ទីក្រុងកាប៊ុល៖ ពាក់ព័ន្ធនឹងហេតុការណ៍រញ្ជួយដីនៅអាហ្វហ្កានីស្ថាន គិតត្រឹមល្ងាចនេះ ចំនួនអ្នកស្លាប់កើនឡើងដល់ជាង៨រយនាក់ហើយ។ នេះគិតតែចំនួនសាកសពជនរងគ្រោះដែលបានរកឃើញ។ ក្រៅពីនេះ មនុស្សមិនដឹងប៉ុន្មាននាក់ទេដែលកប់ក្រោមគំនរបាក់បែក។ អាជ្ញាធរអះអាងថាគ្រោះរញ្ជួយដីកម្រិត៦រ៉ិចទ័រនោះក៏បានបណ្ដាលឱ្យមនុស្សជាង២៨០០នាក់រងរបួសផងដែរ។
ផ្ទះរបស់អ្នកស្រុកជាច្រើនខ្នងត្រូវបាក់រាបដល់ដីដោយសារកម្លាំងរញ្ជួយដែលមានចំណុចចាប់ផ្ដើមពីស្រទាប់ផែនដីខាងក្រោមជម្រៅដប់គីឡូម៉ែត្រ និងមានចម្ងាយ១៤០គីឡូម៉ែត្រពីរដ្ឋធានីកាប៊ុល។ ទីតាំងដែលកើតមានគ្រោះរញ្ជួយដីនោះជាតំបន់ដាច់ស្រយាលដែលស្ថិតនៅកៀកនឹងព្រំដែនប្រទេសប៉ាគីស្ថាន។ ដូច្នេះ រដ្ឋាភិបាលប្រើប្រាស់ឧទ្ធម្ភាគចក្រធ្វើជាមធ្យោបាយសម្រាប់ដឹកជញ្ជូនអ្នករបួសទៅមន្ទីរពេទ្យ។
អាហ្វហ្កានីស្ថានជួបប្រទះនឹងវិបត្តិមនុស្សធម៌តាំងពីមុននេះម៉្លេះ។ ដូច្នេះ គ្រោះរញ្ជួយដីលើកនេះនឹងដាក់បន្ទុកកាន់តែធ្ងន់បន្ថែមទៀត។ អ្នកនាំពាក្យក្រសួងមហាផ្ទៃ លោកអាប់ឌុល ម៉ាទីន ខានី (Abdul Maten Qanee) ថ្លែងថាក្រសួងបានប្រមូលកម្លាំងដែលមានទាំងប៉ុន្មានដើម្បីពន្លឿនការជួយសង្គ្រោះ និងផ្ដល់ជំនួយសម្រាប់អ្នកដែលបាត់បង់ទីជម្រក។ លោកថ្លែងបន្តទៀតថាអាជ្ញាធរកំពុងខិតខំជួយសម្រួលបញ្ហារបស់ប្រជាជននៅក្នុងវិស័យសន្តិសុខ ស្បៀងអាហារ និងសុខាភិបាល។
នៅរដ្ឋធានីកាប៊ុល អាជ្ញាធរសុខាភិបាលអះអាងថាក្រុមអ្នកជួយសង្គ្រោះកំពុងធ្វើដំណើរយ៉ាងញាប់ដៃញាប់ជើងដើម្បីទៅដល់តំបន់ដាច់ស្រយាល និងភូមិតូចៗនៅដាច់ៗពីគ្នាដែលរងគ្រោះយ៉ាងធ្ងន់ធ្ងរ។ ភូមិខ្លះបាក់ផ្ទះអស់រលីងគ្មានសល់។ នៅក្នុងភូមិមួយនោះមានមនុស្សស្លាប់រហូតដល់៣០នាក់ និងរបួសរាប់រយនាក់។ នេះបើយោងតាមប្រភពពីញូស្វីក (Newsweek), រ៉យទ័រ (Reuters) និងប្រភពដទៃទៀត៕
ចែករំលែកព័តមាននេះ