ទីក្រុងប៉េកាំង៖ នៅក្នុងការរំលឹកខួប៨០ឆ្នាំនៃការបិទបញ្ចប់សង្គ្រាមលោកលើកទី២ ប្រទេសចិននៅថ្ងៃនេះបានបង្ហាញអាវុធយុទ្ធភ័ណ្ឌទំនើបចុងក្រោយរបស់ខ្លួន និងការដើរក្បួនព្យុហយាត្រារបស់កងទ័ពរាប់ម៉ឺននាក់។ គេឃើញកងទ័ពកិត្តិយស, ក្បួនដង្ហែរថពាសដែក និងយន្តហោះចម្បាំងហោះងងឹតមេឃនៅលើទីលានធានអានមេន។ នេះជាការរំលឹកអនុស្សាវរីយ៍ទៅដល់សម័យសង្គ្រាម ហើយនិងការធ្វើទំនើបកម្មវិស័យការពារជាតិរបស់ចិន។
ថ្នាក់ដឹកនាំប្រទេសមួយចំនួនក៏បានអញ្ជើញចូលរួមនៅក្នុងពិធីនោះផងដែរ ជាពិសេស វត្តមានរបស់ថ្នាក់ដឹកនាំរុស្ស៊ីលោកពូទីន និងកូរ៉េខាងជើង លោកគីមជុងអ៊ុន។ ។ ក្រៅពីនេះ ថ្នាក់ដឹកនាំ ឬឥស្សរជនជាន់ខ្ពស់មកពីបណ្ដាប្រទេសនៅអាស៊ីអាគ្នេយ៍មួយចំនួនក៏បានចូលរួមផងដែរ។ ប៉ុន្តែក្រុមបស្ចិមប្រទេសភាគច្រើនមិនបានចូលរួមទេព្រោះតែការប្រជែងគ្នាផ្នែកភូមិសាស្ត្រនយោបាយ។ ប្រទេសចិនជាអ្នកទ្រទ្រង់សំខាន់នៅក្នុងភូមិសាស្ត្រអឌ្ឍគោលខាងត្បូងដើម្បីប្រជែងជាមួយបស្ចិមប្រទេស។ ប្រទេសចិនតែងតែរំលេចឱ្យឃើញនូវទស្សនវិស័យចង់រៀបចំសណ្ដាប់ធ្នាប់ពិភពលោកឡើងវិញដែលប្រកបដោយសមភាព និងយុត្តិធម៌ និងប្រព័ន្ធអភិបាលកិច្ចសាកល។
លោកស៊ីជីនពីងបានស្លៀកពាក់ឈុតម៉ៅសេទុង និងធ្វើជាគណៈអធិបតីនៃពិធីរំលឹកខួបនេះ។ លោកបានថ្លែងសុន្ទរកថា និងសារនយោបាយមួយចំនួន។ បន្ទាប់មក លោកឈរនៅលើរថយន្តដែលបើកដោយសន្សឹមៗដើម្បីត្រួតពល។ លោកបានរំលឹកទៅដល់គុណូបការៈរបស់អតីតយុទ្ធជនចិនដែលបានបូជាសាច់ស្រស់ ឈាមស្រស់ដើម្បីបុព្វហេតុជាតិមាតុភូមិ។ លោកបញ្ជាក់ជាថ្មីថាប្រទេសចិននៅតែបន្តការប្ដេជ្ញាចិត្តការពារអធិបតេយ្យភាពជាតិ និងលើកកម្ពស់សន្តិភាព។
លោកថ្លែងថាសព្វថ្ងៃនេះ មនុស្សជាតិត្រូវសម្រេចចិត្តដ៏ពិបាកថាតើត្រូវយកសន្តិភាព ឬសង្គ្រាម, ត្រូវសន្ទនាគ្នា ឬប្រឈមមុខដាក់គ្នា, ត្រូវទាញយកប្រយោជន៍ទាំងសងខាង ឬត្រូវខាតទាំងអស់គ្នា។ លោកថ្លែងសុន្ទរកថាដោយខ្លីត្រឹមតែរយៈពេល៧នាទីប៉ុណ្ណោះ។ ការថ្លែងដូច្នេះក៏ស្របពេលដែលពិភពលោកមិនទាន់ស្ងប់ស្ងាត់ពីសង្គ្រាមនៅឡើយទេទាំងសង្គ្រាមប្រដាប់អាវុធ និងសង្គ្រាមពាណិជ្ជកម្ម។ ឧទាហរណ៍ សង្គ្រាមអ៊ុយក្រែន និងសង្គ្រាមនៅមជ្ឈិមបូព៌ាជាដើម។ ពិភពលោកមិនសូវមានសណ្ដាប់ធ្នាប់ល្អដោយសារការបែកបាក់គ្នា និងនិយាយស្ដាប់គ្នាមិនបាន។ ម៉្យាងទៀត ចិនចាត់ទុកថាអាមេរិកប្រើនយោបាយឯកតោភាគីនិយមកាន់តែខ្លាំង។ មានន័យថាសម្រេចធ្វើអ្វីជាអត្តនោម័ត។
លោកស៊ីថ្លែងថាប្រទេសចិននៅតែប្ដេជ្ញាចិត្តអភិវឌ្ឍជាតិដោយសន្តិវិធី។ យើងនឹងធ្វើការស្រុះដៃគ្នាជាមួយប្រជាជនគ្រប់ប្រទេសទាំងអស់ដើម្បីកសាងសហគមន៍មួយដែលមានជោគវាសនា-អនាគតរួមគ្នាតែមួយសម្រាប់មនុស្សជាតិទាំងអស់។ សូមជម្រាបថាពិធីនេះរំលឹកទៅដល់ព្រឹត្តិការណ៍ឆ្នាំ១៩៤៥នៅពេលកងទ័ពជប៉ុនចុះចាញ់សង្គ្រាម។ ចិនចាត់ទុកថានោះជាសង្គ្រាមតស៊ូរបស់ចិនប្រឆាំងនឹងចក្រពត្តិជប៉ុន និងរបបហ្វាស៊ីសនិយម។ យោងតាមការប៉ាន់ស្មានរបស់ចិន កាលពីអំឡុងសង្គ្រាមលោកលើកទី២ ខ្លួនស្លាប់មនុស្សជាង៣៥លាននាក់ទាំងកងទ័ព និងជនស៊ីវិល៕
ចែករំលែកព័តមាននេះ