ស្ថានភាពជំនន់ទឹកភ្លៀងជន់លិចភូមិឋាននៅឃុំចំនួន៣ ក្នុងស្រុកពួក ខេត្តសៀមរាប ខណៈមានភ្លៀងធ្លាក់ជាប់គ្នា
- សៀមរាប
ខេត្តសៀមរាប ៖ តាមការបញ្ជាក់របស់លោក ស៊ិន ចាន់ថុល អភិបាលនៃគណៈអភិបាល ស្រុកពួក ខេត្តសៀមរាប នៅថ្ងៃទី ៣១…
ខេត្តសៀមរាប ៖ តាមការបញ្ជាក់របស់លោក ស៊ិន ចាន់ថុល អភិបាលនៃគណៈអភិបាល ស្រុកពួក ខេត្តសៀមរាប នៅថ្ងៃទី ៣១ ខែ សីហា ឆ្នាំ២០២៥ បានឱ្យដឹងថា ក្នុងរយៈពេលដែលប្រទេសកម្ពុជាយើង ទទួលរងនូវសម្ពាធអាកាសធាតុទាប បានបណ្តាលឱ្យមានភ្លៀងធ្លាក់ជាបន្តបន្ទាប់ជាប់ៗគ្នាប៉ន្មានថ្ងៃមកនេះ បណ្តាលឱ្យឃុំចំនួនបីនៅបែកខាងលើ របស់ស្រុកពួក ទទួលរងការលិចលង់ដោយទឹកភ្លៀង មានឃុំ ត្រីញ័រ , ឃុំរើល និង ឃុំកែវពណ៌ ។
លោកបានបញ្ជាក់ថា ឃុំទាំងបីដែលរងការលិចលង់ជំនន់ទឹកភ្លៀងនេះ ធ្វើឱ្យប៉ះពាល់ភូមិចំនួន ១៩ភូមិ ប៉ះពាល់ផ្ទះប្រជាពលរដ្ឋ ចំនួន ២៥៥គ្រួសារ ,មណ្ឌលសុខភាព ២កន្លែង , សាលារៀន ២ខ្នង ស្នាក់ការបក្ស ១កន្លែង,ប៉ុស្តិនគរបាលរដ្ឋបាល ១កន្លែង ,វត្ត ១កន្លែង ,ទឹកលិចហូរកាត់ផ្លូវកៅស៊ូ២ខ្សែប្រវែង១១០ ម៉ែត្រ, និងផ្លូវលំចំនួន ៣០ខ្សែ មានប្រវែង ១៥ ពាន់ ៨៣០ម៉ែត្រ និងលិចដំណាំស្រូវ១៧៦ហិចតា ។
ក្នុងការចុះពិនិត្យស្ថានភាពជំនន់ទឹកភ្លៀងនោះដែរ លោក ស៊ិន ចាន់ថុល ក៏បានធ្វើការណែនាំដល់អាជ្ញាធរឃុំ និងនគរបាលប៉ុស្តិ៍រដ្ឋបាល ត្រូវ ធ្វើការពិនិត្យ នូវផ្លូវចរន្តទឹកហូរដែលប្រជាពល រដ្ឋ បានធ្វើការបិទ ឬ ក៏ដាក់លូ មិនបាន ត្រឹម ត្រូវ ដែលរង្វង់មុខលូតូច ដែលធ្វើឲ្យចរន្តទឹកហូរមិនទាន់។ម្យ៉ាងទៀតនៅតាមប្រព័ន្ធប្រឡាយមួយចំនួន ដែលបងប្អូនយើងបានបិទកាត់តាមប្រឡាយ ក៏ជាបញ្ហាដែលធ្វើឲ្យចរន្តទឹកហូរមិន ទាន់ ចុះទៅផ្នែកខាងក្រោម។
ក្នុងនោះដែរលោកអភិបាលស្រុកក៏បានណែនាំដល់ប្រធានមណ្ឌល សុខភាព និង នាយប៉ុស្តិ៍នគរបាល ត្រូវធ្វើការទុកដាក់នូវ សម្ភារៈបរិក្ខាពេទ្យឱ្យបានល្អ និង រាល់ឯកសារ ឱ្យបានត្រឹមត្រូវ ក្នុងពេលកំពុងលិចទឹកនេះ ព្រមទាំងសូមឱ្យគ្រូពេទ្យ សហការជាមួយឃុំ ភូមិ ធ្វើការផ្សព្វផ្សាយជូនប្រជាពល រដ្ឋ អំពីអនាម័យ សុខភាព ក្នុងពេលដែលជួបគ្រោះមហន្តរាយ នេះ ៕
ចែករំលែកព័តមាននេះ