ខេត្តប៉ៃលិន ៖ មកដល់ថ្ងៃទី០៣ ខែកញ្ញា ឆ្នាំ២០២៥នេះ បើគេសង្កេតមើលទៅក្នុងវាលស្រែដ៏ធំល្វឹងល្វើយឆ្ងាយដាច់កន្ទុយភ្នែក ស្ថិតនៅក្នុងភូមិភ្នំកុយ និងភូមិនានា ក្នុងឃុំសាលាក្រៅ ស្រុកសាលាក្រៅ…
ខេត្តប៉ៃលិន ៖ មកដល់ថ្ងៃទី០៣ ខែកញ្ញា ឆ្នាំ២០២៥នេះ បើគេសង្កេតមើលទៅក្នុងវាលស្រែដ៏ធំល្វឹងល្វើយឆ្ងាយដាច់កន្ទុយភ្នែក ស្ថិតនៅក្នុងភូមិភ្នំកុយ និងភូមិនានា ក្នុងឃុំសាលាក្រៅ ស្រុកសាលាក្រៅ ឃើញដំណាំស្រូវប្រាំងឆ្នាំ២០២៥នេះ មានទឹកដក់ក្នុងស្រែគ្រប់គ្រាន់ ពោលគឺមានអំណោយផលល្អ ដោយសារតែភ្លៀងធ្លាក់មធ្យម ធ្វើឱ្យប្រជាពលរដ្ឋមានចិត្តសប្បាយរីករាយ ហើយសង្ឃឹមថា នឹងទទួលបានទិន្នផលខ្ពស់ ខណៈដែលការប្រមូលផលកាន់តែកៀកខិតជិតមកដល់ ។
បើតាមការរៀបរាប់ពីកសិករម្នាក់ ឈ្មោះ ញឹម ប៊ុនលី ភេទប្រុស អាយុ៣៧ឆ្នាំ រស់នៅក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន បានឱ្យភ្នាក់ងារយើងដឹងថា ៖ លោកមានស្រែប្រាំងចំនួន ៣ហិកតា ស្ថិតនៅក្នុងភូមិខាងលើ ដោយចាប់តាំងពីព្រោះគ្រាប់ស្រូវ រហូតមកដល់ពេលនេះ មានរយៈពេលជិត៣ខែមកហើយ គឺសង្កេតឃើញដើមស្រូវដុះលូតលាស់យ៉ាងល្អ គួរឱ្យកត់សម្គាល់ ពោលគឺបញ្ចេញពណ៌ខៀវខ្ចីពេញផ្ទៃដីស្រែតែម្តង ក៏មានទឹកគ្រប់គ្រាន់ មិនខ្វះដូចឆ្នាំមុនៗឡើយ ។
លោកបន្តទៀតថា នៅពេលប្រមូលផលស្រូវ នាថ្ងៃខាងមុខ លោកសង្ឃឹមថា នឹងទទួលបានទិន្នផលខ្ពស់ អាចលក់បានប្រាក់សងជំពាក់បំណុលគេ និងទុកមួយចំនួនសម្រាប់ផ្គត់ផ្គង់ជីវភាពប្រចាំថ្ងៃ ។
លោកបញ្ជាក់ទៀតថា តម្លៃស្រូវប្រភេទអូអឹម៥១៥៤ ឈ្មួញទិញ ក្នុង១គីឡូក្រាម តម្លៃ៦០០រៀល។ រីឯស្រូវប្រភេទស្រងែ ឈ្មួញទិញក្នុង១គីឡូក្រាម តម្លៃ៦៦០រៀល ក៏អាចទាបជាងនេះ បើសិនជាគ្រាប់ស្រូវ ដែលប្រមូលផលរួច មិនសូវល្អ មានលាយផ្កាស្មៅ ឬគ្រាប់ក្រជីបជាដើម។
ទោះបីជាយ៉ាងណាក៏ដោយ ក្រោយពេលប្រមូលផលលក់រួច នាថ្ងៃខាងមុខឆាប់ៗនេះ លោកអាចនឹងទទួលបានថវិកាសងជំពាក់បំណុលគេរួចរាល់ ដោយសល់ខ្លះទុកធ្វើពូជបន្តទៀត ។
បើតាមប្រភពពីលោក សាយ សុផាត ប្រធានមន្ទីរកសិកម្មខេត្តប៉ៃលិន បានឱ្យដឹងដែរថា ចំពោះការងារដាំដុះដំណាំស្រូវ នាឆ្នាំ២០២៥នេះ គឺប្រជាពលរដ្ឋអនុវត្តបាន (បូកយោងសរុប ៨,៦១៧ហិកតា) ។
លោកបន្តទៀតថា រីឯការងារប្រមូលផល ដំណាំស្រូវជាទូទៅ គឺអនុវត្តបានចំនួន ៦ហិកតា ស្មើនឹងបរិមាណផល ៣១.៤តោន (បូកយោងសរុប ៧៣ហិកតា និងបរិមាណផលស្មើនឹង ៣៨២តោន) ដោយនៅឆ្នាំថ្មីនេះ ការប្រមូលផលស្រូវប្រាំងរបស់ប្រជាពលរដ្ឋ សង្ឃឹមថា នឹងទទួលបានទិន្នផលខ្ពស់ជាង ឬប្រហាក់ប្រហែលនឹងឆ្នាំមុនៗដែរ ព្រោះឆ្នាំនេះ មានទឹកភ្លៀងធ្លាក់មធ្យម មិនខ្វះខាតទឹកបូមបញ្ចូលស្រែប្រាំង និងស្រែវស្សានោះឡើយ ៕
ចែករំលែកព័តមាននេះ