ខេត្តព្រះវិហារ ៖ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តមអភិសន្តិបណ្ឌិត ស សុខា បានដឹកនាំគណៈប្រតិភូ អញ្ជើញចុះជួបសំណេះសំណាល សួរសុខទុក្ខ…
ខេត្តព្រះវិហារ ៖ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តមអភិសន្តិបណ្ឌិត ស សុខា បានដឹកនាំគណៈប្រតិភូ អញ្ជើញចុះជួបសំណេះសំណាល សួរសុខទុក្ខ និងនាំយកអំណោយផ្តល់ជូនពលរដ្ឋភៀសសឹក ដែលកំពុងស្នាក់នៅមណ្ឌលសុវត្ថិភាពវត្តពោធិ៍ ៥០០០ដើម នៅថ្ងៃទី៨ ខែ
កញ្ញា ឆ្នាំ២០២៥ ស្ថិតក្នុងស្រុកគូលែន ខេត្តព្រះវិហារ ។
លោក គីម រិទ្ធី អភិបាលខេត្តព្រះវិហារ បានថ្លែងថា វត្តមានរបស់ឯកឧត្តម ឧបនាយករដ្ឋមន្ត្រី នាពេលនេះ គឺពិតជាបានឆ្លុះបញ្ចាំងឱ្យឃើញនូវការយកចិត្តទុកដាក់ ក្តីស្រឡាញ់ ក្តីអាណិតអាសូរ និងគិតគូរអំពីសុខទុក្ខរបស់បងប្អូនប្រជាពលរដ្ឋក្នុងគ្រាលំបាក ជាពិសេស គឺស្ថិតក្នុងកាលៈទេសៈ ដែលកំពុងប្រឈមនឹងការឈ្លានពាន ដោយកម្លាំងប្រដាប់អាវុធសៀម រំលោភបំពានយ៉ាងធ្ងន់ធ្ងរមកលើបូរណភាពទឹកដី និងអធិបតេយ្យភាពរបស់កម្ពុជា ។
រដ្ឋមន្ត្រី ក្រសួងមហាផ្ទៃ ឯកឧត្តម អភិសន្តិបណ្ឌិត ស សុខា បានមានប្រសាសន៍ ពាំនាំការផ្តាំផ្ញើរសាកសួរសុខទុក្ខពីសំណាក់ សម្តេចអគ្គមហាសេនាបតី តេជោហ៊ុន សែន ប្រធានព្រឹទ្ធសភាកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ជូនដល់បងប្អូនប្រជាពលរដ្ឋ ដែលកំពុងស្នាក់នៅបណ្តោះអាសន្ន នៅក្នុងមណ្ឌលសុវត្ថិភាពវត្តពោធិ៍ ៥០០០ដើម ទាំងអស់ ក្នុងគ្រានោះផងដែរ ។
ឯកឧត្តម អភិសន្តិបណ្ឌិត ស សុខា បានមានប្រសាសន៍ទៀតថា សម្តេចទាំងទ្វេតែងតែគិតគូរ យកចិត្តទុកដាក់ខ្ពស់ជានិច្ច ចំពោះសុខទុក្ខបងប្អូនប្រជាពលរដ្ឋ ដែលជាជនភៀសសឹក ក៏ដូចជាគ្រួសារកងទ័ព និងវិរៈយុទ្ធជនគ្រប់រូប ដែលបានបំពេញភារកិច្ច ដើម្បីការពារបូរណភាពទឹកដី។
ឯកឧត្តម បានបញ្ជាក់ថា គ្រប់ការលះបង់សាច់ស្រស់ ឈាមស្រស់ទាំងអស់របស់វីរៈយុទ្ធជន ត្រូវបានថ្នាក់ដឹកនាំជាតិ ចងចាំ និងដឹងគុណជានិច្ច ហើយក្រុមគ្រួសាររបស់វីរៈយុទ្ធជន នឹងមិនត្រូវបានបំភ្លេចចោលនោះឡើយ។
អំណោយដែលបាននាំទៅនោះរួមមាន ៖ អង្ករ ទឹកបរិសុទ្ធ តង់កៅស៊ូ គ្រឿងឧបភោគ បរិភោគ សម្ភារបរិក្ខាប្រើប្រាស់ចាំបាច់ផ្សេងៗ រួមទាំងថវិកាមួយចំនួនទៀត។
គួរបញ្ជាក់ថា នៅរសៀលថ្ងៃដដែលនេះ ឯកឧត្តម អភិសន្តិបណ្ឌិត ស សុខា ក៏បានអញ្ជើញដឹកនាំគណៈប្រតិភូក្រសួង ចុះសួរសុខទុក្ខ និងការនាំយកអំណោយ ចែកជូនដល់អង្គភាពវរនគរបាលការពារព្រំដែនគោក និងជនភៀសសឹក នៅក្នុងខេត្តពីរទៀត គឺខេត្តសៀមរាប និងខេត្តឧត្តរមានជ័យ ផងដែរ ។
អំណោយទាំងនោះ ត្រូវបានប្រគល់ជូនរដ្ឋបាលខេត្ត និងស្នងការដ្ឋាននគរបាលខេត្តសៀមរាប និងខេត្តឧត្តរមានជ័យ សម្រាប់បន្តនាំយកទៅចែកជូនដល់ វរនគរបាលការពារព្រំដែនគោក និងប្រជាពលរដ្ឋ ជាជនភៀសសឹក ដែលបានភៀសខ្លួនពីតំបន់ព្រំដែនកម្ពុជា-ថៃ មកស្នាក់នៅតាមមណ្ឌលសុវត្ថិភាពក្នុងខេត្តសៀមរាប និងខេត្តឧត្តរមានជ័យ។ រីឯការផ្តល់អំណោយទាំងនេះ បានធ្វើឡើងនៅសាលាខេត្តសៀមរាប ៕
ចែករំលែកព័តមាននេះ