ទីក្រុងបាងកក៖ នៅទីបំផុត លោកអនុទីនត្រូវរដ្ឋសភាបោះឆ្នោតឱ្យក្លាយជានាយករដ្ឋមន្ត្រីពេញសិទ្ធិទី៣២របស់ប្រទេសថៃបន្ទាប់ពីលោកទទួលបានសំឡេងគាំទ្រភាគច្រើនដាច់ខាតដើម្បីបង្កើតរដ្ឋាភិបាលនៅអាណត្តិថ្មី។ ការទទួលបានសំឡេងគាំទ្រភាគច្រើននេះដោយសារមានការជួយជ្រោមជ្រែងពីគណបក្សប្រជាជនដែលមានអាសនៈ១៤៣នៅក្នុងរដ្ឋសភា។
នៅក្នុងចំណោមអ្នកតំណាងរាស្ត្រសរុប៤៩០រូប អ្នកតំណាងរាស្ត្រ៣១១រូបបោះឆ្នោតគាំទ្រលោកអនុទីន, ១៥២រូបបោះឆ្នោតគាំទ្រលោកឆៃកាសេមដែលមកពីគណបក្សភឿថៃ និង២៧រូបបោះឆ្នោតអនុបវាទ។ យោងតាមរដ្ឋធម្មនុញ្ញថៃ ដើម្បីឱ្យបេក្ខជនណាម្នាក់ក្លាយជានាយករដ្ឋមន្ត្រីបានលុះត្រាតែទទួលបានការគាំទ្រយ៉ាងតិច២៤៧សំឡេងពីអ្នកតំណាងរាស្ត្រ។
ជាក់ស្ដែង លោកអនុទីនទទួលបានលើសឆ្ងាយពីចំនួនកំណត់នេះទៅទៀត។ តាំងពីមុនការជាប់ឆ្នោតនេះ ការស្ទង់មតិក៏ចាប់ផ្ដើមលេចចេញមកជាបណ្ដើរៗថាលោកអនុទីនអាចនឹងក្លាយជានាយករដ្ឋមន្ត្រី។ បន្ទាប់ពីជួយឱ្យលោកអនុទីនជាប់ឆ្នោតជានាយករដ្ឋមន្ត្រីរួចហើយ គណបក្សប្រជាជនបានអំពាវនាវឱ្យគណបក្សភឿថៃត្រៀមខ្លួនធ្វើជាគណបក្សប្រឆាំង។
លោកអនុទីនជាអ្នកអភិរក្សនិយម និងក៏ជាអ្នករាជានិយមដ៏ខ្លាំងក្លាម្នាក់ផងដែរ។ មុនពេលបោះឆ្នោតនៅល្ងាចមិញនេះ លោកអនុទីនមិនបានធ្វើអត្ថាធិប្បាយអ្វីទេនៅក្នុងរដ្ឋសភា។ គេគិតថាលទ្ធផលឆ្នោតនេះជាក្ដីអាម៉ាស់យ៉ាងខ្លាំងរបស់ភឿថៃដែលជាគណបក្សកាន់អំណាច។ មេដឹកនាំស្រមោលរបស់គណបក្សនេះគឺលោកថាក់ស៊ីនទើបតែចាកចេញទៅដល់ទីក្រុងឌូបៃ។
គេមិនទាន់ដឹងថាក្រោយពេលចេញលទ្ធផលឆ្នោតនេះ តើលោកថាក់ស៊ីននឹងមានគម្រោង ឬផែនការយ៉ាងដូចម្ដេចទៀត។ ជាពិសេស គេចង់ដឹងថាតើលោកនឹងវិលត្រឡប់ទៅថៃវិញដើម្បីស្ដាប់សេចក្ដីសម្រេចរបស់តុលាការដូចការសន្យាឬយ៉ាងណា។ គណបក្សភឿថៃចាប់ផ្ដើមជួបប្រទះនឹងបញ្ហាធំបន្ទាប់ពីលោកអនុទីន និងគណបក្សភូមិចៃថៃរបស់លោកប្រកាសដកខ្លួនពីរដ្ឋាភិបាលចម្រុះ។ ហេតុនេះ ភឿថៃដឹកនាំរដ្ឋាភិបាលដោយសំឡេងភាគតិចនៅក្នុងសភា។
ក្រោយមក លោកស្រីផែថងថានត្រូវតុលាការធម្មនុញ្ញដកតំណែងទៅទៀត។ ដូច្នេះ គណបក្សនេះក៏ចាប់ផ្ដើមហេលហាលនិងអស់ដៃអស់ជើងកាន់តែខ្លាំងមែនទែន។ នៅទីបញ្ចប់ គណបក្សភឿថៃស្នើសុំរំលាយសភាក៏ត្រូវបានក្រុមប្រឹក្សាព្រះរាជបល្ល័ង្គបដិសេធ អំពាវនាវឱ្យគណបក្សប្រជាជនបោះឆ្នោតគាំទ្របេក្ខជនរបស់ខ្លួនក៏មិនបានសម្រេចទៀត។ នេះបើយោងតាមដឹណេសិន (The Nation), រ៉យទ័រ (Reuters) និងប្រភពដទៃទៀត៕
ចែករំលែកព័តមាននេះ