន់ៗជាអាយុជីវិតនៅអាស៊ី និងតំបន់ប៉ាស៊ីហ្វិច។ ខាងលើនេះជាការថ្លែងរបស់មន្ទីរបញ្ចកោណ។
សព្វថ្ងៃនេះ ប្រទេសចិនជាគូប្រជែងរបស់អាមេរិកនៅក្នុងផ្នែកភូមិសាស្ត្រនយោបាយ។ លោកហេកស៊ីតធ្លាប់ធ្វើឱ្យប្រទេសចិនខឹងសម្បារម្ដងហើយកាលពីខែឧសភា។ កាលនោះ លោកអំពាវនាវឱ្យក្រុមសម្ព័ន្ធមិត្តនៅក្នុងតំបន់នេះត្រៀមចំណាយថវិកាឱ្យបានច្រើនថែមទៀតទៅលើវិស័យការពារជាតិព្រោះការគំរាមកំហែងពីសំណាក់ប្រទេសចិនមានកាន់តែខ្លាំង។
យោងតាមអ្នកនាំពាក្យមន្ទីរបញ្ចកោណ លោកហេកស៊ីត និងរដ្ឋមន្ត្រីការពារជាតិចិន លោកតុងជុន (Dong Jun) បានសន្ទនាគ្នាតាមទូរស័ព្ទប្រកបដោយភាពហ្មត់ចត់ និងស្ថាបនា។ បញ្ចកោណថ្លែងបន្តទៀតថាលោកហេកស៊ីតជម្រាបជូនមិត្តចិនថាអាមេរិកមិនមែនចង់មានជម្លោះជាមួយចិន, មិនចង់ផ្លាស់ប្ដូររបបដឹកនាំ ឬហ៊ុមព័ទ្ធប្រទេសចិននោះឡើយ។ លោកសូមតែម្យ៉ាងទេ ធ្វើម៉េចការពារផលប្រយោជន៍អាមេរិកនៅអាស៊ី-ប៉ាស៊ីហ្វិចឱ្យខាងតែបានទោះបីនៅក្នុងតម្លៃណាក៏ដោយ។
ភាគីទាំង២ឯកភាពគ្នាថានឹងបន្តការសន្ទនាគ្នានៅពេលក្រោយៗទៀត។ ថ្មីៗនេះ លោកត្រាំបញ្ជាឱ្យកែឈ្មោះក្រសួងការពារជាតិទៅជាក្រសួងសង្គ្រាមវិញ។ ដូច្នេះ រដ្ឋមន្ត្រីការពារជាតិក៏ត្រូវដូរទៅជារដ្ឋមន្ត្រីសង្គ្រាមផងដែរ។ ការសន្ទនាគ្នារវាងអាមេរិក និងចិនលើកនេះធ្វើឡើងបន្ទាប់ពីចិនទើបតែរំលឹកខួប៨០ឆ្នាំនៃទិវាជ័យជម្នះកាលពីសប្ដាហ៍មុន។ នៅក្នុងឱកាសថ្លែងសុន្ទរកថានោះប្រធានាធិបតីចិន លោកស៊ីជីនពីង បានទទួលស្វាគមន៍បុរសខ្លាំង២រូបគឺលោកពូទីន និងលោកគីមជុងអ៊ុនជាភ្ញៀវកិត្តិយស។ ទោះបីក្រុមអ្នកវិភាគមិនទាន់ហ៊ានសន្និដ្ឋានយ៉ាងណា ប៉ុន្តែប្រទេសមួយចំនួនគិតថាថ្នាក់ដឹកនាំទាំងបីនេះអាចនាំមកនូវការផ្លាស់ប្ដូរផ្នែកភូមិសាស្ត្រនយោបាយព្រោះប្រទេសទាំងបីប្រកាសជាចំហតែម្ដងជាពិសេស ចិន និងរុស្ស៊ីថាពួកគេចង់រៀបចំសណ្ដាប់ធ្នាប់ពិភពលោកឡើងវិញដែលប្រកបដោយភាពស្មើគ្នា និងមានយុត្តិធម៌ជាងមុន។ ក្រុមនេះហៅខ្លួនឯងថាក្រុមអឌ្ឍគោលខាងត្បូង (Global South) ដើម្បីប្រជែងជាមួយក្រុមបស្ចិមប្រទេស។ នេះបើយោងតាមឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ