ខេត្តបន្ទាយមានជ័យ ៖ ភាគីថៃបានបង្រួមពេលវេលានៃការបើកច្រកព្រំដែនខ្លងលឹកឈមនឹងច្រកទ្វារអន្តរជាតិប៉ោយប៉ែត សម្រាប់ពលរដ្ឋចេញ-ចូល ១សប្តាហ៍២ថ្ងៃ ក្នុង១ថ្ងៃត្រឹមតែ៣ម៉ោង ។ លោក វ៉ាន់ ដារ៉ាន់…
ខេត្តបន្ទាយមានជ័យ ៖ ភាគីថៃបានបង្រួមពេលវេលានៃការបើកច្រកព្រំដែនខ្លងលឹកឈមនឹងច្រកទ្វារអន្តរជាតិប៉ោយប៉ែត សម្រាប់ពលរដ្ឋចេញ-ចូល ១សប្តាហ៍២ថ្ងៃ ក្នុង១ថ្ងៃត្រឹមតែ៣ម៉ោង ។
លោក វ៉ាន់ ដារ៉ាន់ ប្រធានស្នាក់ការត្រួតពិនិត្យច្រកទ្វារព្រំដែនអន្តរជាតិប៉ោយប៉ែត ថ្លែងថា នគរបាលអន្តោប្រវេសន៍ថៃច្រកទ្វារខ្លងលឹក បានជូនដំណឹងមកកម្ពុជាថា ខ្លួនអនុវត្តចាប់ពីថ្ងៃទី៣១ ខែសីហា ឆ្នាំ២០២៥តទៅ ក្នុង១សប្តាហ៍បើកច្រកទ្វារព្រំដែនខ្លងលឹក ២ថ្ងៃ រៀងរាល់ថ្ងៃពុធ និងថ្ងៃអាទិត្យ ចាប់ពីម៉ោង១ដល់ម៉ោង៤រសៀល សម្រាប់តែពលរដ្ឋវិលចូលប្រទេស ។
លោកបន្តថា កន្លងមកភាគីថៃបានបិទ-បើកច្រកទ្វារព្រំដែនខ្លងលឹកឈមនឹងច្រកទ្វារអន្តរជាតិប៉ោយប៉ែត ជាឯកតោភាគី តាមតែអំពើចិត្ត ក្រោយពីស្ថានការណ៍តាមបន្ទាត់ព្រំដែនកម្ពុជា-ថៃ មានការផ្ទុះអាវុធនៅខេត្តរមានជ័យនិងខេត្តព្រះវិហារ ។លោក វ៉ាន់ ដារ៉ាន់ បានបញ្ជាក់ថា ពលរដ្ឋកម្ពុជានិងថៃនៅតែបន្តវិលចូលប្រទេសរាល់ថ្ងៃ។
ជាក់ស្តែង នៅថ្ងៃទី២៩ ខែសីហា ឆ្នាំ២០២៥ មានពលរដ្ឋថៃចាកចេញពីកម្ពុជាចូលទៅថៃចំនួន១៩៥នាក់(ស្រី១០៧នាក់) និងពលរដ្ឋកម្ពុជា ចេញពីថៃចូលមកកម្ពុជា មានចំនួន៥២នាក់(ស្រី២៥នាក់) ដែលក្រុងការងាររង់ចាំទទួលនៅច្រកទ្វារអន្តរជាតិប៉ោយប៉ែត ។
វិធានការបិទព្រំដែនកម្ពុជា-ថៃ មិនមែនចាប់ផ្តើមដោយកម្ពុជានោះឡើយ គឺថៃជាអ្នកចាប់ផ្តើម ។ ថៃជាអ្នកបិទដោយឯកតោភាគី ។
ឆ្លើយតបការចង់បើកច្រកព្រំដែនមុននេះពីភាគីថៃ សម្តេចបវរធិបតី បានបញ្ជាក់យ៉ាងដូច្នេះ «ខ្ញុំហួសចិត្ត ។ គេថា ភាគីថៃបើកហើយ តែភាគីកម្ពុជាមិនបើក អីចឹងប្រជាពលរដ្ឋដែលរងវេទនាដោយសារការបិទច្រកនេះបន្ទោសកម្ពុជាទៅ ។ ទៅជាខុសកម្ពុជាវិញ ។ គេរកវិធីចាប់ទោសកម្ពុជាទាល់តែបាន ។ ដោយសារអី ? ពេលថ្ងៃទី២៤ ខែមិថុនា កម្ពុជាប្រកាសហើយ ថាបើយើងបិទជាអចិន្ត្រៃយ៍រហូតដល់ស្ថានភាព ដូចមុនថ្ងៃទី៧ ខែមិថុនា» ។
សម្រាប់ប្រជាពលរដ្ឋខ្មែរ និងថៃ ផលប៉ះពាល់ដោយសាររឿងបិទព្រំដែននេះ សម្តេចស្នើសូមឲ្យយោគយល់ មិនមែនកម្ពុជាជាអ្នកចាប់ផ្តើមទេ ហើយសោក៏មិនមែននៅកម្ពុជាដែរ ។ កម្ពុជា មិនមែនជាអ្នកលេងល្បែងនេះទេ ហើយមិនគិតថា នេះជាល្បែងទេ ខណៈវិធានការបែបនេះ គឺប៉ះពាល់ពលរដ្ឋទាំងសងខាង ដែលថៃចាប់ផ្តើម កម្ពុជាត្រូវឆ្លើយតប ។
សូមជម្រាបថា កាលពីថ្ងៃទី២៩ ខែមិថុនា ឆ្នាំ២០២៥ អាជ្ញាធរមានសមត្ថកិច្ចរបស់កម្ពុជាបានទទួលព័ត៌មានពីភាគីថៃនៅខេត្តស្រះកែវ ពាក់ព័ន្ធនឹងការស្នើសុំឱ្យមានការបើកច្រកព្រំដែនកម្ពុជា-ថៃមួយចំនួន និងអនុញ្ញាតឲ្យរថយន្តដឹកទំនិញចេញ-ចូល ដើម្បីបន្ធូរការប៉ះពាល់ដល់ជីវភាពរស់នៅរបស់ប្រជាពលរដ្ឋ ។
តាមប្រសាសន៍សម្តេចបវរធិបតី ហ៊ុន ម៉ាណែត រឿងបិទបើកព្រំដែននេះ កម្ពុជា មិនដឹងនិយាយជាមួយតួអង្គណានោះទេ ព្រោះនៅថៃមានច្រើនតួអង្គពេក ។ កម្ពុជាអត់លេងបិទពួនជាមួយថៃនោះទេ ។ កម្ពុជាសំឡេងតែមួយពីលើដល់ក្រោម ។ កម្ពុជារង់ចាំអ្នកមានអំណាចពិតប្រាកដនៅក្នុងប្រទេសថៃ ដើម្បីជជែកលើបញ្ហាព្រំដែនជាមួយគ្នា ។
ស្របពេលជាមួយគ្នានេះ សម្តេចមហាបវរធិបតី ហ៊ុន ម៉ាណែត អំពាវនាវដល់ប្រជាពលរដ្ឋទាំងអស់គាំទ្រផលិតផលរបស់ខ្មែរជារៀងរហូត សូមឲ្យស្មារតីជាតិនិយមស្ថិតស្ថិរជារៀងរហូត ៕
ចែករំលែកព័តមាននេះ