ទីក្រុងបាងកក៖ គណបក្សប្រជាជនបានសម្រេចចិត្តធ្វើរឿងដែលគេនឹកស្មានមិនដល់នៅក្នុងនយោបាយថៃ នោះគឺការប្រកាសជាចំហ និងបញ្ជាក់ម្ដងហើយម្ដងទៀតថាខ្លួនគាំទ្រយ៉ាងពេញទំហឹងចំពោះប្រធានគណបក្សភូមិចៃថៃលោកអនុទីន ចាន់វីរៈគល់ជានាយករដ្ឋមន្ត្រីទី៣២របស់ថៃ។ ប៉ុន្តែគណបក្សប្រជាជនប្រើយុទ្ធសាស្ត្រចងជើងលោកអនុទីន។ នោះគឺមិនចូលរួមនៅក្នុងរដ្ឋាភិបាលចម្រុះដែលត្រៀមបង្កើតនោះទេ។ នៅក្នុងលក្ខខណ្ឌបោះឆ្នោតគាំទ្រលោកអនុទីននោះ លោកសន្យាថានឹងរំលាយសភាក្រោយពេលដឹកនាំរដ្ឋាភិបាលបាន៤ខែ។
ដោយឡែក គណបក្សភឿថៃពេលនេះហាក់ដូចជាងាប់ក្រឡា ឬអស់ផ្លូវដើរតទៅទៀត។ ដូច្នេះ ស្នៀតចុងក្រោយរបស់ភឿថៃគឺស្នើសុំរំលាយសភា។ ភឿថៃបានពន្យល់អំពីមូលហេតុដែលខ្លួនសម្រេចចិត្តបញ្ជូនសំណើថ្វាយព្រះមហាក្សត្រដើម្បីរំលាយសភា។ ភឿថៃអះអាងថាមានតែវិធីនេះមួយគត់ដែលអាចចាកផុតពីវិបត្តិនយោបាយ។ ការសម្រេចចិត្តនេះក៏ធ្វើឡើងបន្ទាប់ពីភឿថៃដឹងច្បាស់ថាខ្លួនមិនអាចកៀងគរការគាំទ្រពីគណបក្សប្រជាជនដើម្បីកាន់អំណាចជាបន្តទៀតទេ។ ទន្ទឹមនឹងនោះ ភឿថៃមិនចង់ឃើញគណបក្សដទៃទៀតកាន់អំណាចបន្តពីខ្លួនទេ។ ដូច្នេះ ខ្លួនចង់រៀបចំការបោះឆ្នោតឡើងវិញ។
ប៉ុន្តែផែនការរបស់ភឿថៃត្រូវក្រុមប្រឹក្សារដ្ឋបញ្ជាក់ម្ដងជាពីរដងហើយថាមានតែនាយករដ្ឋមន្ត្រីពេញសិទ្ធិតែប៉ុណ្ណោះទើបមានសិទ្ធិរំលាយសភា។ ចំណែកនាយករដ្ឋមន្ត្រីចាំផ្ទះ លោកភូមិថាម វិឆាយ៉ាឆៃ មិនអាចរំលាយសភាបានឡើយ។ ឥឡូវនេះ មានក្រុមខ្លះចង់ដាក់ពាក្យប្ដឹងលោកភូមិថាមទៅតុលាការក្រោមហេតុផលថាការធ្វើដូច្នេះមានន័យស្មើនឹងប្រមាថព្រះមហាក្សត្រ។
រហូតមកដល់ពេលនេះ សភាមិនទាន់កំណត់ពេលវេលាជាក់លាក់ដើម្បីរៀបចំការបោះឆ្នោតផ្ដល់សេចក្ដីទុកចិត្តទៅលើបេក្ខជនរូបណាទេ ហើយគេមិនទាន់ដឹងថាតើព្រះមហាក្សត្រយល់ព្រមតាមការស្នើសុំរំលាយសភាដែរឬទេ។ ប្រភពខ្លះថាក្រុមប្រឹក្សាព្រះរាជបល្ល័ង្គ (Privy Council) បដិសេធមិនទទួលសំណើរបស់លោកភូមិថាមទេ។ អ្នកសារព័ត៌មានព្យាយាមស្កាត់ជួបលោកភូមិថាមដើម្បីបញ្ជាក់អំពីការច្រានចោលសំណើរបស់លោក។ ប៉ុន្តែលោកសូមរក្សាភាពស្ងៀមស្ងាត់ មិនធ្វើអត្ថាធិប្បាយអ្វីទាំងអស់។ ក្រុមប្រឹក្សារដ្ឋដែលជាស្ថាប័នពិគ្រោះ និងផ្ដល់យោបល់ជូនរាជរដ្ឋាភិបាលបានប្រកាសជាហូរហែហើយថានាយករដ្ឋមន្ត្រីចាំផ្ទះគ្មានសិទ្ធិធ្វើរឿងនេះទេ។ ជម្រើសតែមួយគត់គឺត្រូវរង់ចាំសភាបោះឆ្នោតផ្ដល់សេចក្ដីទុកចិត្តទៅលើបេក្ខជនរូបណាសិន។
ដើម្បីធានាថានាយករដ្ឋមន្ត្រីថ្មីនឹងរំលាយរដ្ឋសភានៅក្នុងអំឡុងពេល៤ខែ គណបក្សភូមិចៃថៃមិនត្រូវបង្កើតរដ្ឋាភិបាលដែលមានសំឡេងភាគច្រើនដាច់ខាតទេ។ ជាមួយនឹងសំឡេងអ្នកតំណាងរាស្ត្រ១៤៦រូប អនាគតរដ្ឋាភិបាលចម្រុះដែលដឹកនាំដោយគណបក្សភូមិចៃថៃអាចដំណើរការទៅបានជាលក្ខណៈរដ្ឋាភិបាលសំឡេងភាគតិច។ ដូច្នេះ នៅក្នុងក្របខណ្ឌសភា បើរដ្ឋាភិបាលចង់អនុម័តច្បាប់អ្វីមួយត្រូវការសំឡេងគាំទ្រពីអ្នកតំណាងរាស្ត្ររបស់គណបក្សប្រជាជនជាចាំបាច់។
គណបក្សប្រជាជនប្រើស្នៀតមួយគឺបោះឆ្នោតគាំទ្រលោកអនុទីន ប៉ុន្តែមិនចូលរួមនៅក្នុងរដ្ឋាភិបាលចម្រុះទេ។ គេអាចចាត់ទុកថានេះជាយុទ្ធសាស្ត្រចងជើង។ មានន័យថាបើលោកអនុទីនធ្វើអ្វីមិនស្រួល ជាពិសេសមិនធ្វើតាមសន្យា គណបក្សប្រជាជនអាចនឹងទម្លាក់វិញ។ គណបក្សប្រជាជនសន្យាថាខ្លួននឹងបន្តឃ្លាំមើលការបំពេញការងាររបស់រដ្ឋាភិបាលថ្មីដោយយកចិត្តទុកដាក់។ ខាងលើនេះជាការដកស្រង់ប្រភពពីភីប៊ីអែស (PBS), ខាវសត់ (Khaosod) និងប្រភពដទៃទៀត៕
ចែករំលែកព័តមាននេះ