ខេត្តមណ្ឌលគិរី ៖ នារសៀលថ្ងៃទី៥ ខែកញ្ញា ឆ្នាំ២០២៥ នៅសាលមហោស្រពមន្ទី្រវប្បធម៍ និងវិចិត្រសិល្បៈខេត្តមណ្ឌលគិរី បានរៀបចំពិធី មហោស្រពចម្រៀង និងម្ហូបអាហារជនជាតិដើមភាគតិច…
ខេត្តមណ្ឌលគិរី ៖ នារសៀលថ្ងៃទី៥ ខែកញ្ញា ឆ្នាំ២០២៥ នៅសាលមហោស្រពមន្ទី្រវប្បធម៍ និងវិចិត្រសិល្បៈខេត្តមណ្ឌលគិរី បានរៀបចំពិធី មហោស្រពចម្រៀង និងម្ហូបអាហារជនជាតិដើមភាគតិច ឆ្នាំ២០២៥ ក្រោមអធិបតីភាពឯឧត្តម ម៉ែន ង៉ុយ ប្រធានក្រុមប្រឹក្សាខេត្ត លោក នួន សារ៉ន អភិបាលខេត្តស្តីទី និងមានការចូលរួមពីតំណាងកងកម្លាំងទាំងបីប្រភេទ លោក លោកស្រី ប្រធាន អនុប្រធានមន្ទីរជុំវិញខេត្ត ក្រុមយុវជន (ស.ស.យ.ក) យុវជនកាយរិទ្ឋ សិស្សនិសិត្ស ជាច្រើនរូប ។
លោក នួន សារ៉ន អភិបាលខេត្តមណ្ឌលគិរីស្តីទី បានកោតសសើរដល់ ចំពោះថ្នាក់ដឹកនាំ និងមន្ត្រីរាជការ នៃមន្ទីរវប្បធម៌ និងវិចិត្រសិល្បៈខេត្តទាំងអស់ ដែលបានខិតខំប្រឹងប្រែង យកអស់កម្លាំងកាយចិត្ត ប្រាជ្ញា និងស្មារតី ក្នុងការចូលរួមអនុវត្តការងារឱ្យទទួលបានជោគជ័យ និងសូមឱ្យបន្តយកចិត្តទុកដាក់ អនុវត្តសកម្មភាពការងារ ឱ្យបានកាន់តែល្អប្រសើរឡើងថែមទៀត ដើម្បីឈានទៅសម្រេចឱ្យបាននូវគោលនយោបាយជាតិស្តីពី “ការអភិរក្ស និងអភិវឌ្ឍន៍វប្បធម៌ជាតិ” ដោយអនុវត្តន៍ស្របតាមគោលនយោបាយដឹកនាំរបស់រាជរដ្ឋាភិបាលកម្ពុជាដែលមាន សម្តេចបរវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជាប្រមុខដឹកនាំដ៏ឆ្នើម ។
លោកអភិបាលខេត្តស្តីទី បានលើកទឹកចិត្ត បានបន្តថា ចំពោះបងប្អូនបេក្ខជននិងបេក្ខនារី ដែលទទួលបានជ័យលាភីគឺត្រូវបន្តហ្វឹកហាត់ថែមទៀត ដើម្បីមានឱកាសទៅចូលរួមព្រឹត្តិការណ៍មហោស្រពនានានៅថ្នាក់ជាតិ និងថ្នាក់ខេត្តជាបន្តបន្ទាប់ទៀត ដើម្បីដណ្ដើមជ័យលាភីជូនខេត្ត និងកិត្តិយសផ្ទាល់ខ្លួន។ដោយឡែកសម្រាប់បេក្ខជន បេក្ខនារី ដែលពុំបានទទួលជ័យលាភី សូមកុំអាក់អន់ ស្រពោនចិត្តសូមបងប្អូន បន្តខិតខំទៀត សម្រាប់ឱកាសក្រោយៗ ព្រោះមន្ទីរវប្បធម៌ និងវិចិត្រសិល្បៈ ដែលជាសេនាធិការឱ្យរដ្ឋបាលខេត្ត នឹងរៀបឱ្យមានមហោស្រពបែបនេះ ជារៀងរាល់ឆ្នាំ ដូចនេះត្រូវបន្តព្យាយាមទៀតដើម្បីបងប្អូន បានសម្រេចនូវគោលបំណងរបស់ខ្លួន ។
លោកក៏បានផ្តាំផ្ញើរដល់មន្ទីរវប្បធម៌ និងវិចិត្រសិល្បៈខេត្ត ត្រូវចូលរួមបង្កលក្ខណៈដល់បេក្ខជន បេក្ខនារី ដែលមានចំណាប់ អារម្មណ៍លើវិស័យវប្បធម៌ និងវិចិត្រសិល្បៈឱ្យកាន់តែទូលំទូលាយ ដើម្បីឱ្យមានការ ចូលរួមប្រកួតប្រជែង កាន់តែមានលក្ខណៈល្អប្រសើរពីមួយឆ្នាំ ទៅមួយឆ្នាំ ព្រោះមន្ទីរវប្បធម៌ និងវិចិត្រសិល្បៈជាយាន ដើម្បីឱ្យយុវជន មានឱកាសបញ្ចេញ នូវសមត្ថភាពរបស់ខ្លួន លើវិស័យសិល្បៈ និងវប្បធម៌នេះ។
លោក សុខ ទីឃាវុឌ្ឍ ប្រធានមន្ទីរវប្បធម៍ និងវិចិត្រសិល្បៈខេត្តមណ្ឌលគិរី បានឲ្យដឹងថា ក្រោយពីទទួលបានការអនុញ្ញាតពី រដ្ឋបាលខេត្ត និងមានការចង្អុលបង្ហាញណែនាំដោយផ្ទាល់ ពីឯកឧត្ដមប្រធានក្រុមប្រឹក្សាខេត្ត និងឯកឧត្តមអភិបាលខេត្តមណ្ឌលគិរី មន្ទីរ ក៏បានធ្វើការផ្សព្វផ្សាយ ជ្រើសរើសបេក្ខជន បេក្ខនារីដើម្បីចូលមកប្រកួតវិញ្ញាសារចម្រៀងសម័យ និងបានធ្វើ ការពិពណ៌ខ្នាតតូចបង្ហាញនូវម្ហូបបងប្អូនជនជាតិដើមភាគតិច និងម្ហូបខ្មែរមកបង្ហាញពីមុខម្ហូប សរុបចំនួន៦មុខ និងបង្អែមចំនួន១មុខ។
លោកប្រធានមន្ទីរបន្តថា ក្នុងពិធីខាងលើនេះ សម្រាប់បេក្ខជននិងបេក្ខនារី ដែលបានប្រឡងប្រជែងប្រកួតសមត្ថកិច្ចច្រៀង មានចំនួន១២រូប និងមានអ្នកជាប់ពីចំណាត់ថ្នាក់លេខ១ដល់លេខ៣ ហើយទទួលបាននូវពានរង្វាន់កិត្តិយស និងប្រាក់ឧបត្ថម្ភពីសំណាក់ថ្នាក់ដឹកនាំខេត្តផងដែរ ៕
ចែករំលែកព័តមាននេះ